El teritorio de Malsésen, el parte da le aque del Lago de Garda par rampegarse fin a 2218 metri del Monte Baldo atraverso oliveti e costrusioni carateristiche, mentre el çentro storico l'è tra i più bei de la sponda lacustre veronese con el so carateristico stile medioeval. Un paesagio invidiabile se pol gustar con la funivia a cabine rotanti che partendo dal paese te porta fin a Tredes Pin a quota 1720 m su le greste del Baldo. Sul nome de Malcesine gh'è varie interpretasioni, gh'è ci dise che possa derivar da Manes Scilices "sepolcro dei morti" come scrito ne l' 844 da Arcidiacono Pacifico nel so testamento o dal latino medioeval Mala Silex, mal sasso fasendo riferimento al primo nucleo abitativo 'ndoe gh'è l'atual castel scaligero sora a un preón malfato. Un documento del’ 807 de la Biblioteca Capitolar de Verona che parla del trasporto dei ossi de San Zen da parte dei du santi eremiti Benigno e Caro, riporta in villam quae Malsesenum dicitur, quasi mala silex, che in latin vol dir «nel paese che si dice Malcesine, è come una cattiva pietra». "Malsésen" l'era abitada in epoca preistorica e sucessivamente in epoca romana come pol testimoniar le tombe e le monede de bronso e rame catade durante dei scavi. Documenti d'epoca i ne dise che nel 590 Childerico con un grosso esercito de Franchi, in una spedission contro el re dei longobardi Autari, l'avea distruto el castel de Ennamase che secondo i esperti l'è l'atual castel de Malcesine. Nel 774 dopo la disfata de l'ultimo re dei longobardi, Desiderio, el paese el passa soto Carlo Magno che ne l' 806 l'assegna a so fiol Pipino la gestion del Regno d'Italia con Verona capital. Nel 1145 Papa Eugenio III° riconosse l'esistensa de la roca de Malcesine con cése e con tuti i so beni. In documenti del 1193 e 1197 a Malcesine ghe vien riconossudo el dirito de usar propie misure e monede. Nel 1207 Alberto de la Scala nei famosi Statuti Albertini l'avea stabilido che tuti i castei i dovea passar soto el control de la çità, a parte sete, che l'a voludo tegnarse par lu e come nel caso de Malcesine modificandolo. Nel 1351 l'imperador Carlo IV de Boemia l'avea concesso a Mastino II de la Scala el Capitanado del lago con dirito de métar e cavar custodi e ufisiali. Questo l'è l'inissio de la Federasion Gardesana e del Capitanado del Lago (Gardesana de l'Aqua), costituida da 10 comuni lacustri, che la riusirà a resistar fin al 1802. Nel 1387 i Visconti i entra in Malcesine e nel 1405 i Venessiani. Dal 1508 al 1516 la zona Baldo-Lago l'è passà soto el dominio de l' imperador Massimilian d'Austria, par dopo tornar ancora soto Venesia. Dal 1796 i s'a alternado a Malsésen domini austriaçi e francesi par un pochi de ani, par finir in mane austriache fin al 1866 prima de passar soto el Regno d'Italia. Da visitar assolutamente l'è el Castel, simbolo de Malcesine con drento el magnifico Museo storico e ricordado anca par un fato curioso, quel capitado nel 1786 a Gothe, arestado da de le guardie convinte che fusse 'na spia dopo averlo visto ne le vicinanse in barca mentre el le disegnàa su n'album. Non se pol desmentegarse anca del Palasso dei Capitani costruido sora i resti romani e romanici a caval tra el XIII e 'l XIV secolo dai Scaligeri, passà a la fameja Mercanti e vendudo nel 1473 a Alessandro Miniscalchi. Comprà nel 1618 da Verona su invito de la Serenissima par farghe la dimora del Capitan del Lago. Nel 1902 come el castel l' è stà dichiarado monumento nasional. Da ricordar l'Antica Pieve e parochia de San Stefano 'ndoe jè conservadi i ossi dei santi eremiti Benigno e Caro e una pregevole tela de Girolamo Dai Libri. La césa de la Madona de la Fontana, 'ndoe in meso al paimento, soto un prèa retangolar, gh'è una vasca a la profondità de du metri con un aqua miracolosa. Inoltre la çésa de la Dissiplina, la césa dei SS.Nicolò e Roco (del '600). Ne le frassioni de Malcesine gavemo l'antica césa de Santa Maria de Navene, l'Eremo de San Zen in monte, la céseta milenaria e quela parochial del' 700 dedicada ai SS. Benigno e Caro a Casson. Da visitar, in quest' ultima frassion, sul longo lago, l'antico molin a vento e l'Aril el fiume più curto del mondo con i so 175 m.