Comune de la Bassa Veronese a 22 km in diression sud-est da Verona. Fin dal Neolitico l'omo l'è presente in 'sto teritorio, che anticamente l'era quertà da grandi foreste come pol testimoniar el nome de la frassion Cà dei Opi che'l deriva da Domus Oppiorum "Opio", albaro de la fameja dei "aceri" usà nel medioevo come sostegno par le vigne; el bosco l'era arente al vecio canal scavà da l'Adese, infati in località Fenileto nel 1918 jè stà catà dei resti de palafite de l'Età del Bronso (1400-1300 a.C.). Importantissimi jè i reperti de l'Età del Fero e de la çiviltà Atestina come vasi, tochi de fer e fibie de bronso scoerti ne la necropoli de Cà del Fer e 'l famoso "Elmo de Opean" in bronso a forma conica, decorà con 'na serie de cavai e da 'na bestia co' le ale del secondo periodo Atestino, conservà al Museo Archeologico de Firense; altri reperti de 'sta zona jè conservà inveçe nel Museo de Storia naturale de Verona, nel Museo Nassional de Este e nel Museo Preistorico de Roma. A Mazzantica, nel fondo Bragagnani e a la Montara jè vegnudi a la luçe armi, tombe, vasi, tochi de piera de epoca romana. Secondo i esperti parò Opean l'è nato piassé tardi rispeto a le altre località del teritorio comunal, forse dopo la famosa "rota dela Cucca" del 589 d.C. che l'à fato deviar l'Adese fasendoghe cambiar percorso e creando 'na bela palude; la zente oviamente l'è scapà al suto dando origine nel periodo alto medioeval al "Castrum Eupedanum", (un campo trincerà e fortificado, rinforsà in epoca Comunal e Feudal) come scrito in documenti del 967 e 977 mentre el nome Opdanum el compare un secolo prima. Nel 1184 secolo el Comun de Verona 'pena costituido, el g'avea nel propio distreto anca Opean e Mazzantica, cossita in 'sto periodo, l'è stà bonificà la palude che da Valese, longo el Bussè la finìa a Ronco. Nel medioevo a completar l'opera fortificada l'era stà costruido un castel arente 'ndoe 'desso vedemo al campanil de la césa parochial e a la tor ancora in pié (modificada). Nel 1230 a Verona l'è rivà el famoso Eselin da Roman e dopo averghe tacà fogo e robà de tuto a Nogara e Zerea, nel 1233 l'è stà el turno de la bataja tra i Mantoani e Eselin a Opean con la vitoria del condotier; nel 1334 i mantoani par vendicarse i gà tacà fogo a un fraco de paesi de la Bassa compreso Opean. Soto ai Scaligeri Valese fasea parte del Comune de Verona e i so abitanti i g'avea i stessi diriti dei çitadini, mentre Opean, anca se l'era a le dipendense de Verona i so abitanti i era considerà "rustici" e quindi no i g'avea i stessi privilegi. Nel 1384 Opean con le so frassion Cà dei Opi, Mazzagatta (Mazzantica) e Valese, fasea parte del Capitanato de Zevio; la Signoria Scaligera quando g'avea bisogno de schei l'andava a "pociar" da le nobili fameje come le Pompei, Maffei, Fracastoro, Miniscalchi e no riussendo a ripagarli ghe regalava un pochi de tereni come sucesso par le tri località sora citade. Dal 1405 al 1796 el teritorio comunal che dipendea da la Republica Venessiana l'è stà bonificà par rendarlo coltivabile e numarose vile jè spuntà un po qua e un po la. A parte el passajo dei soldà de la Lega de Cambray nel '500 e la peste del 1630, Opean l'à trascorso el periodo Venessian in tuta tranquilità e soratuto l'economia l'era ai massimi livei grassie a l'introdussion dei cavaleri e del riso. Nel 1796 jè rivà i francesi sponsandose tra Valese, Fenileto e Ca dei Opi e nel 1797 Opean fasea parte de uno dei distreti del Governo Central Veronese Colognese Legnaghese. Dopo el congresso de Viena 1814-15 Opean l'è passà soto l'Austria par restarghe fin al 1866 quando l'è deventà italian. Soto el Regno d'Italia par problemi economici e sociali bona parte de la popolassion l'è migrà verso la 'Merica. Tra le cése, da segnalar la pieve de Opean dedicà a San Gioani Batista e a la Madona Adolorà; i ghe n'à parlà in un documento del 1145 anca se la césa la gh'era da tempo, mentre la base de la tor campanaria la conserva el basamento originario. Bele, jè le Capele, l'altar major e i quadri de l'Anunciasion opera del Ottino e la Vergine del Rosario del Brusasorzi mentre l'è interessante la pala de l'altar major e 'l Batesimo de Cristo del Resi. La “toresela” al çentro de la piassa l'è stà par secoli el campanil de la Césa de S. Maria dei Angeli, sede de le confraternite de S. Maria e dei SS. Rocco 'Bastian. Altra césa le la parochial dedicà a San Girolamo a Cà dei Opi esistente almanco dal 1515 e butà zò nel 1957 par costruir quela noa piassé granda 'ndoe jè conservà dipinti con rafigurà Santa Lussia e Santa Margarita, l'Anunciassion e San Girolamo; a Valese gh'è la césa parochial dedicà ai Santi Giacomo e Ana del XVI secolo, rifata nel XIX secolo e rimodernà nel 1967; a Mazzantica (Mazzagatta) la parochial del 1353 'ndoe ghe conservà dei afreschi, 'na pala de la Natività de Maria del Brusasorzi e un bel crocefisso in legno; a Bagnolo la magnifica céseta romanica dedicà a Sant'Antonio Abate del 1394, afrescà e con un bel crocefisso in legno scolpido. Tra i palassi e le vile da segnalar Palasso Guantieri a Valese, Vila Mafei a Bragagnani, Vila Maggi e Palasso Fracastoro del '500 modificà nel XVIII secolo a Opean; arente al Bussè gh'è Vila de la Montara tra le piassé bele de la provincia veronese (con oratorio de San Carlo con drento du statue del Muttoni), costruida nel 1770 da la fameja Carli e col tempo propietà dei Pompei.