Comune posissionà ne la parte meridional de la Valpolesela a 16 km da la rena de Verona in un teritorio arente a l'Adese con le frassioni Setimo, Balconi, Arçè, Ospedaleto e S. Lussia. Le prime testimonianse storiche su Pescantina jè de epoca romana come da reperti vegnudi a la luçe: al Nassàr un pilòto de marmo de Marco Tenazio Labeone, a Pescantina el pilòto de Lucio Tenazio Varo, a Arçè un poche de scrite su piera e a Setimo un altar. In 'sto periodo e forse anca prima la Valpolesela e quindi anca Pescantina, fasea parte del Pagus dei Arusnati, popolassion de origine retica. Nel medioevo i çentri abità de Arcè 'ndoe gh'era de sicuro un castel, Santa Lussia (Pulio), Setimo e Pescantina i era inserì ne la "Vallis Provinianensis", una de le do zone ne la sudivision de la Valpolesela. Durante el XII secolo Pescantina l'era tra le propietà dei Vescovi de Verona, confermà tempo dopo dai Scaligeri e dai Venessiani. A l'inissio del XIV secolo Pescantina fasea parte del feudo de la Valpolesela soto Federico De la Scala, ma dopo aver tentà de farghe le scarpe al cusin Cangrande i g'à distruto el castel e l'è stà messo al bando. Nel corso de la so storia Pescantina, l'à sempre tegnù conto de l'importansa de l'Adese dal ponto de 'ista comercial-economico, tanto che, le fabriche de barche e barconi par la navigassioni e 'l porto jè restà verti fin a la fin de l'800. Nel 1404 e 1405 el teritorio de Pescantina l'è stà messo a fero e fogo da la guera tra Cararesi e Venessiani e par 'sto motivo l'era stà costruì 'na bastia tra Arcè e Pescantina butà zò tempo dopo. Nel XVI secolo durante el periodo venessian, ghè stà 'na bataja tra la Republica Venessiana e la Lega de Cambray. Soto Venessia, Pescantina fasea parte del Vicariato de la Valpolesela, nel "Piovadego" de San Fioran (Florian); Nel teritorio de Pescantina dopo l'elession, el novo Vicario, el fasea 'na visita a la césa de San Maria de Ospedal de Mesacampagna l'atual frassion Ospedaleto in compagnia de ci l'è stà in carga prima de lu. Dopo el periodo de l'800 con dominassioni francese e austriaca nel 1866 come el resto de la provincia veronese l'è deventà italiana. Tra le cése da segnalar el Domo de San Lorenso Martire, in stil neoclassico-baroco, costruì su progeto de Alessandro Pompei a partir dal 1753 al posto de 'n altra césa che l'era a le dipendense de quela de San Fioran fin dal 1145, pieve nel 1450 e parochia con arciprete nel 1600. El campanil atual l'è stà costruì tra el 1820 e 'l 1840 su disegno del Barbieri mentre drento la césa se pol 'edar un bel altar major de la scola del Cignaroli. Sempre a Pescantina podemo catar la césa de San Roco del '400 con portal del XV secolo con campnil a bifore, el Santuario de la Beata Vergine de la Pietà "De la Madonina" del 1732. A Arçé gh'è la ceséta romanica de San Michel Arcangelo del XII secolo, come da documenti del 1145 risulta a le dipendense dei Benedetini de San Fermo Minor. A Santa Lussia de Pol la nova césa parochial costruì nei ani '50 al posto de quela vecia presente nel XII secolo, la conserva ancora tochi de afreschi tardomedioevali e decorassioni. A Setimo la césa de Sant'Antonio Abate del XV secolo un tempo a forma quadra l'è stà restaurà nel '700, la conserva afreschi de la fin del '400. Tra palassi, corti e vile sparse nel teritorio da segnalar a Arçè Vila Albertini rifata ne l'800, la se presenta con grande parco arente l'Adese e la ceséta de Sant'Ana; a Ospedaleto Vila Quaranta del XVII secolo con decorassioni de otima qualità con arente la césa de la Purificassion de Maria de origine medioeval con afreschi de Paolo Ligozzi; a Setimo: Vila La Mirandola 'ndoe l'è stà catà un ara pagana; Vila Bricci del '500 de scola Sanmicheliana con colombare, porteghi, barchesse e un bel salon decorà; Vila Bertoldi del '600 con Capela e un bel salon con quatro tele de Andrea Porta; Vila Sparavieri del '500 con portego e losa. Palasseto Giacopini con portego e losa, Palasso Betteloni sede del municipio, Corte Brizzi bela e interessante, Corte La Presa con magnifiche piture murali. Da ricordar l'è el monumento ai ex-internadi a Balconi, costruì nel 1966 arente a la stassion in memoria dei caduti nei "Lager" de la seconda guera mondial. Se Ve piase far quatro passi o andar in bicicleta consiliemo de andar arente a l'Adese longo la "strada de Alzaia" (un tempo percorsa dai cavai che i tirava le barche contro corente) vardando el panorama e la natura, le vecie fornase e i ex-molini, le vile e i canai.