Comune che'l se cata a disnove chilometri da Verona in diression est-sud-est e posissionà tra i fiumi Bussè e Mirandolo. Par sentir parlar de Palù bisogna risalir fin al XII secolo, quando a causa de l'aumento de le nassite e de la conseguente dimanda alimentar in çità, el Comune de Verona l'à creado un consorsio con 400 iscriti composto da nobili çitadini con lo scopo de bonificar la gran palude Palus Comunis Veronae tra Zevio, Opean e Ronco a l'Adese. Nel 1194 jè scomincià i laori, canalisando el Bussè e 'l Fosso Storto, terminadi nel 1199 con la fondassion de Palù su uno dei çinque tochi de tera che i comprendea 4000 campi ricavadi da la bonifica. Col tempo le propietà divise jera passade dai soci del consorsio ne le mane de fameje potenti Maffei, Miniscalchi e Sagramoso. Soto la dominassion venessiana parte l'agricoltura e in particolar la coltivassion del riso nel XVI secolo par merito a quanto sembra del "serenissimo" Teodoro Trivulzio, che l'avea comprà un pochi de tereni messi mal ne la zona. Così, Palù l'era deventà un çentro de rifornimento par la çità de prodoti agricoli a pochi schei. Interessanti e ben conservade jè le antiche vile signorili: Vila Maffei o Corte Granda l'è un bel complesso con pila da riso concessa dal governo Venessian a la fin del XVI secolo, Vila Miniscalchi ne la contrà Creda con bela e granda propietà divisa nel XVII secolo a metà tra questa fameja e i Pompei, Vila Sagramoso ne la contrà Sant'Egidio. Tra le cése, da segnalar quela vecia dedicada a San Zenone, nata con el paese nel XII secolo, parochia nel 1526 e ristruturada nel 1691, con drento un afresco atribuido a Giovanni Caroto e 'na pala con Cristo Risorto de Pasqual Ottino mentre la césa noa l'è stà costruida nel 1964 e completada nel 1988.