Comune de la Bassa Veronese a 41 chilometri da Verona con le frassioni Anson, San Stefano, San Zen (Zenone) e Strepola Stopazzole (Stoppazzole). Minerbe la g'à origini pre-romaniche e 'l so nome el deriva da "Vicus Minervinus" par la presensa de un tempio pagan dedicado a la Dea Minerva. Infati ne la frassion de San Zenone l'è stà costruida la césa omonima propio sora al tempio (ghe resta solo l'epigrafe esposta su'l muro esterno de la césa atual) par ricordar el Vescovo Zeno che l'à portado el cristianesimo nel paese. El teritorio l'è abitado fin da l' Epoca Paleoveneta come ne dimostra le tombe catade ne la necropoli de Compagnina e 'l monumento funebre de Lucilio de la tribù Romilia oltre a ucie, fibule, bracialeti con decorassioni in bronso. De epoca romana jè alcune tombe romane, du vaseti, anfore, biceri de vero, du vaseti e tri monede in bronso catadi duante dei laori agricoli nel 1934 in località Ponte Alto. Storicamente Minerbe l'è stà de propietà de la curia veronese che el l'à concessa in feudo al monastero de San Michel de Campagna fin al 1199 quando l'è deventà comune con podestà. Con l'afermassion dei Scaligeri, el paese l'è deventà Vicariado dei Conti Bevilacqua con possibilità de trasmission ereditaria ai dissendenti, titolo confermado nel 1406 dal doge Steno de la Serenissima Republica de Venesia. Numarose jè stà i sachegi e le devastassioni come quele del 1385 par opera de Franceschino de Caldonazzo, nel 1407 un poche de bande de farabuti le à messo soto sora el paese con la conseguente astension dal pagamento de le tasse su ordine de Venessia par çinque ani, nel 1509 durante la guera de Cambrai e infine nel 1776 la piena de l'Adese che par secoli l'è stà la disperassion dei minerbesi. Nel 1866 soto el Regno d'Italia el paese l'è riussido a riciaparse un poco da le devastassioni con la noa fioridura de l'artigianado e l'agricoltura. Tra le cése, da segnalar la césa parochial de San Lorenso del 1848-49 a tri navade con çinque altari par parte e un campanil a sié campane del 1859. Sora l'arco de la porta çentral gh'è la statua del santo patron del paese mentre drento se pol amirar i dipinti de Antonio Rebustini con la rapresentasion de un pochi de miracoli. La césa de Santa Lussia con fasada in stile neoclassico e un altar baroco l'è del XIV-XV secolo. Tra i primi documenti da segnalar la visita del Vescovo Giberti nel 1526 a la césa e al'ospedal li tacà, dedicado a San Roco e Bastian. Ne la frassion San Stefano, da visitar la ceséta omonima, visitada più 'olte dal Vescovo Giberti tra el 1526 e 'l 1541 e che la dipendea inissialmente da l'abassia de San Gabriele de Cremona; inveçe la ceséta de la "Maternità de Maria" del 1858 la se cata ne la frassion Anson. Par finir una tra le cése più antiche de la provincia veronese dedicada al "Vescovo moro", che l'esisteva za prima del X secolo, la se cata ne la frassion de San Zenone come dito in precedensa. Nominada come "pieve" nel 1035 l'è ricordà ne la bola de Papa Eugenio III del 6 dugno 1145 "Plebem Sancti Zenonis cum capellis et decimis et curte" e citada in un diploma de l'imperador Federico I del 1155. La césa atual l'è stà costruida nel 1818 e consacrada nel 1873 con fasada in stile neobaroco su disegno de l'architeto Gioani Salvi completada nel 1938. In più se pol amirar una stupenda fonte batesimal de forma otagonal del 1454. Tra le i palassi e le vile, da segnalar Palasso Beghinatus del 1705 dichiarà monumento nassional, el Palasso "La Losa" una 'olta sede municipal, Vila Spolverini "El Palasson" del XIV secolo con afreschi e sofiti in legno piturà, Vila Burzio del XIV secolo, Vila Leopardi del 1700 mente ne la frassion de San Stefano gh'è Vila Visconti 'na 'olta residensa dei Visconti de Milan del XVII-XVIII secolo. In località Anson la Vila Spolverini-Buri-Bernini in stile Veneto, Vila Guariente "Aliata" e par finir Vila Angiari ora sede del municipio de Minerbe. Numarose jè le corti come la Bernini-Cavazzocca "La Colombara", Domaglia, Corte Somaglia. Da visitar in zona Campegio el Molin Rebustini uno tra i più antichi e ancora in funsion de Minerbe.