Comun de la Bassa Veronese a 20 km da Verona in diression sud e posissionà longo el fiume Tartaro. Isola l'è abità fin da l'antichità come i ne dimostra i reperti de l'Età del Bronso catadi al Molin Giarela, mentre in epoca romana l'era traversà da la Via Claudia Augusta che partendo da Ostiglia e passando par Verona la menava verso nord; e propio de 'sto periodo jè le monede, medaje e lapidi scoerte nel teritorio isolan. Nei primi documenti del X secolo compare el nome de Insula Cenensis dal latin caenum "fango"; in pratica l'era 'na zona isolà con intorno le "Paludes Tartari fluminis" descrite da Tacito e Plinio, corispondenti a le atuali "Grandi Valli Veronesi". In epoca comunal el paese el se ciamava Isola dei Conti parché l'era a le dipendense dei conti, forse Sambonifacio, mentre soto la dominassion Scaligera l'è nata l'atual denominassion. A guardia del Tartaro el bon Mastino II De la Scala nel XIV secolo, l'à fato costruir la tor Scaligera, che fasea parte de l'opera difensiva ciamà "Serajo", un grande murajon che partendo da Valeso e passando da Vilafranca el finiva a Nogarola Roca. Dopo i periodi Visconteo e Cararese a l'inissio del XV secolo l'è stà el turno dei Venessiani; Isola l'era a capo de uno dei vicariadi e anca soto le pressioni de la Serenissima de impor el nome Isola San Marco i abitanti i à sempre mantegnù el vecio toponimo. Nel 1462 Tarmassia l'è stà consegnà ne le mane dei Malaspina che i vansava un credito dal Comun. Nel 1509 durante la guera dei Venessiani contro la Lega de Cambray, el conte Girolamo Pompei l'era riussì a far prisonier a Isola, Francesco II de Gonzaga e dopo averlo portà a Venessia, ghe stà regalà come premio el Castel de Ilasi; la vendeta parò l'è rivà da parte dei soldà francesi copando zente e tacandoghe fogo al paese. Nel 1524 su inissiativa dei frati Zoccolanti de l'Ordine dei Minori de San Francesco l'era stà costruido el Monte de Pietà restà in atività fin al 1949 quando l'è stà sopresso dal Ministero del Tesoro. Nel XVI secolo el Comun de Isola l'à ben pensà de scrivarse dei Statuti e podea vantar dei diriti su la pesca nel Tartaro, sul pascolo e sul pedajo sul ponte de la Tor Scaligera. Nel teritorio isolan s'à 'isto l'emigrassion de un poche de nobili fameje su consenso de la Serenissima e la costrussion de numarose vile. Nel XVII secolo j è stà bonificà le paludi e l'è scomincià la famosa coltivassion del riso. Dopo la Republica de Venessia l'è rivà a la fin del '700 Napoleon, con Isola a le dipendense del Distreto de Vilafranca mentre ne l'800 soto i austriaçi l'era a capo de un Distreto con poter su Bovolon, Isola Rissa, Salissol, Opean, Ronco, Nogara, Erbè, Sorgà e Travénsol fin al 1866 quando l'è deventà Italiana. Tra le cése da visitar a tuti i costi, l'è el Santuario de la Madona de la Bastia, ceséta romanica del 1126 con portal del XVI secolo, la conserva drento afreschi del 500, 'na statua de la Madona venerà dai isolani, un aquasantiera del '400, mentre fora, su la fassada, gh'è n'iscrission murà, con sora i nomi de ci l'à costruì e l'ano de costrussion. N'altra interessante césa l'è quela parochial dedicà ai Santi Stefano e Giacomo, antica pieve documentà dal 1011 e ricostruida nel XVI secolo; la conserva un bel batistero otagonal in marmo rosso con bassorilievi con rapresentà Gesù Cristo, la Vergine e l'Angelo Gabriele con altri santi e 'na tela del Giolfino oltre tri pale de Carlo Ridolfi con el processo, el martirio e la sepoltura de San Stefano mentre el campanil del 1411 el g'à la base in tufo del 1130. La parochial de Tarmassia dedicà a San Giorgio la conserva du pale una del Brusasorsi e l'altra del Farinati. Tra le vile da 'edar gh'è la Pindemonte de l'omonima fameja che la gavea possedimenti fin a Setimo de Galese a Butapiera; l'è stà costruida nel 1742 su progeto de Alessandro Pompei con statue de le divinità del Muttoni. Inoltre Vila Guarienti e Corte Nogarola a Tarmassia del '500, Vila Pellegrini a Pelegrina del XVI secolo,Vila Boschi in stile Veneto costruida dai Conti Brà nel 1747, Vila Zenobio del '700, Corte Schioppo del' 500 con Oratorio de Santa Margarita del '600, Corte Rivanello de la fameja Rivanelli che g'avea propietà a Isola dal 1275, Corte Palazzina del 1584 costruida da la fameja Magnini e Corte Mandello in quela che 'na 'olta l'era ciamà Valmercaldo. E alora ne resta che magnarse un bon piato de Risoto a l'Isolana, col "Riso Vialon Nano" e far un giro tra le vecie "pile" e le risorgive.