El comune piassé grando de la provincia veronese dopo Verona, el g'a come frassioni Canove, Porto, S.Piero, S.Vito, Teranegra, Toreta, Vangadiza, Vigo e se cata a 40 km da la nostra çità ne la Bassa Veronese. Numarosi reperti preistoriçi catadi ne la zona pol farne capir l'importansa storica de 'sto comun fin da l'antichità, come tochi de palafite, necropoli e reperti de l'età del bronso, sensa contar quei de epoca romana come lapidi, tombe, tochi de strade e case, tegnendo conto che Legnago l'era un importante çentro roman conossudo come "Forum Allieni". Legnago ciamado nei secoli anca "Lemniacus" e "Lignago", ne le varie epoche storiche l'è stà 'na ecessional fortessa militar, partendo da l'Epoca Barbarica, passando dal Dominio Vescovile ai domini del Comune veronese, dei Scaligeri, dei Visconti, dei Carraresi, dei Venessiani, dei Francesi e par finir Austriaçi. In epoca longobarda Legnago l'è deventà el logo dei "Arimanni" òmeni libari e grassie a 'n documento del 932 se sente parlar del paese con el nome de "Castel" infati in quel tempo Legnago l'era una roca fortificada de forma quadrangolar con quatro tori bele grande. Nel 1184 Federico Barbarossa el g'à consegnà ne le mane del Vescovo de Verona Ognibene dopo la paçe de Costansa, la roca, che l'è entrà cossita a far parte dei numarosi beni dei vescovili ne la zona. Nel 1207 se vede la cession de Legnago da parte dei Vescovi al Comune de Verona, in cambio de la giurisdission de Monteforte. Nel 1307 dopo Legnago anca Porto con la so Roca l'è stà crompà da Verona. Legnago vista la so posission strategica g'a sempre fato gola a tanti e nel 1230 i Padovani dopo aver conquistà e butà zò Porto i gà riservà el stesso tratamento a Legnago mentre nel 1232 i Legnaghesi i s'à ciapà la Roca de Porto. Poco tempo dopo s'a fato vivo anca Eselin da Roman ma Legnago dopo aver resistido, s'à consegnà ne le mane de Azzo d'Este nel 1256. Padova l'era aleada con la potente fameja dei Sambonifacio par conquistar Verona, fatalità Legnago s'a catà justo justo in meso a 'ste do realtà, cossita da 'ste parti l'è passà anca el Conte de Sambonifacio che parò 'isto el spirito indipendente che l'a caraterisà i legnaghesi nei secoli, l'è stà butà fora dal paese. Soto Mastino I de la Scala, un çerto Pulcinela de le Carceri con un grupo de dissidenti l'è andà a la conquista dei castei de Legnago, Vilafranca e Soave ma grassie a Gherardino da Pisa che'l guidava le trupe Scaligere, nel 1270 Legnago l'è deventà dei De la Scala. Soto Alberto De la Scala l'è deventà un importante çentro comercial de smistamento merci con Venesia traverso l'Adese e cossita l'è stà costruida una bela tor a guardia de l'Adese de fronte a le roche de Legnago e Porto, 'ndoe nel 1387, Antonio de la Scala el s'a rifugià durante la so fuga verso Venessia, dopo essar stà butà fora da Verona da Gian Galeazzo Visconti nei i ultimi momenti de vita de la signoria Scaligera. Grassie a la fedeltà dei Legnaghesi ai Visconti contro i Scaligeri, Gian Galeazzo el g'à concesso una bona autonomia a Legnago con el "Privilegium", dandoghe la possibilità ai legnaghesi de farse un Statuto, de nominar dei propi magistradi e de giudicar ogni causa civil e penal; privilegi confermadi dai Venessiadi nel 1406. Nel 1405 parò, solo Porto l'era stà conquistà dai Venessiani mentre Legnago s'à consegnà un par de mesi dopo a la Serenissima dimandando la conferma del Privilegio, concesso nel 1406 dal Doge Steno. Nel 1438 Legnago l'è passà ne le mane dei Milanesi fin al 1440 quando l'è ripassà ai Venessiani. Nel '500 l'è stà la 'olta de la Guera de