Importante Comun de la Valpolesela con le frassioni Arbissan, Fane, Montecio, Massan, Noare, Prun, San Vito, Santa Maria, San Pereto, Torbe. El teritorio che'l parte dai 83 m.s.l.m. de Arbissan e se rampega fin ai 750 m de località S-ciopo de Fane, l'è stà abità da l'omo fin da la preistoria, come pol testimoniar i reperti del Paleolitico ne la zona tra Montecio e Monterico o quei de l'Età del Rame in località Colombare. In epoca romana el teritorio de Negrar (Toponimo Negrar dal tardo Latino nigrarius, "logo con tera nera" o da nux=nosa) el fasea parte del "Pagus" dei Arusnati, popolassion forse de origine celtica o etrusca che prima de l'arivo dei romani l'avea catà casa in Valpolesela. Du iscrissioni latine jè vegnude a la luçe a Massan (Mazzano) e le documenta el culto a Giove, mentre grassie a un poche de iscrissioni rinvegnude a Arbissan e a de le tombe catà a Negrar, podemo saver con sicuressa che la zona l'era la residensa de le fameje Clodia, Cassia, Arria e Valeria; del III sec. d.C. l'è la pavimentassion a mosaico de 'na vila ne la località omonima conservà al Museo Archeologico de Verona, mentre a Nòare un toco de aquedoto roman a session triangolar. Nel medioevo la zona de Negrar l'è stà ocupà dai Longobardi, infati nel çentro del paese l'è stà rinvegnuda 'na tomba de 'n omo del VI secolo con scudo troncoconico e 'na spada oltre a 'na "fibula" a forma de colomba, sempre de epoca longobarda. Le prime testimonianse scrite su la val Veriacus che la dovea corispondar a l'atual val de Negrar jè del 838 e 844 d.C. - Dal 1000 d.C. gh'è stà un bel aumento demografico dando sempre piassé magior importansa ai çentri abità, caraterisadi da la presensa de una signoria, come pol dimostrarne le testimonianse su i castei nati a Negrar, San Vito, Rosele, Fane e Arbissan (Albucius); cossita un secolo dopo, Negrar con la so pieve intitolà a San Martin l'è deventà Comun. Del 1166 l'è l'iscrission latina de 64 righe sul campanil, che la ne parla de un pochi de contrati in "Communitas Vallis Nigrarii". Nel 1184 ne la val de Negrar i era presenti le comunità de Fane, Prun, Massan, Torbe e Capavo, Negrar e Sergiago, San Vito, Nòare, Arbissan con importanti funsioni aministrative. Da segnalar che i beni de Prun con pieve e castel nel XII secolo i era de propietà del Capitolo de Verona, el feudo de Capavo con castel l'è stà regalà nel 1090 al Monastero de San Zen mentre el castel de San Vito nel XIII secolo l'è passà sempre dal stesso Monastero al libaro Comun de San Vito. Nel 1238 el Comune de Negrar l'à scrito uno Statuto par la difesa del teritorio, 'ndoe tuti i abitanti i dovea far servissi de guardia, a causa de numarose guere civili. Quando iè rivà i Scaligeri verso el 1311 Negrar l'è entrà a far parte de la giurisdission de la Valpolesela infeudà a Federico de la Scala fin al 1325, e s'à 'isto la nassita de corti con tori colombare e lo svilupo de l'agricoltura con ua, olivi e cereali. Dopo el periodo dei Visconti e dei Cararesi, la Valpolesela l'è stà el primo distreto a sotometarse ai Venessiani dopo la conquista de Verona, con in cambio, la riconferma dei privilegi e de le concessioni scaligere. Soto la Serenissima, Negrar fasea parte del Vicariado de la Valpolesela, a capo de un "pievadego" (le altre do pievi i era San Fioran e San Giorgio) composto dai comuni de Negrar, Arbissan, Nòare, San Vito, Torbe, Prun, Massan e Fane. Grassie a la visita del Vescovo Ermolao nel 1458 semo vegnudi a conossensa de le nove cése presenti nel teritorio de Negrar: San Pol a Prun, Sant'Antonino a Fane, San Piero a Torbe, San Marco a Massan, Santa Maria in Progno, Santa Maria de Moron, San Vito che la dipendea dal Monastero de San Zen, San Gioani Batista a Cerna e San Martin a Negrar mentre quela de Arbissan no l'è stà visità. Con le visite pastorali del Vescovo Giberti 1530 e 1532 vien documentà che i abitanti in tuta la val i era quasi 2300 e par colpa de la peste nel 1576 i era deventà 1568 (altra peste nel 1630). Nel 1538 a Torbe e Prun funsionava ben diese molini, a Negrar nove, mentre a San Vito e Arbissan çinque. Nel XVI secolo a parte