Comune che'l se cata a l'inissio de la Val de Messane tra pianura e coline, composto da le frassioni San Brissio, San Piero (l'atual sede municipal) e Vago. La zona l'è stà abità fin da la preistoria come ne pol testimoniar i resti de un vilajo de la çiviltà Atestina (VII-VI secolo a.C.) catadi arente al forte ne la frassion de San Brissio e 'l "Castelar" de Lepia de l'età del bronso a sud del teritorio comunal. De 'na çerta importansa jè i reperti de l'Epoca Romana come la scrita rinvegnuda ne la canonica a San Piero nel 1766 de la Gens Valeria o el sepolcreto con monede de Costantin e tochi de muri e pavimentasioni a Vago o altre curiosità romane a San Brissio. A Vago i dise che passasse l'antica Via Postumia longo l'atual strada statal 11 e probabilmente in quel' epoca sul Monte Grigliano gh'era una fortessa de control su la pianura come ne pol testimoniar i numarosi reperti. L'origine del nome Lavagno no l'è sicura, ghe ci dise che possa derivar da la parola latina "labes" frana; da la voçe "lava" riferendose a la presensa de un vulcan sul col de San Brissio; da un nome latin de un çerto "Lavanium"; probabile l'origine retica "Lavaniu" e non romana del nome. In epoca romana, comunque, la Via Postumia l'à separà e definido du çentri "Lavaneus ad Montem" in colina e "Lavaneus ad Planum" ne la campagna. Tra i primi documenti scriti su Lavagno g'avemo quel del 1035 'ndoe el Vescovo de Verona Giovanni, g'à lassà al monastero de San Nazaro i teritori Lavanei, Maximagi, Mezanarum o quel che ne parla del Vicus e del Castrum che Corado II el g'à dà al Vescovo de Verona mantegnendoli par du secoli e andà in man in ordine de tempo de Scaligeri, Visconti e Venessiani. Un altra donassion del 1103 la parla de la césa de San Martin constructa in vico Lavaneo. Bisogna tegnér conto parò che a l'epoca la località Lavagno vegnea identificà con l'atual San Brissio el piassé antico çentro del comun e sede de l'antica pieve. La località San Brissio italianisà malamente in San Briccio, l'è stà ciamà cossita dopo la costrussion de la pieve romanica de San Brizio de Tours. Storicamente in epoca medioval l'abitado de San Brissio el gavea ne la propia giurisdission Marcelise e San Martin Bon Albergo. La vecia césa de l'ano mile, de 'sta frassion de Lavagno, l'era stà costruida sora al col 'ndoe 'desso gh'è el forte militar. De una çerta importansa l'è l'antico monastero de San Giuliano de Lepia del XII secolo che l'à ospitado el papa Lucio III, e la césa de San Giacomo del Griglian simbolo del teritorio de Lavagno 'ndoe secondo tradission, jè stà rinvegnudi i resti mortali de l' Apostolo Giacomo 'ndoe 'na olta gh'era 'na Capela. Infati l'an dopo, nel 1396, el Comun de Verona che g'avea tra le propietà dei tereni in 'sta zona, l'à fato costruir el Santuario. Realisada in stile romanico-gotico su disegno de Nicolò da Ferara l'è stà sgrandà e finida nel '400 e nel '500 dai monaci Olivetani, conserva magnifiçi afreschi del '400 de la scola de l'Altichiero e de Martin da Verona. Tra le cése da segnalar quela de la frassion S.Brissio ricostruida nel 1885 su disegno de Don Gottardi, drento conserva 'na pala del '500 del Giolfino; la césa de San Piero in stile neoclassico l'è stà costruida nel 1821 e drento la conserva altari del XVI secolo, e na pala de Gioani Caliari; in stile neoclassico l'è anca la parochial del Vago finida nel 1847 e parochia dal 1899. Tra le vile, da segnalar la piassé importante, Vila Verità (dopo Montanari, Grassi e Fraccaroli), conossuda col nome de Vila del Boscheto, costruida par Girolamo Verità dal "Sanmicheliano" Domenico Curtoni con statute, giardini, fontane e pescheria sensa desmentegarse che drento jè conservadi afrschi de Filippino Maccari e Giorgio Anselmi; Vila Contarini del '700 con vial albarado e Capela de San Nicola da Tolentino; in località Montesei (Monticelli) Vila Castelli conossuda come San Roco, con bel parco e 'na Capela; Vila Castellani del '700 in contrà Fontana, con barchesse, colombare e Capela; Vila Gelmi del '700; Vila Rensi in çentro a San Piero de fine '700; Vila da Porto del '700 con bel parco. Lavagno al dì de ancò se presenta come un çentro agricolo con una bona coltivassion de çereali e uva sensa contar de l'importante produssion de vin e de numarose atività artigianali e industriali.