Comune nel cor de la Valpolesela tra la val de Fumane e quela de Negrar conossudo anca come "La Césa" e con sede municipal in contrà Porta. Nel teritorio numarosi jè stà i reperti archeologiçi catadi come le folende, ceramiche, ossi, bronsi de epoca preistorica a Ravazzol, Boschetti, Monte Castelon, San Rocco, Pizzol, Monte Per, Castel Besin, Monte Noroni, Mondrago, Porcarola e Ciacalda, Covolo dei Pani ora in esposission al Museo de Verona, al Museo de Sant'Ana d'Alfaedo e a la Soraintendesa a le Antichità de le Venesie. Scavi inissiadi ne l'800 da Stefano de Stefani e portà avanti da Olindo Falsirol, Raffaello Battaglia, Francesco Zorzi, Luciano Salzani e Leone Fasani. Sul Monte Castelon de origine vulcanica, l'omo l'è sempre stà presente da l'epoca preistorica fin al medioevo come ne pol dimostrar i resti de un castelier de l'Età del Fero, costrussioni romane e una fortificassion medioeval. E sempre sul Castelon 'ndoe 'desso gh'è el Santuario de Santa Maria Valverde, se vede i segni de un tempio roman dedicà a Minerva, in pratica l'era un importante çentro pagano e religioso non solo de la val ma de tuta la Valpolesela, in quel tempo "Pagus" dei Arusnati. Infati fin a poco tempo fa la frassion San Roco, poco distante dal "tempio", l'era ciamà "San Roco de Minerbe". Nel XIII secolo el castel 'isto in precedensa, l'era feudo del Conte de la Valpolesela, Federico De la Scala cusin de Cangrande; ma nel 1325 quando Federico l'à proà a spodestar Cangrande che nel fratempo l'era malà, l'è stà sconfito e mandà in esilio con la so fameja, butandoghe zò el castel. Nel testamento del 1339, Federico el ricorda la sovranità che'l g'à avù ne la val "Iaborerium castri mei Marani" e tuto el formento restà da 'na parte ne la Valpolesela. Nel '400 el Castel de Maran el vien ricordà ne l'elenco de "Castra Veronae" e durante 'na visita pastoral de Ermolao Barbaro la césa de Santa Maria de Minerbe la se cata in "in Valleversa sive in castro". Secondo 'na legenda el castel el g'avea origini piassé antiche; nel 102 a.C. el console roman Mario che l'avea vinto contro i Cimbri ne la bataja dei Campi Raudi el s'à fermà a Verona e portà in trionfo dai Veronesi, decidendo subito dopo de costruir un castel in Valpolesela, che vegnarà ciamà "Mariano" in so onor. Gh'è ci dise che el nome del paese el possa derivar da 'sta fola, piassé probabile che un çerto Marius el g'avesse dei tereni de propietà "Marianum". Dopo i Scaligeri l'è stà la 'olta dei Venessiani, cossita Maran l'è stà le dipendense del Vicariado de la Valpolesela con sede a San Piero in Carian. A parte la peste del 1576 e del 1630 la vita soto la Serenissima l'è andà avanti in tuta tranquilità. In 'sto periodo se vede la nàssita de numarose vile come Vila Guantieri a Fasanara con portego, losa e tor colombara, mentre el nucleo çentral l'è del '400, afreschi e decorassioni del '500; a Canzago del '700 gh'è Vila Lorenzi e la maestosa Vila Rizzini con Oratorio de San Carlo. Altre vile interessanti a Valgatara de l'800 Graziani, Raisa-Rimini e Silvestri. Nel XIX secolo da segnalar, soto al dominio francese Maran l'è stà assegnà al Canton de San Piero in Carian, da contar anca la presensa austriaca e nel 1866 sto comun l'è entrà a far parte del Regno d'Italia. Tra le cése da segnalar la ceséta del XIII secolo in località Pozzo, arente a la frassion Valgatara, dedicà a San Marco con afreschi de l'epoca e con tochi de piera de origine romana; a Valgatara la parochial dedicà ai Santi Fermo e Rustico del XVII secolo e sgrandà nel'800 e '900; a Maran la césa parochial dedicà a San Piero e Paolo del '900 con arente la vecia césa del '700; el Santuario de Santa Maria Valverde sul Monte Castelon el g'à origini antiche come ne dise un documento del 1184 S.Maria Menervii. L'atual Santuario l'è del 1682 come dise l'iscrission su l'altar magior, mentre la statua lignea de la Madona col Butin che i dise la sia miracolosa l'è stà costruida nel 1516 da la Compagnia de Santa Maria de Valverde del Castel de Maran; a Puran l'Oratorio de San Giorgio ricordà in documenti del '400, con drento 'na pala con rafigurà "San Giorgio che'l copa el drago" segnalà nel 1699, e 'na statua de San Gioani Nep. documentà dal 1764. Se ve piase el vin, Ve convien far 'n salto da ste parti par béar un bon Recioto vardando el magnifico paesagio quando i siresari jè in fior.