Comune de la Val d'Alpon sul confine con la provincia de Vicensa e traversà dal progno Alpon che'l se butà ne l'Adese a l'altessa de Albaredo. Quasi sicuramente l'origine del çentro abitado l'è romana, come i pol testimoniar i tochi de costrussioni, lapidi e iscrissioni catade nel teritorio de la vecia "Monteculeta" ancò Montécia. El primo documento storico che'l parla de Montécia l'è del 951 quando el teritorio l'è deventà dei Vescovi de Vicensa, concesso col tempo in feudo ai Maltraversi verso la fin del X secolo. In 'sto periodo nasse el vilaio fortificado fato come un castel, ne la zona de la frassion atual Castel in colina e se vede in un documento del 1076 i toponimi Montecleda/Monteclida che i deriva da Monscleda infati i abitanti i vien ciamadi Monscledensi o Montescledensi. Toponimo che podarìa averghe el stesso significado de quel dei abitanti de Schio (Vi) ciamadi Scledensi, da aesculetum = bosco de leci in 'sto caso monte de leci. Verso la metà del XII secolo i vesentini par contrastar Padoa i à dimandà aiuto a Verona regalandoghe in cambio Cologna e Montécia. E sempre in 'sto secolo grandi lote tra Guelfi e Ghibelini con robarìe e fogo al castel. Durante el dominio scaligero anca Montécia l'à contribuido par la costrussion del palasso de giustissia de Soave, e propio in 'sto periodo el castel l'è stà butà zo da Vinciguerra Sanbonifacio in lota coi Scaligeri. Nel '400 Maltraverso dei Maltraversi l'à fato costruir un ospedal ne la casa che'l g'avea in Cà Castel deventà col tempo 'na semplice casa de campagna. Dopo le dominassioni dei Visconti e dei Cararesi, nel 1439 l'è stà la 'olta de la bataja de Bastia tra i milanesi con Nicolò Piccinino sconfiti da i venessiani con a capo Giovanni Pompei. Durante la Lega de Cambray da segnalar qualche bataja nel teritorio e nei secoli dopo qualche episodio secondario sia coi francesi che con i austriaci. Nel teritorio, da segnalar dal ponto de vista idrico, anca el corso d'aqua Vienega che'l nasse da la sorgente che gh'è de drio a la césa parochial e se buta ne l'Alpon. Tra le cése non podemo non parlar de quela dedicà a San Salvator del X secolo tacà al çimitero de Castel, con statue in legno, afreschi del tri e quatrosento e tochi de piera de epoca romana come colone e capitei. El campanil e le absidi ne la cripta jè ancora originali anca se ghe stà un fraco de modifiche nel corso dei ani a la césa. De fora podemo 'edar 'na scrita del XII secolo che la ne parla de la donassion de Uberto Maltraversi a la césa. Poco distante se pol catar la ceséta dei Santi Piero e Biagio del '600. Da ricordar la parochial de Santa Maria, progetada da Bartolomeo Giuliari e costruida nel XIX al posto de la vecia pieve. Tra le residense nobiliari dei patrissi venesiani ghe Vila Sapori e 'l Casteleto. Montécia 'na 'olta l'era famosa par le cave de basalto, ancò l'è conossuda par le sirése e la produssion dei vini Soave e Durel.