Comun posissionà a 17 chilometri in diression nord-ovest da Verona a quasi dosento metri d'altessa ne l'anfiteatro morenico del Garda. L'omo l'è presente fin da la preistoria nel teritorio de Pastrengo come i pol dimostrar i reperti vegnù a la luçe ('na lama e un cortel) in località Castel, 'ndoe anticamente dovarìa essarghe stà un castelier. Grassie a la so posission strategica tra l'Adese e 'l Lago de Garda a l'incroso de le strade par Verona, Mantoa e Trento, Pastrengo nel corso dei secoli l'è stà sempre tegnù in considerassion, sicuramente dai romani ma in modo particolar anca dai Longobardi che in Località Campara i 'g'avea costruì parfin un posto de control 'isto l'importansa comercial conquistà nei ani. Sicuramente el toponimo che finisse in -engo ne fa pensar che i Longobardi i abia fondà el paese atual che a l'epoca l'era un "Arimannia" comunità de òmeni libari, mentre a partir dal X secolo Pastrengo vien inserì ne l'organisassion aministrativa de la Giudicaria Gardense. In un documento del 1010 par la prima 'olta vien parlà del castel de Pastrengo de epoca longobarda deventà col tempo çentro aministrativo del feudo controlà da l' Abassia de San Zen mentre in altri documenti del XIII el risulta meso sassinà e nel XIV secolo 'bandonà. Oltre a Pastrengo anca Pioessan restà autonomo fin a l'epoca napoleonica, fasea parte nel IX-X secolo de la Giudicaria Gardense, nel XII secolo del Comitato de Verona e nel 1184 del Comun de Verona. In epoca venessiana Pastrengo l'era stà inserì nel Vicariato de Incaffi mentre Pioessan in quel de Lasise. Dopo el periodo de la Serenissima 'ndoe Pastrengo l'è riussì a mantegnér la so importansa strategico-militar, nel 1799 l'è s-ciopà 'na furiosa bataja tra austriaçi e francesi finìa con la sconfita de i soldà de Napoleon. El paese l'è conossudo in Italia soratuto par un fato sucesso el 30 april 1848 durante le guere de indipendensa tra i soldà piemontesi e i austriaçi; re Carlo Alberto el s'era catà spiassà davanti a un mucio de soldà austriaçi durante l'avansada dei so soldà, ma tri squadroni de carabinieri a caval comandà dal magior Negri de San Front i s'à lancià in 'na furibonda e vitoriosa "carica" contro el nemico in meso a le trincee austriache conquistando el paese e salvando la vita de sovran; el 17 majo 1925 l'è stà inaugurà dal Duca de Bergamo un monumento del scultur Romeo Rota par ricordar i "Caduti de Pastrengo". Ogni ani el 30 de april se celebra 'sto fato storico con la rievocassion de la famosa "carica" dei carabinieri a caval. Tra le cése da segnalar la parochial de la Santa Croçe costruì tra el 1711 e 'l 1757, con altar major con magnifico tabernacolo e tele del Lorenzi come "S.Elena che adora la Croce". Altra parochial l'è quela de Pioessan dedicà a Santa Caterina consacrà nel 1896, la conserva tochi de la vecia césa come l'abside, el campanil romanico e 'na pala de Antonio Corte del secolo XVIII con rafigurà Maria e le sante 'Polonia, Lussia e Caterina. Da segnalar anca la ceséta del '300 dedicà a San Zen con afreschi del '400 posissionà arente al paese mentre el Santuario de Santa Maria el se cata a Pol e l'è stà costruì nel 1623. Tra i palassi da segnalar la vila "Castel" sora a Pioessan; la Corte Campara del '600; Casa Segattini a Pastrengo 'ndoe secondo tradission l'à sponsà re Carlo Alberto; le case Ronzetti de Pioessan Vecia con du capele del '700 'ndoe se pol 'edar 'na interessante "Vergine in tron con Butin", scolpida in legno. in una de le do contrà durante la guera contro i austriaçi, i generai francesi Massena, Moreau e Napoleon, i g'avea l'abitudine de tacàr i so cavai a 'na grossa vigna, che par un fraco de ani la vegnea mostrà ai visitatori come la vigna de Napoleon. Arente a la césa de San Zen, de propietà par longo tenpo del'Abassia de San Zen de Verona, ghe 'na tòr dita "El colombaron", 'na 'olta usà come colombara. De l'800 gh'è restà forte Nugent, forte Degenfeld a Pioessan, forte Benedeck sul monte Bolaga e forte Leopold. In meso ai forti podemo scoerzar el telegrafo otico a forma esagonal un tempo colegà con Castelvecio a Verona e col Monte Baldo. Foto: fortificassion de Pastrengo