Comun de la Bassa Veronese a 25 chilometri in diression sud-ovest da Verona con le frassioni Bagnol, Colombare, Pradele. L'omo l'è presente in 'sto teritorio fin da l'Età del Bronso come i pol farne pensar i reperti vegnudi a la luçe longo i arzari del fiume Tion in località Corte Vivaro ne la frassion Bagnol mentre de Epoca Romana l'è l'epigrafe de un çenturion de la legion Flavia Firma catà in località Varan. Ma la storia de Nogarole l'è ligà a quela de l'antica fameja dei Nogarola vegnudi in Italia nel 933 durante el regno de Lotario II che'l g'à dà in gestion 'ste tere costruendoghe sora un castel ricordà nei documenti del XIII secolo. El primo documento che ne parla del teritorio l'è del 844 'ndoe se lese che a Bagnol l'Arcidiacono e sò sorela i g'avea 'na "colonicella in casale Banhoni"; solo nel 1184 la contrà vien ciamà col nome "Bagnolus". Storicamente el castel posissionà al confin col Mantoan l'è stà un ecessional ponto difensivo del teritorio veronese e nel 1233 durante la guera tra Eselin da Romano amigo dei Nogarola e i Mantoani i g'a tacà fogo, tirandolo su da novo piassé màsiso diese ani dopo. Nel 1277 Antonio Nogarola l'è stà copà nel tentativo de difèndar Mastino De la Scala da un imboscada e par 'sto motivo che l'à dimostrà l'assoluta fedeltà dei Nogarola ai Scaligeri i s'à imparentà; Bailardino Nogarola l'è deventà cugnà de Cangrande sposandoghe la sorela Caterina. In pratica i Scaligeri i considerava el castel de Nogarole un sicuro rifugio in caso de rogne. A metà del XIV secolo i De la Scala i avea fato costruir el mitico "serajo", un murajon che partendo da Valeso e passando da Vilafranca el finiva propio a Nogarola. Soto i Visconti el castel l'era ne le mane de Nicolò Diversi e Guglielmo Bevilacqua consijeri de Gian Galeasso Visconti. Nel 1405 quando jè rivà i Venessiani, Nogarole l'è deventà sede de un Vicariato e 'l castel consegnà ne le mane de Jacopo Dal Verme che a la so morte l'è tornà a la Republica de Venessiana. Nel 1441 Nogarole Roca e 'l so castel jè stà vitime de Carlo Gonzaga nemigo de Venessia sensa desmentegarse che gran parte del "Serajo" tra Vilafranca e Nogarole l'è stà butà zò dai mantoani. Da 'ste parti a l'inissio del '500 i era passà i soldà de la Lega de Cambray mentre nel 1543 el castel l'è stà vendù a Leonardo Boldri con l'obligo de cavar terapieni, fossi e l'aspeto carateristico de fortessa. Nel 1545 el castel l'è stà vendù a Gioani Bevilacqua Lazise che da quel momento l'à ciapà el titolo de "Conte de Nogarole Roca" mentre nel '800 la costrussion l'è finì ne le mane de Benedeto Barbieri e dal 1973 donà a l'Aministrassion Provincial de Verona. Drento al castel gh'è 'na ceséta dedicà a San Carlo Boromeo 'ndoe un tempo gh'era conservà 'na pala de la Vergine con butin, S.Gioani e S.Carlo Boromeo. Nel 1630 grassie ai Mantoani che i avea messo a fero e fogo Nogarole l'è rivà anca la peste, portando la zente ne la piassé completa miseria. Nel 1690 l'è scomincià l'opera de bonifica ne le risorgive de Nogarole Roca e nel percorso del fiume Tion, portando meno problemi de salute e fasendo svilupar le coltivassioni de riso e de morari par cavaleri. Tra le cése, da segnalar la césa parochial de Nogarole Roca dedicà a San Lorenso costruida nel '700 che la conserva do pale, quela del "Cristo Risorto" del Brusasorzi e la "Vergine del Carmelo" de Biagio Falcieri. Ne la frassion Colombare podemo catar 'na bela céseta de l'800 dedicà a la Madona del Carmelo. Tra le vecie costrussioni de un tempo, da ricordar el "Porton de fero con toreta" e 'l palasso "l'Olmo" colegadi con la roca de Nogarole.