Comun posissionà ne la parte meridional del Lago de Garda 'ndoe nasse el fiume Menso e al confin con le province de Mantoa e Bressia. L'omo l'è presente in 'stà zona fin da l'Età del Bronso (conossudo come orisonte cronologico Peschiera-Zeit) come pol dimostrar i numarosi reperti scoerti; del secondo milenio prima de Cristo, jè i vilai su palafite oltre a materiali de uso comun e tochi de bestie, vegnudi a la luçe durante i laori de fortificassion dei bastioni, dal Genio Austriaco nel 1851. In epoca romana l'era considerà economicamente importante, infati nel "Vicus Arilica" vecia denominassion de Peschiera, i g'avea sede i colegi dei barcaroi veronesi e del Benaco come ricordà ne le donassioni in sesterzi da tri scrite su piera. In 'sto periodo nel 101 a.C. l'è stà fortificado el vilaio da Caio Mario impegnà ne le lote contro i Cimbri, nel 55 a.C. l'è passà Cesare e i so soldà che i à sponsà un poco durante l'inverno, nel 15 a.C. la flota naval l'è stà utlisà da Druso e Tiberio durante l'invasion de la Retia, nel 38 d.C. le tere de la Riviera del Gardà i è stà consegnà ne le mane del console Publio Nonio Asprenate par i so meriti militari, da parte de Augusto. Ne la Selva de Lugana, intorno al çentro del paese, nel 249 l'è stà copà l'imperador Filipo nel tentativo de contrastar el traditor Decio e sempre da 'ste parti nel 268 i soldà todeschi jè stà sconfiti da Claudio II mentre i stava andando a la conquista de Verona. Poco distante da Peschiera a Salionse de Valeso gh'è stà el storico incontro nel 452 d.C. tra "l'ambassador" Papa Leone I mandà da l'imperador Valentiniano e Attila che l'avea fato sosta coi Unni da 'ste parti, finido con la ritirada dei barbari. Durante 'sto periodo el paese l'à cambià nome in "Ardelica Pischeriae" e l'è stà rinforsà par paura de eventuali invasioni barbariche. Nel VI secolo soto el dominio longobardo s'à 'isto el potensiamento de la navigassion, cressuda ben dal ponto de 'ista strategico-economico dopo el periodo de l'impero roman. Nel VIII secolo el re longobardo Rachis l'avea concesso, come scrito su un documento, la gestion de le tere in "Piscaria" al Monastero de San Colomban de Bobbio. Verso la fin del IX secolo dopo la creassion de la Iudicaria Gardensis, Re Berengario 'isto le numarose invasioni dei Ungari, l'avea concesso de costruir castei e roche oltre a rinforsar le fortificassioni esistenti. Nel XII secolo Peschiera la dipendea dal Vescovo e dai Rettori de Verona, manifestando una çerta autonomia anca grassie a l'elession dei propi consoli. Dopo la conquista da parte de Federico Barbarossa nel 1154 che l'avea portà concessioni e privilegi, l'è stà el turno de le lote tra i guelfi Sambonifacio e i ghibelini Monteci amiçi de Eselin da Roman. Finìo 'sto periodo l'è stà el turno dei Scaligeri che con Mastino I nel 1271 i à volù rinforsar e sgrandàr l'antica roca zontando anca tori e muri, come nel 1327, quando Cangrande I l'à fato ristruturar la Roca de Peschiera "...In castro Pischeriae fecit aedificari I Domos Mathas I Cameras Salis Muros et Fabricas et Revoltum I Rochas cum Scalis Lapideis". Ne l'epoca Scaligera Peschiera l'è stà ricordà da Dante, nel XX° canto de l'Inferno: "Siede Peschiera bello e forte arnese da fronteggiar bresciani e bergamaschi, ove la riva intorno più discese. Ivi convien che tutto quanto caschi ciò che 'n grembo a Benaco star non po' e fassi fiume giù pe' verdi paschi. Tosto che l'acqua a correr mette co' non più Benaco, ma Mincio si chiama fino a Governolo ove cade