l'agricoltura, l'era importante l'estrassion de la piera de Prun utilisà par la costrussion de case, aredamenti e corti, infati grassie anca a le nobili fameje veronesi rivà da la çità come i Panzani, i Rattis, i Righetti, i Boldieri e a quele zà presenti sul teritorio, gh'è stà 'na corsa par cromparse un teren par costruirghe 'na vila (quasi tute con portego). Nel 1746 da 'ste parti jè passadi i soldà todeschi e nel 1780 Venessia l'avea concesso a Negrar de far el marcà setimanal "di soli animali d'ogni sorte", concession confermà nel 1791, quando l'è stà costruida la colona col leon alà arente a la césa parochial. Quando l'è rivà Napoleon l'è stà scancelà el Vicariado e nel 1807 Negrar l'è stà messo nel canton de San Piero in Carian mentre nel 1815 l'è deventà comun con soto le frassioni de Fane, Massan, Prun, Torbe, San Vito, inveçe Arbissan el fasea comun da solo unido a Parona e Nòare. Nel 1871 Prun l'è deventa Comun autonomo ma nel 1929 l'è ritornà soto Negrar, stessa sorte par Arbissan nel 1927. Tra le cése da segnalar quela de Arbissan antica Pieve ricordà da Papa Eugenio III nel 1145, dedicà a San Piero Apostolo e costruida verso la fin del XVII secolo sora ai resti romanici de la vecia césa e relativa canonica de cui podemo amirar ancora el fantastico portal del XIII secolo, scrite, lapidi e tochi de piera. Drento gh'è conservà un fonte batesimal, un tritico del '300 e un bassorilievo mentre el campanil rifato piassé 'olte nel XVI secolo l'è stà butà zò e sostituido da quel novo nel 1936. Da 'na scrita piturà drento la fassada fasea risalir la césa al 417 al tempo del Vescovo San petronio. A Santa Maria in Progno podemo catàr l'antico Santuario de la Madona del Carmine del XVII secolo 'ndoe ghe conservà le pale de Domenico Brusasorsi e Marcantonio Bassetti. A San Pereto la césa de San Piero Apostolo de origine romanica. A Massan la césa parochial dedicà a San Marco Evangelista costruido sora a un tempio pagan dedicà a Giove. Ne la césa de Prun dedicà a San Pol che nel XII secolo fasea parte dei possedimenti del Capitolo de la Catedral de Verona, podemo amirar du tele de Paolo Farinati. La piassé importante tra le cése de 'sto teritorio l'è sicuramente quela de San Martin a Negrar del XII secolo ma ricostruida ne la version atual ne l'800. De l'antica pieve gh'è restà el campanil usà nel 1238 come tor de guardia come previsto da uno Statuto. La parochial dei Santi Giorgio e Antonio a Fane del 1781 rifata sora 'na vecia capela, conserva statue e 'na pala con rafigurà San Giorgio del 1822 de A.Ugolini. La césa parochial de Montecio de la Maternità de la Vergine l'è del XVIII secolo con afreschi de Gaetano Miolato e Giuseppe Resi. De la vecia ceséta romanica del XII secolo de San Vito, gh'è restà solo el magnifico campanil, mentre quela atual l'è del 1806. A Moron documentà dal 1222 gh'è bela ceséta afrescà de Santa Maria. Tra le vile da segnalar la Bertoldi "El Palasso" del '400 con portego, modificà nel XVII secolo; l'elegante vila La Sorte fata costruir dai Conti Noris nel XVII secolo con giardin e statue del '700; a Poiega opera del Trezza, l'è Vila Rizzardi del XVII secolo, con giardin a l'italiana e rifata nel XIX secolo; Vila Salvatera a Prun del '500 con losa e colombara; a Torbe gh'è Casa Quintarelli originaria del XIV secolo, con portego e colombara; a San Vito del '600 gh'è Vila Biscardo con drento campanil romanico (vedi sora); ne la frassion Arbissan podemo 'edar Vila Messadaglia del '700, Vila ex Verità elegante con portego e colombara, Vila Zamboni del XVI secolo con portego e archi, Vila ex Albertini del XIX secolo da la forma sempliçe; a Novare la grandiosa vila Mosconi Bertani del 1759. De personagi famose g'avemo "el siensa" politico e leterado Luigi Messedaglia e la fameja del grande scritor Emilio Salgari. E par ci ghe piase far quatro passi in meso a la natura consiliemo de visitar la Sengia Sbusa a 595 metri, tor de piera "sbusà" da 'na grota usà dai eremiti. E alora ne resta che saludarse fasendo un brindisi con un gosso de vin Recioto, l'Acinaticum dei romani o con un bon Amaron. Foto: Parochial de Montecio