Comune posissionà a l'inissio de la Val d'Adese a monte de la "chiusa", ne la zona zona denominada "Tera dei Forti" e incoronà da el famoso "anfiteatro morenico" uno tra i piassé interessanti fenomeni naturali al mondo. Riole l'è abità fin dal Neolitico come ne pol dimostrar i reperti catadi in contrà Castel come lame de folenda, ponte de freçe, tochi de vasi de teracota, un scheletro, 'na situla, na spada e na lancia spacà a metà, mentre altri resti i era sul col 'ndoe 'desso gh'è el forte. Sora a la Roca inveçe j è vegnù a la luçe i resti de 'n antico castel medioeval che 'l gavea funsioni de control su la strada che vegnendo da Verona la menava verso Trento. In origine l'era 'na sempliçe costrussion de piera e legno de forma quadrangolar col tempo sgrandà, usà tra el VI e 'l VII secolo a difesa de le invasioni dei franchi, a metà del XII secolo l'è servido da ostacolo ai eserciti stranieri come nel caso de l'imperador Federico Barbarossa, dopo l'è stà riscatà dal Podestà de Verona Guglielmo da Orsa ritegnudo indispensabile par la difesa del teritorio veronese, mentre tra el 1380 e 'l 1410 l'è stà rimesso a posto e usà ne la guera tra Veronesi, Milanesi e Venessiani par el control de la Val d'Adese. Dopo tal data l'è stà abandonà del tuto e lassà al so destin. Soto i Scaligeri e col tempo dei Venessiani no l'è sucesso gnente de particolar a parte el passajo dei Lanzichenechi nel 1526 e de l'Imperador Carlo V che l'avea fato costruir un ponte su l'Adese nel 1530. 'Na data famosa in tuto el mondo l'è el 14 genàr 1797 quando gh'è stà la bataja de Riole tra francesi e austriaçi: 15.000 soldà de Napoleon insieme ai valorosi generai Joubert, Messena e Berthier, çircondà da 27.000 austriaçi guidà dal general Alvinczy, i è riussidi a rebaltar la situassion portando la Francia a la vitoria. A ricordo de 'sta gloriosa bataja con 5556 omeni tra morti e feriti (2180 francesi e 3376 austriaçi), Napoleon l'à intitolà 'na via de Parigi "Rue de Rivoli" e sul campo de bataja l'à fato costruir un monumento nel 1806 arente a la frassion de Canal, costituido da 'na colona alta 20 metri de cui podemo amirar solo el basamento parché i austriaçi i l'à butà zò el 12 febrar 1814 quando i s'à rifati vivi da 'ste bande. Par ci vol saver piassé su stà bataja ghe convien visitar ne la piassa de Riole el fantastico Museo Napoleonico con documenti, reperti, cimeli, s-ciopi, divise militari, ricostrussioni storiche. Da 'ste parti parò, in epoca risorgimental ghe stà le bataje, quele tra Piemontesi e Austriaçi. A ricordo de 'sto secolar passà militar jè ancora in pié: el forte de Riole Wohlgenuth costruido a metà de l'800, modificado nel 1866 quando el Veneto l'è deventà Italian, invertendo el tiro verso nord-est; la bateria bassa costruida nel 1884 sul piassal a nord del forte; la tajada de Canal del 1884 costruida da l'esercito italian. 'De visitar anca el Museo de la Grande Guera drento el forte de Riole, pien de reperti storici de la prima guera mondial che consijemo de visitar parché unico ne la provincia veronese. Tra le césa da visitar gh'è la parochial de Riole dedicà a San Gioani Batista del 1766 sui resti de 'na ceséta romanica del XII secolo con drento tra le altre 'na pala del XVI secolo de Marco Antonio Scalabrino rafigurante la Madona, San Gioani Batista e San Francesco in adorassion del Butin Gesù; la parochial de Canal del 1681 l'è dedicà a San Luca Evangelista afresca nel 1921-22 e la fasada restaurada nel 1975 con campanil merlà; la ceséta romanica de San Zen a Canal durante i bombardamenti de la 2a guera mondial l'è vegnù zò ma grassie a un grandioso restauro podemo amirar el vecio campanil e alcune parti de l'antica navada; la parochial de Gaiun costruida nel 1951 in località Riolti, l'è dedicà a San Michel Arcangelo; l'antica Pieve de San Michel o San Micheleto, ceséta romanica del XII secolo, deventà sagrestia quando l'è stà inglobà ne la césa parochial nel 1564, l'è vegnù zò ne la 2a guera mondial e s'à salvà solo la sagrestia e 'l campanil con numarosi afreschi de la céseta romanica come quel de San Cristoforo del XII secolo. Prima de andar al Concilio de Trento g'à celebrà 'na messa San Carlo Boromeo ospite de la fameja Gaiuni. Tra i palassi, vile e corti da segnalar Palasso Becelli a Valdoneghe de sora del XV secolo con portego, fienil, stala e casa del castaldo; Vila Becelli a Valdoneghe de soto con portego e cecéta de San Lorenso del 1678; Palasso Torri a Possol del '600; Vila Cozza del '600 che secondo tradission g'à sponsà Napoleon Bonaparte durante la bataja de Riole; tra le corti da segnalar Corte Campana, casa de Francesco Calzolari (1522-1609) el famoso botanico «Speziale alla Campana d'oro» de Verona e autor del libreto «II viaggio di Monte Baldo, della magnifica Città di Verona»; Corte Fiffaro del '600 con stale, porteghi e tor colombara; Corte Bramante al çentro de Riole con caneve e portego costruido coi resti del monumento de Napoleon; Corte Rizzoni del '700 con parco e case coloniche. E alora 'desso Ve resta che magnar i sparasi che da 'ste parti jè boni e bear un bel goto de vin de la "Tera dei Forti" magari un Enantio a la nostra salute! Foto: forte de Riole