in Po". Ne le prisoni de la fortessa nel 1365, Cansignorio l'à fato prima imprisonar el fradel Paolo Alboin e dies'ani dopo strangolar par questioni de "eredità". Dopo i Visconti e i Carraresi Peschiera l'è passà ai Venessiani a l'inissio del XV secolo; in 'sto periodo s'à pensà de rinforsar i muri anca parché l'era a guardia de le comunicassioni tra Veneto e Lombardia e de la navigassion sul Garda. Cossita dopo la guera de Cambray a l'inissio del '500, l'è stà deciso de sgrandar e métar in sicuressa ancor piassé le fortificassioni. Nel 1548 su progeto de Guidobaldo Della Rovere e soto la diression de Michele Sanmicheli l'è stà creada la fortessa pentagonal bastionada che al dì de ancò podemo amirar; jè stà realisà dei terapieni intorno ai veci muri, çinque baluardi bastionadi, verta Porta Verona (inveçe Porta Bressia verta nel secolo prima) e pochi ani dopo altri terapieni a protession de la Roca. Con la Serenissima s'à 'isto un bel svilupo economico tra i piassé importanti de la storia del paese mentre numarose guere, eserciti de passajo e la tremenda peste no i à creà particolari problemi. Con l'arivo de Napoleon jè scomincià le rogne e nel 1797 col Tratato de Campoformio Peschiera l'è passà soto la Republica Cisalpina ma nel 1799 dopo la sconfita par man austriaca a Pastrengo, i francesi i è stà costreti a ritirarse da la fortessa e darghela ai soldà austro-russi. Da l'an dopo fin al 1814 Peschiera l'è stà francese. Soto i austriaçi s'à visto parò un çerto svilupo economico e un poche de investimenti de risorse nel teritorio. Nel 1848 ne la prima guera de indipendensa, Peschiera l'è stà el prinçipal obietivo de l'esercito piemontese, ocupà ma riconsegnada ai austriaçi pochi mesi dopo. Cossita l'Austria l'à ben pensà de rinforsar Peschiera in modo masisso e con Verona, Mantova e Legnago l'era una de le çità del famoso "Quadrilatero", un incredibile sistema difensivo passà a la storia. Nel 1859, ne la seconda guera de indipendensa, la fortessa l'è stà ciapà de mira dai italo-francesi con una massacrante bataja finida grassie al'armistizio de Vilafranca, restando in man austriaca. Nel 1866 Peschierà l'è deventà italiana. Da segnalar anca che nel 1917 durante la prima guera mondial Peschiera l'à ospità un convegno, ne la palassina adibida a sede del comando militar, Re Vitorio Emanuele III, i aleadi ne la guera contro l'Austria, Llyod George par l'Inghiltera, el General Foch e Painlevé par la Francia, el Re Vitorio Emanuele III con i ministri Sonnino e Orlando par l'Italia. Secondo Vitorio Emanuele bisognava métar l'esercito su la linea del Piave e l'à respinto la proposta dei aledi de ripiegar al'Adige, al Menso e al Po. Da 'edar a parte le magnifiche fortificassioni con bastioni e porte, Vila Albertini del '600 in stil sanmicheliano con arente l'oratorio de Santa Maria. Tra le cése da segnalar el Santuario de la Madona del Frassino 'pena fora paese, 'ndoe nel 1510 'na statueta con la Madona col Butin l'è comparsa tra i rami. Nel 1514 i Frati Minori Francescani i à costruido el convento. Nel Santuario gh'è conservà i afreschi e dipinti de Paolo Farinati, Zeno da Verona e de la scola del Morone mentre ne la capela de la Madona gh'è conservà la famosa statueta catà dal contadin Bartolomeo Braglia '500 ani fa. La césa parochial de Peschiera dedicà a San Martin l'è comparsa su un documento del 1008, rimessa a posto nel '400 ma butà zò e rifata nel 1821. E alora ne resta che saludarse con un brindisi bevendo un gosso de bianco Lugana......