A Pressana l’omo l'era presente fin dal Neolitico Antico (fine del V millennio a.C.) come ne dimostra i strumenti litici recuperadi in località S.Agata. De l'Età del Rame l'è da segnalar una lama dopia fasada in folenda, longa oto schei catada nel Fondo Meloto. Nel teritorio de Casele una serie de ritrovamenti ne porta a conossensa de la probabile esistensa de un insediamento uman riferibile a l'Età del Bronso mentre un bel siguréto con alete in bronso catà nel Fondo Graziadio i dise el sia de l'Età del Fero. Sempre in località S.Agata jè stà recuperade de le tombe con drento ogeti de un coredo funebre de tipo celtico e ne la stessa necropoli jè vegnude a la luçe monete romane de epoca republicana. Questi jè solo un pochi de esempi de quel che l'è stà recuperado, ma l'è solo par farVe capir quanto l'è stà importante Pressana par l'omo. Ai tempi dei Romani la strada consolar Emilia-Altinate che partendo da la via Emilia e passando par Montagnana la menàva in diression Altino e Aquileia la vegnea unida a la Via Postumia grassie a la costrussion de la Via Porciliana o Via Imperialis che da San Martin Bon Albergo la passava par Porcile (anticam. Belfior), Veronela e Pressana. Cesare Otavian Augusto dopo aver vinto contro Cesare e Cleopatra a Azio nel setembre del 31 a.C. l'avea deciso de farse valer su i abitanti con nove regole, espropiando i tereni (anca bonificandoli) e regalandoli ai fedeli soldà veterani, reduci da le bataje. Uno tra i reperti più importanti l'è conservado nel Municipio del paese, un bel "cippo funebre" con rapresentà un omo togà con un bisso tacà li arènte. Con la piena de l'Adese e la conseguente "rotta della Cucca" antica denominasion de Veronela, ne l'autuno 589 d.C. tuta la pianura veronese l'è stà modificada brutalmente compreso el teritorio de Pressana. In documenti antichi de epoca longobarda (569–774 d.C.) vien citada una "Sculdascia" ente teritorial aministrativo e un "Fluminis Novi" Fiume Novo, conossudo come Guà che da la fonte fin a Montecio Magior se ciama Agno (Corso d’aqua= latin amnis), poi Guà (forse dal latin aguatus = aquatus = impaludà) o Fiume Novo da Lonigo fino a Roveredo de Guà e infine Frassine nel Montagnanese. Da precisar che da Zimela a Roveredo el vien ciamà Canal. Inveçe el Frata (Fratta) el nasse ai pié de la Lessinia col nome de Togna fin a Zimela, cambiando in Fossa (latin fodio = scavare) fin a loc.Sabion e par ultimo Frata. Sia el Frata che 'l Frassine i deriva dal latin "frango" rotta. Un documento del 8 marso 1036 el parla de la donassion al monastero de San Nazario e Celso de Verona da parte del Vescovo Giovanni de numarosi teritori tra cui quel de Pressana, avudi in regal da l'imperador Corrado II. Nel periodo medioeval da sotolinear la presensa de Eselin da Roman, dei Estensi e par ultimi i Scaligeri con case brusè, riolte e violenti scontri. Anticamente a Gazo de Pressana, gh'era la presensa de un "ospitale" gestido da l'ordine ospedalier dei Cavalieri de San Giovanni Batista de Rodi. Nei documenti antichi, l’ospedal el vegnea denominado “mansio jerosolimitana”, un albergo de assitensa par i pelegrini che durante i secoli XII–XIV, i andava par la via Porciliana da Verona a Venessia o viceversa, per imbarcarse par Gerusaleme par visitar el Santo Sepolcro. Questa “mansio” l'era a una giornada de viaio da Verona e l'era utile par cambiar i cavai, sponsar e averghe un poca de assistensa. Con l'avansada islamica, i viagi in Terasanta i era sempre de manco e così l'è scomincià l'investimento dei nobili venessiani in propietà locali, trasformando così, l'importante ospedal in azienda agricola. Prima de entrar parò nel periodo Venessian, da sotolinear anca la guera del 23 dugno 1404 tra la Serenissima e i Carraresi che i g'à tacà fogo prima de scapar da Cologna Veneta che l'aministrava anca el teritorio de Pressana. Soto el Dogado venessian (Venessia+località costiere) parte le opere de bonifica, l'agricoltura e l'artigianado con la produssion de canapa e seda in più autonomia e control su le aque. Finido el periodo de la Serenissima i s'à alternenado i francesi che jà portado solo rogne e tasse con numarosi sachegi da parte del popolo ormai stufo e stremà e i austriaci che i à rilanciado l'economia che l'andarà avanti ben anca soto el Regno d'Italia fin al 1882 l'ano de la famoso piena del' Adese che l'à messo in zenocio la poro zente costreta a emigrar in 'Merica. Par ci ghe piase le curiosità, Pressana l'è comparsa par la prima 'olta su 'n documento del 903 e sembrarìa che 'l so nome de origine romana el possa derivar da Persana de Persus nome de persona propietaria de un "fondo". Tra le vile del paese, da visitar el complesso Querini (antica fameja venesiana che la gavea tra i possedimenti le isole Egee de Amorgòs e Astipale) composto da do vile; Vila Persa o Querini-Stampalia con corte, magnifico oratorio con drento l'afresco de la Madona col butin de Giovanni Maria Falconetto, un posso con architrave del '500 e caraterisada da le barchesse rinassimentali e da la merladura ghibelina, mentre a fianco gh'è Vila Gaudio del '600. Da segnalar Vila Grimani, con losa e du tori, Vila Cainaqua e Villa Gobetti ne la contrà Casele. Tra le cése, gh'è da segnalar l'importante Césa Vecia o ex-parochial de origine alto-medioeval, in antichità intitolada al’Anunciasion de Maria mentre contitolare l'era San Michel Arcangelo, con campanil del 1597 de Domenico Vanzonetto. Foto: vecia césa parochial