Comun de la Bassa Veronese a 26 km sud-est da Verona posissionà ne la campagna tra el Menago e l'Adese con a sud el Bussè e traversà dal Piganzo. L'omo l'è presente in 'sto teritorio fin da l'antichità come pol testimoniar i reperti de la çiviltà Paleoveneta ne l'Età del Fer de çirca 3000 ani fa (X-IX sec. a.C.) scoerti in località Pieve nel 1949. Del VI secolo a.C. l'è inveçe el vaso etrusco in bronso catà sempre in 'sto teritorio mentre del III secolo a.C. l'è la necropoli Galica con piassé de 100 tombe oltre a monede, scudele e vasi in località Casalandri. Nel 1733 soto la pavimentassion de la césa parochial, l'è stà catà na scrita su piera del periodo roman I sec. a.C. de tipo funebre, dedicà a M. Ladavonius e a so mojer Sempronia Prima, mentre in località Mandella nel 1909 un anfora e 'na moneda sempre del stesso periodo. Secondo i studiosi el nome originario de Isola Rissa in tardo-latin l'era Insula Porcaritia: Insula pol indicar un toco de tera suto tra boschi e paludi mentre ne l'etimologia, la parola Porcaritia ne indica 'na zona agricola, 'na propietà usà par arlevàr le bestie, in 'sto caso "porsei". Altri studiosi i ne dise che el nome podarìa derivar da Isola del Canal Richenza: "porca" col significà de canal e "Ritia" forma modificà de "Richentia", el nome de la regina mojer de Lotaro re de Germania, d'Italia e imperador dal 1133 al 1137, che con el so esercito l'à sponsà propio da 'ste parti, dispensando diplomi e calmando le beghe, mentre Richenza l'avarìa contribuì coi schei par el scavo del canal. L'ultima version etimologica l'è dialetal, dal veronese "porcorizzo". Ma el nome nel 1872 su decision dei abitanti l'è cambià da Isola Porcarizza in Isola Rizza (vr. Rissa) mentre el stema comunal co' la roia (scrofa) con in boca un masso de spighe de riso l'è ricomparso nel 1932 dopo averlo cavà. Secondo 'na legenda, in epoca Longobarda, nel 573 la regina Rosmunda dopo aver copà el re Alboin l'è scapà col tesoro real insieme con Elmichi da Verona in diression Ravena, sponsadose un poco ne l'antica dogana de Isola prima de ripartir in barca su l'Adese. El "Tesoreto de Alboin" l'è stà catà nel 1872 composto da tredese pressiosi de oro e argento. Del VIII secolo l'è l'origine del primo çentro abità e de la prima césa de Isola Rissa dedicà ai Santi Fermo e Rustico arente a la via romana Magna (deventà strada Regia Postal e col tempo "la Napoleonica"); la pieve l'è ricordà ne la bola de Papa Eugenio III nel 1145 come "Plebem Insulae Porchariciae, cum capellis, et decimis, et curte". Nel XI secolo Isola Rissa l'era tra i possedimenti dei Vescovi de Verona e soto i Scaligeri l'era ne la giurisdission de Zevio. Nel 1403 Caterina Visconti mojer de Gian Galeasso l'avea restituì al Comun de Verona con "motu proprio" 19 vicariadi compreso quel de Insula Porcaritia, composto da sete "vile": Insula Porcaritia, Ruperclaria Caselarum, Ruperclaria Fonzane, Ruperclaria Sancti Petri (Roverchiara), Tomba, Opedanum, Palus. Nel 1405 Isola Rissa l'è passà a la Serenissima e nel periodo Venessian s'à 'isto grandi opere de bonifica, l'aumento de la popolassion e del comercio; cossita l'è stà sgrandà la "Napoleonica", la strada che la va da Legnago a Verona e propio longo 'sta via l'è nato l'atual çentro abità e la césa de Santa Maria de la Piassa a la fin del '400, un tempo in man oltre ai paroci, a le confraternite de la Compagnia del Rosario e de la Scola de Santa Crose fin a l'inissio del '900.....beghe comprese. A l'inissio del XVI secolo a causa de la peste e de varie malatie portà dai soldà de la Lega de Cambrai la popolassion la s'à dimesà e con la sconfita venessiana ne la bataja de Agnadello el paese l'è stà messo soto sora, tanto che, nel 1817 durante 'n ispession, un Vicario venessian el scrivea a Venessia che “Ixola Porcarezza, qual'era belisima villa, adeso è ruinata”. Nel 1653 i risultava paroni dei piassé importanti fondi de la "villa" le fameje dei: Miniscalchi, Sagramoso, Conti San Bonifacio, Maffei, Auricalco (Recalchi), Martelli, Morando, Da Como, Mandelli. In 'sto periodo fra Isola Rissa e Tomba gh'era ben 300 campi a risare. Nel XVII secolo, altro giro de peste e contadini ritornà ne la miseria mentre el Vicario ghe tocava controlar bestie e persone infetade. A la fin del XVIII secolo con l'arivo dei francesi le cose no jè andà al mejo, Isola l'è stà messa soto sora, campagne e vile comprese, e durante la bataja de Ronco e Arcole nel noembre 1796 Messena e i so soldà i s'à campà propio da 'ste parti. Pochi ani dopo con i austriaçi le cose le andava mejo e a parte qualche insuression Isola Rissa nel 1866 l'è deventà Italiana. Da segnalar la césa parochial dedicà ai Santi Piero e Paolo ricostruida nel 1535 da l'Arciprete Oricalco e modificada ne la forma atual nel '800, gh'è conservà 'na tela de Sante Prunati con rafigurà la Madona coi Santi Piero e Gerolamo. Tra le vile da segnalàr Vila Bonanome arente la césa parochial 'ndoe l'à fato visita Napoleon, Vila Sagramoso-Buri del '400 e 'l Palasso del Muniçipio, zà Vila Tedeschi e Polettini, el conserva nel gran salon l'afrescà "La finta malà" del pitor Faretto (1849-1887).