Comun de la Bassa Veronese, traversà dal fiume Tartaro e posissionà a 'na trentina de chilometri in diression sud da Verona. El toponimo Nogara i dise che, con tuta probabilità, el vegna da Nucaria, Nucula, Nux, logo coltivà da albari de nose che un tempo i querzea la zona fin al medioevo. L'òmo l'è presente in 'sto teritorio fin da la preistoria come pol dimostrar i reperti de l'età del Bronso riferidi a la çiviltà teramaricola che vivea su le palafite sul Tartaro, le sepolture in località Mota e altra roba vegnuda a la luçe a Montalto, Guja, Martina de Val Bissara, Ecce Homo, Molin de Sora e de Soto, Bel Camin e Olmo. Col tempo ghè stà anca etruschi e soratuto romani che i à fato passar la famosa strada Claudia Augusta propio da Nogara, 'ndoe la se incrosava con la strada "Vicinalis". Tra i reperti del periodo roman da segnalar tri steli del I secolo d.C. de la gens Truttedia con relativi ritrati de fameja su la fasada de la ceséta de San Gregorio Magno a Campalan. El primo documento scrito su Nogara l'è del 905, quando re Berengario el gà regalà al diacono Audiberto 'na parte del bosco tra el Po e 'l Tartaro ciamà Silva Hostilia e 'na Capela dedicà a San Piero, mentre nel 906 el g'à concesso, come scrito nel documento denominà "Concessionis preceptum" de costruir un castel "Castrum nogariae" par difendarse da le invasioni de i Ungari. La Capela de San Piero in poco tempo l'era deventà pieve e sede de un convento che a metà del XII el risultava tra i possessi de la famosa Abassia de Nonantola. El castel l'era possissionà arente al fiume Tartaro tra la corte de i du Roari "Duae robores" e Vila Tulian e g'avea drento la césa de San Silvestro. Nel 1090 l'imperador Enrico IV 'isto la posission strategica de Nogara l'à tacà el castel e relativo feudo gestido da Matilde de Canossa ma perdendo de bruto. Dopo el Barbarossa e 'l periodo con morte e distrussion da parte de Eselin Da Roman l'è stà el turno dei Scaligeri che jà portà paçe e tranquilità in quei paesi che nei ultimi secoli i era stà messi a fero e fogo. Prima parò de entrar nel periodo venessian, da registrar, el passajo dei Visconti e dei Cararesi. El primo periodo soto la Republica de Venessia no l'è stà façile par Nogara, 'isto i numarosi scontri tra venessiani e le trupe de Filipo Maria Visconti. Nel 1509 i Spagnoi de la Lega de Cambrai i à tacà fogo al castel fansendolo cascar in roina. Dal 1517 fin a la fin del XVIII secolo, a parte la peste portà dai Lansichenechi, soto i Venessiani no se stava mal; dal ponto de 'ista aministratitivo Nogara l'era capo de un Vicariato con soto Bonferar, Engazà, Bionde de Visegna e Corezo. A l'inissio de l'800 da segnalar grossi laori de bonifica de la pianura arente al fiume Tartaro e la sistemassion de le vie de comunicassion, laori che i à portà un bel svilupo a Nogara, soratuto agricolo. Finìo el periodo francese, soto l'Austria la provincia de Verona l'era stà divisa in 13 distreti, con Nogara e le frassioni Calcinaro e Campalan a le dipendense de Sanguinè. Le guere de indipendensa no i à interessà el paese e nel 1866 Nogara l'è deventà italiana. Tra le cése da segnalar quela de Casele dedicà a San Piero e costruida nel 1860 sora ai resti de 'na capela; la se presenta in stil neo-classico con stil corinsio a grandi colone e a tri navade. L'altar major conserva du pale del '600, una de scola Veronese “L'adorasion de S. Tomaso dopo l'incredulità” e l'altra Veneta “Cristo trafito da la Lancia de Longino” mentre su l'altar de destra du tele del '700 de arte veronese “S. Girolamo nel coal de un albaro” e “S. Bernardo che libara un ossesso”, a sanca inveçe 'na tela del '600 con la "Sacra Fameja". Tra le vile e palassi da segnalar arente a la noa césa parochial, el palasso rinassimental "Maggi" con elegante pòrtego, sede de la biblioteca comunal de Nogara. Vila Marogna costruida sora a un altra costrussion l'è del 1548 forse su disegno del Sanmicheli, un tempo con fasada piturà dal Brusasorzi mentre par entrar ne la vila bisogna passar da un portal dorico del Trezza. A Calcinaro la Vila Perez un tempo de la fameja vesentina Valmarana che in epoca venessiana in compagnia de altre nobili fameje, l'avea fato spostar el percorso del Tartaro da l'original sede. In località Ecce Homo el palasso del '500 residensa dei Conti Sangueneda. 'Da edar in località Molin de Sora, l'ultimo molin del '500, con l'afresco de la Madona sora al porton.