Ultimo Comun del Veronese al confin con la provincia de Mantoa, a 21 chilometri in diression sud-ovest da Verona con le frassioni Gressan, Quistel, San Zen, Tormine. L'omo l'è presente a Mossecan fin dal'Età del Bronso come pol dimostrarne i resti catà a Boscheto de Gressan e Tormine, mentre del periodo roman jè vegnù a la luçe tombe, monede e mosaiçi, sensa parò desmentegarse che da 'ste parti ghe passava la Via Postumia in diression Verona, verta nel 148 a.C. Dopo la fin de l'impero roman l'è stà el turno de Longobardi e Franchi come da documenti tra el IX e 'l XI secolo, 'ndoe vien parlà de cambi de propietà in San Zen in Mosso (it. Mozzo) tra i sconfiti Longobardi e i novi ocupanti. Altri documenti del IX secolo i parla de la frassion Tormine de sicura origine romana come ne dise el nome che'l deriva da "Terminus" paese de confin. Mentre ne la bola de Papa Eugenio III se parla de l'esistensa de la pieve de Gressan (it. Grezzano dal latin Graecius) "Plebem de Gregiano cum capellis et decimis et curte". El toponimo Mossecan (it. Mozzecane) el deriva da un çerto "Mucio Cane", che l'era riussido a farse dar in concession dei tereni dal Comun de Verona nel 1202 ne la "Campanea Maior", area de campagna usada dai çitadini par el ben de tuti. Nel 1206 "Mucius Canis" el risulta morto e i so dissendenti i vien ciamadi "de Mucio Cane" col tempo "Muciis Canibus" e "Moçecanis". Ma el fato storico piassé importante l'è quel del 1226 quando i rapresentanti de le importanti çità del nord Italia i s'à riunì ne la ceséta de San Zen in Modio par rinovar de altri 25 ani l'antica lega Lombarda contro Eselin e l'amigo imperador Federico II. Dopo numarose lote tra veronesi e Mantoani, San Zen in Mozzo e Gressan i era tra i feudi Scaligeri. Dopo i De la Scala, l'è stà el turno par un pochi de ani de Visconti e Cararesi prima de la rivàr nel 1405 al periodo Venessian. Nel 1414 Simone de Canossa dopo aver combatù par la Republica de Venessia l'è riussì averghe el teritorio de Gressan 'ndoe l'è stà costruido el palasso de fameja mentre poco tempo dopo S.Zen in Mosso l'è deventà propietà de Jacopo dal Verme e Mossecan un Vicariado autonomo. In 'sto periodo de tranquilità jè stà bonificadi i tereni impaludé e jè scomincià le coltivassioni del gelso, de cavaleri e del riso, dando un forte urton a l'economia local. A parte la peste nel 1630 che l'à somenà morte in tuto el teritorio, le dominassioni de l'800 austriache e francesi, e l'union de i quatro comuni Gressan, Mossecan, San Zen in Mosso in uno sol no gh'è particolari eventi da segnalar. Tra le cése da segnalar quela de San Zen in Mosso (da "modio", in italian "moggio" unità de misura agraria corisp. a 146 litri in Lombardia) parochia autonoma nel 1530, rifata nel 1770 par l'intervento de Conti Miniscalchi; la parochial del XVIII secolo a Mossecan dedicà a San Piero e Paolo 'ndoe gh'è conservà 'na tela de Gerolamo Andrioli con rafigurà la "Strage dei Inoçenti" piturà sora a 'n opera de la scola del Mantegna;. sempre del '700 l'è la parochial de Tormine dedicà a Sant' Antonio Abate mentre del 1682 l'è quela atual de Gressan fata ricostruir da Luigi Canossa. Da segnalar el simbolo de Mossecan Palasso Canossa costruido nel XVI secolo su disegno de Michele Sanmicheli e finìo nel XVIII secolo soto la diression de l'architeto Cristofali. E par finir Palasso Ruffini del '600 realisà dal Cristofali e de propietà prima de la fameja Vecelli e dopo dei marchesi Cavriani de Mantoa, 'ndoe nel 1821 durante el Congresso de Verona l'era ospite Ferdinando I° Re de le Do Sicilie mentre nel 1860 i austriaçi i l'à fato deventar caserma e ospedal.