Monteforte, comun de la Val d'Alpon con le frassioni Brognoligo, Costalonga e Sarmaza al confin con la provincia de Vicensa. Sul Monte Zopega tra Soave e Monteforte jè stà rinvegnudi de reperti preistoriçi de l'Età del Bronso e del Fero come scudele e vasi mentre sul col de Sant'Antonio nel 1953 dei vasi de teracota. De epoca romana, tegnendo conto che el teritorio de Monteforte l'era traversà da la Via Postumia, jè stà catà 'ndoe 'desso gh'è la césa de Santa Crose dei copi e tochi de costrussioni mentre in località Fossa Dragon 'na tomba e monede de l'Impero Roman. Sicuramente l'è in 'sta epoca, che 'l paese l'è stà fondà sicuramente sul col 'ndoe 'desso gh'è la céseta de Sant'Antonio par tegnér d'ocio l'importante l'arteria romana dal de sora con 'na fortificassion. E propio in 'sta zona che nel X secolo a causa de le invasioni dei Ungari, el grande Re Berengario l'avea concesso la costrussion de un opera de difesa. La roca nel XII l'è andà a finir ne le mane de la fameja dei Sambonifacio e grassie a Federico Barbarossa ai Vescovi de Verona fin a l'arivo de Napoleon. Con l'arivo dei Scaligeri se vede le prime bataje vista la vicinansa con Soave, infati un çerto Vinciguera Sambonifacio l'à rebaltà el paese soto sora a l'inissio del '300 e nel 1338 Orlando de Rossi capitan de l'esercito Venessian l'à messo a fero e fogo el paese. Dopo i Scaligeri, Monteforte d'Alpon l'è passà ai Venessiani lassando cossita come stà, l'aministrassion. E propio soto la Serenissima nel XVI secolo Monteforte l'è stà coinvolto ne le bataje con la Lega de Cambrai. Nel XIX secolo jè passadi i eserciti austriaçi e francesi come nel resto de la provincia veronese. Tra le cése da segnalar quela de Sant'Antonio costruida sui resti del castel ancora visibili, la presenta un "Cristo Moro" in legno del XVI secolo; la césa parochial dedicà a Santa Maria Magior costruida a partir dal 1805 su disegno de Bartolomeo Giuliari, ghe stà zontà el pronao nel 1868 e l'è stà finida con le decorasioni de Gioani Bevilaqua nel 1904. Decorassioni mortali parché nel 1903 jè vegnudi zò malamente da le impalacadure Giusepe Zannoni e M. Rancani. Tra el 1894 e 1897 inveçe l'è stà costruì el campanil considerà el piassé alto de la provincia Veronese (70 m circa). Drentro la césa podemo amira 'na tela del '500 de Girolamo Dai Libri la "Samaritana al posso" e 'na "Visitassion" de Gioani Caliari. Altra césa l'è quela de Santa Maria Fossa Dragon del XV secolo al confin de la parochia con afreschi del '300-'400 e 'ndoe nel 1567 jè rivè i Capucini restadi fin a l'800. Da un documento del 1473 risulta che arente la césa gh'era un romitorio. A Sarmaza gh'è l'antica césa de Santa Crose con afreschi del '300 mentre a Brognoligo gh'è la césa de San Stefano del 1838-41. Arente a la césa parochial de Monteforte gh'è el Palasso Vescovil del XIV secolo con cortil interno con portego a colone in marmo rosso e ne la capela podemo catàr 'na pala del '500 del Caroto: " ...il palazzo è un bell'esempio di quelle creazioni piene di buon gusto proprie di quest'epoca, dove tutto, dai camini alle scale, alle porte, riceveva un'impronta caratteristica. Dappertutto è profuso l'anello gentilizio dei Barbaro... Un bel saggio della costruzione interna si può avere nelle stanze al piano terra, ove ancor si vedono volte a vela che hanno per chiave lo stemma Barbaro, porticine con mensole a foglia..." (L.Simeoni). A a genàr prima de inissiar la corsa podistica "Montefortiana" tra le piassé conossude al mondo, podì bear un goto de vin Soave Classico (che ne la zona l'è bon) a la nostra salute!