Magnifico comun lacustre posissionà longo la sponda oriental del Lago de Garda con a le spale coline e campagne coltivade a olivi e vigneti. Lasise l'è uno dei più antichi paesi del Garda abitato fin dal neolitico da popolasioni che le vivea su palafite. In epoca romana l'era un "pagus" conossudo come "Lasitium" parola che podarìa derivar da "Lacus" o Laceses, logo lacustre. Infati ne le vicinanse de la frassion Pacengo durante dei scavi jè stà catadi resti de palafite con un fraco de materiali in çeramica, in bronso, folende e ossi. Tra l' 861 e l'961 durante el regno d'Italia da Berengario I° al II° dipendea dal re e dichiarada "vila libara" indipendente dai feudatari. El 7 majo 983 Ottone II de Sassonia l'à concesso a questo comune el dirito de riunirse e fortificarse oltre a importanti autonomie militari e comerciali con dazi par ci pescava ne le aque del lago che bagna el paese e par ci passava da quele parti, mantegnude anca soto la "Judicaria Gardensis", un teritorio con sistema aministrativo e giuridico del'area gardesana, deventando cosita el comune passè antico d'Italia. Nel 1077 altre concessioni, ma questa 'olta grassie a Enrico IV, con la costrussion de mura e de un castel, rinforsadi, col passar dei ani, dai Scaligeri che i à ricostruido anca la darsena, Tór del Cadenon e verzendo tri porte Porta Noa, Porta San Zen e Porta del Liòn. Dopo el breve periodo Visconteo, Lazise passa ai Venesiani deventando uno dei 10 comuni de la Federassion Gardesana del'Aqua (la gavea compiti de repression e de ripartision dei oneri fiscali con a capo el "Capitan del Lago") e propio soto la Serenissima l'è stà edificada un importante dogana con vissin una Tór merlada. Tra le curiosità de questo periodo, l' Imperador Federico III° l'à fato un giro sul Garda su 'na galea venessiana partendo da Lazise, come ambasiador de la Republica de Venesia. Ai tempi de la Lega de Cambrai contro la Serenissima (1509) 'l proveditor del governo Veneto Zaccaria Loredan prima de scapar l'à tacà fogo a una galea e a un par de fuste (galee più picenine) par no farle cascar in man al nemigo. In epoca Venessiana da sotolinear le invasioni dei Lansichenechi che più 'olte i à sachegià, robado, portado malatie come la peste nel 1630. In più da parte de la Serenissima, numerosi controi su evasori e briganti via tera e via aqua co 'le barche. Nel 1759 dai Venessiani l'è stà concesso de vérzar el marcà al zobia, con vendita de bestie, gran e prodoti de artigianado. Dal 1797 i s'a alternado domini austriaçi e francesi par un pochi de ani, par finir in mane austriache fin al 1866 prima de passar soto el Regno d'Italia. Da segnalar le numerose vile del teritorio, la Bernini che comprende el castel 'ndoe nel 1796 i francesi i gavea messo drento una fabrica de salnitro par la polvar da sparo, la Pergolana con tacà la césa de S.M. de le Grazie, la Montighel; ne la frassion Colà (Castrum Colade) la Da Sacco ('del 500), la Fumanelli, la Moscardo-Miniscalchi conossuda come Vila dei Cedri importante çentro termal, mentre ne l'altra frassion Pacengo (Pacingus) la Camuzzoni. Tra le cése, da visitar, quela parochial vissin al portesèl dedicada ai Santi Zen e Martin su le roine de n' antica césa del XIII Secolo. Quela atual l'è stà progetada da Luigi Trezza in stil neoclassico e consacrada el 2 setembre 1888; la césa de San Nicolò del XII secolo l'è in stil romanico con afreschi del XIV secolo e canpanil del 1777; in località Mondragon la legendaria céseta dei Santi Faustin e Giovita 'ndoe secondo l'antichità, propio chi, le se dava apuntamento le "creature fatate" sensa contar che l'era citada ne le numerosi bole papali del XII secolo par la so partenensa al Capitolo dei Canoniçi de Verona; a Colà la bela césa parochial dedicada a San Giorgio l'è stà costruida sui resti de n'altra del XII-XIII secolo e consacrà nel 1927; la parochial de Pacengo (1792) l'è dedicada a San Gioani Batista con dipinti de Pio Piatti del 1792-93. L'altar magior, pien de marmi e do angeli marmo bianco de Carara jè opera dei scultori Francesco Zoppi e Antonio Spazzi. Tra le manifestassioni principali la "regata storica de le bisse" e la fiera internasional del miel.