Cambrai 'isto che Legnago l'era uno dei çentri de magior importansa strategica; cossita la fortessa legnaghese l'à cambià paron un fraco de 'olte, da l'imperador Massimilian, ai spagnoli e ai francesi par ritornar ai venessiani nel 1516 dopo nove ani. Le roche i era talmente messe mal che 'l Senato Venessian l'à preferido lassarle al so destin e nel 1517 Venessia l'à riconfermà i veci privilegi fasendo riscrivar i statuti e dando cossita la piena autonomia a Legnago destacandola da Verona. Diese ani dopo s'a scomincià a costruir de le nove fortificassioni con grandi opere a cura del Pignatello e de Michele Sanmicheli fasendo deventar Legnago una de le fortesse piassé importanti su la teraferma de la Republica Venessiana. Nel XVI secolo dopo aver ricostruido le case e aver risistemà el çentro devastà da le guere, s'a scomincià a sfrutar da novo la via comercial fluvial de l'Adese e a introdur le coltivassioni del riso e del formento. Dopo el periodo Venessian s'à alternà el dominio francese a quel austriaco e dal 1828 al 1855 jè stà restaurade, rinforsade e ricostruide le vecie fortificasioni soto l'Austria. Legnago con Verona, Mantoa e Peschiera l'era in 'sto periodo una de le çità del "Quadrilatero" un insieme de fortesse con grande strutura difensiva. Nel 1866 Legnago l'è passà soto a l'Italia e nel 1868 e nel 1882 le piene de l'Adese i a spacà fora tuto, case e 'l ponte in legno sostituido da uno in fero nel 1889 mentre nel 1888 tute le fortificassioni venessiane e austriache i è stà butà zò no lassando quasi gnente de 'ste opere. De la potensa militar de Legnago gh'è restà solo uno dei torioni de la roca arente al Duomo dedicà a San Martin Vescovo inissià nel 1779 e finida nel 1811. La césa de la Dissiplina inveçe l'è stà ricostruida al posto de un tempio del '300 e la conserva un dipinto del XIV secolo importantissimo par Legnago, 'na Madona con Butin conossuda anca come Maria de la Misericordia. A S.Piero de Legnago da visitar, la magnifica césa romanica de San Salvar che come ne dise 'n iscrission del 1127 l'è stà costruida par volontà de Matilde de Canossa, sui resti de 'na costrussion romana; drento se pol 'edar i afreschi del Dal Pozzo del XVI secolo e na 'tola con rafigurà la Madona. A Vangadiza la césa dedicà a la Natività de Maria sede fin dal X secolo de la potente Abazia dei Camaldolesi, l'è stà sgrandà col passar dei ani e la presenta drento le opere del Ridolfi e del Farinati. Da visitar assolutamente l'è el Museo Fioroni de Legnago con 'na bona colession de armi da l'alto medioevo ai giorni nostri, l'Archivio Storico de Legnago e 'na biblioteca publica, mentre nel Museo Archeologico ghe lì arente, se pol catar i reperti dei scavi fati ne la Bassa Veronese da l'epoca preistorica. Da segnalar le vile de San Piero de Legnago: Parma-Lavezzola del '500, Vila Rossato del 1695 con quatro torete e un bel parco a l'italiana, Vila Corrubbio con tor e merladura ghibelina oltre a un bel parco, Vila Giazara del '700 con balcon in stil baroco e capitei corinzi, Vila Moratello/La Ponzina con tor medioeval del '400; Vila Mezane conossuda fin dal 1368 a San Piero. Altre vile: Pompei con tor e costrussion del '500 a Vangadiza; Vila Zerbinato/I Santi abitada a partir dal 1750 da la fameja Giannella a Porto de Legnago; Vila Bertassello in località Albèro, casa colonica a corte con rusteghi; Vila La Piopa del 1696 a Porto de Legnago; Tra le persone famose gh'è de sicuro el grande Antonio Salieri (1750-1825) compositor a la Corte Imperial de Vienna, tanto famoso al ponto che, el teatro del comun el porta el so nome.