Tra la Val Squaranto e quela de Ilasi, se cata Messane e la so splendida val costituida da tri nuclei importanti Castagnè (con Pian de Castagnè, Gugi, Val de Castagnè e un poche de case), Messane de Sora (con Capovila, Postuman, Dosso, Sul Vago, Torasine e altre contrà), Messane de Soto (con Casal, Casoni, Frata, Lione, Malevesina,e un poche de altre località). Partendo dal fondo val, soto i 100 m de altessa se ariva fin a quota 600, passando da la coltivassion de l'ua e de l'olivo al bosco e al pascolo lessinico. Essendo traversàda da un bel pochi de corsi d'aqua, la presensa de l'omo in questa val l'è antica, fin dai tempi de la preistoria. Infati in località Casal Farinati a Messane de Soto, i è stà catadi reperti del Paleolitico Medio e del Neolitico. De epoca romana: 'n ara dedicà a Giove e a Silvano catà a Messane de Soto; copi, quarei e contenidori par el vin catà in località Ruini; tombe nel fondo "La Tor" con compasso e moneda de Galieno; nel 1949 scoerti in contrà Torcolo quarei, 'na luserna e un cameo; nel 1954 durante i scavi in contrà Fiui jè vegnudi a la luçe muri, pavimenti a mosaico e altri materiale da costrussion; in contrà Guaite un bel mucio de monede del Basso Impero; a Castagnè gh'è murà nel campanil du frontoni de stele funerarie. Storicamente, in 'sto periodo, da Messane ghe passava la Via Cara, importante via de comunicassion e de passajo par caréti e bestiame bovin e cavrin, che la partìa dal setimo mïo roman de la Via Postumia a l'altessa de Vago de Lavagno e longo la dorsal l'arivàa in Lessinia. Durante el medioevo la zona la fasea parte dei possedimenti dei Vescovi de Verona, come ne dise el privilegio papal del 1145 "Pieve di Mezzane cum cappellis et decimis et castello at familiis". Nel X secolo se sente parlar par la prima 'olta de "Castagnè in finibus veronensis in valle Pretoriense" mentre un secolo dopo vien stipulà un contrato da tri abitanti in "loco Castanedo". Nel XII secolo el compare inveçe el toponimo de Messane ben distinto, Mezane de Subtu, in Mezane de Supra, con la zonta de Postumanus. Durante la Serenissima la zona l'è deventà sogiorno estivo par le nobili fameje veronesi, infati in paese podemo catar la splendide vile afrescade del '700, la Maffei (opere de Andrea Porta del 1786) e la Roja-Schiavoni con stupendo parco; da segnalar la più antica vila de la zona la Giuliari con tor e pòrtego del '400 e palasso del XVI secolo. Drento podemo amirar un afresco de la scola del Farinati e statue del '700 de Angelo Sartori; 'pena fora Messane, vila Della Torre se presenta come 'na costrussion su du piani con losa in stile paladian con drento afreschi del Farinati. El piassé antico monumento del paese l'è sensa dubio la tor campanaria romanica del XII secolo de la pieve andà in roina, ricordà ne la bola de papa Eugenio III nel 1145; la pieve de Santa Maria Assunta l'è stà costruida in seguito in posission piassé alta tra el 1871 e 'l 1889 su disegno del Gottardi e consacrà el 19 setembre del 1936. Drento a 'sta césa parochial gh'è un fraco de opere d'arte de la vecia césa: una pala d'altar de Gerolamo da Libri, altre pale de Antonio Giarola con i Santi Francesco e Carlo Borromeo, de Claudio Ridolfi e par finir Gioani Caliari con Cristo Crocefisso con arente la Vergine e San Gioani. A Messane de Sora da 'ndoe ghe una magnifica 'ista su la val podemo farghe 'na visita a la parochial dedicà ai Santi Fermo e Rustico del XVIII secolo costruida su n'altra césa del '400; drento gh'è le tele de Ugolini, P. Farinati e Santa Prunati e na fonte batesimal del '400 opera de Bartolomeo da Massa mentre el campanil l'è del 1768. Ne la frassion Castagnè gh'è la césa del '700, parochia con rector nel 1529, dedicà a San Ulderico con tele de l'Orbeto e del Ridolfi. Ne l'altra frassion Postuman inveçe gh'è la césa dedicada a San Nicola da Bari. Par finir a Messane de Soto podemo farghe 'na visita a un capitel del 1353 con un bassorilievo de la Madona con Butin. Foto: Messane de Sora, San Fermo e Rustico