Comune montano de la Lessinia a 25 km da Verona, con le frassioni San Francesco, San Roco de Piegara e San Vital; el teritorio comunal l'è posissionà par tuta la so longhessa da nord a sud arente a la Val Squaranto e partendo dal confin col Comun de Verona a 300 m.s.l.m. el se rampega ai 1575 m.s.l.m. El paese l'è nato sora ai resti de un vilajo del Neolitico anca se numarose testimonianse le ne dise che l'omo l'era presente un fraco de tempo prima. De epoca romana l'è la statueta in bronso de Mercurio catà arente la césa parochial, la lapide de un console oltre a medaje, monede e vasi. El toponimo el deriva dal Rovere pianta classificada come Quercus Petraea de la fameja de le fagacee; da l'antico nome Roboreto risulta Rovereto e da la contrassion g'avemo Roverè. El legno 'isto la resistensa e la duressa l'è stà usà dal '200 al '400, par la costrussion de mobili de qualità, par costrussioni navali, par struture portanti e dal momento che'l brusava ben, anca come legna da camin e carbon vegetal. Nel XI secolo la zona a boschi e pascolo l'era propietà de la Césa Veronese e la vegnea fità, cossita nel 1287 el Vescovo Bartolomeo de la Scala, l'avea ciamà e concesso a du tribù "Cimbre" (Tzimberer) provenienti dal Vesentin e originarie de la Baviera, (con a capo Olderico de Altissimo e Olderico de la Curia Vesentina) dei tereni in "Roveré di Velo e siti finitimi" par disboscar in parte e abitarghe. Roarè l'è stà el primo logo de quela parte de Lessinia colonisà dai Cimbri, coloni che, sempre piassé numarosi i à dovù slargarse verso altre zone de la "Montagna del Carbon". In un diploma de Cansignorio de la Scala del 25 febrar 1355 Roarè el fasea comune con Césanoa e Val de Poro e nel 1375 el Vescovo Piero de la Scala l'à creà la parochia de la Ecclesia Nova destacandola da la césa de San Nicolò de Roarè mentre nel 1403 soto i Visconti l'è stà zontà ne la lista dei Comuni del "Vicariado de la Montagna". Poco tempo dopo jè rivà i Venessiani che i à riconfermado l'autonomia ai cimbri, con privilegi e l'esension de le tasse in cambio de la vigilansa sui passi confinanti col Tirolo. Nel 1797 con con Napoleon l'antico "Vicariado de la Montagna" l'è stà sostituido dal "Distreto de la Montagna. Tra le cése da segnalar quela de Roaré dedicà a San Nicolò, parochia prima del 1375 e costruida ne la version atual tra el 1733 e 'l 1763 mentre de la vecia césa ghe restà solo el campanil opera de Domenico da Lugo del 1493; a San Vital prima de l'atual césa, ricostruida nel '900 gh'era 'na capela consacrà nel 1372; a San Francesco nel 1630 gh'era un capelan che dipendea da Roaré mentre la césa atual l'è stà costruida al posto de n'altra nel 1883 su disegno de Antonio Gaspari, campanil del 1895 e parochia nel 1941; la césa de San Roco parochia dal 1648 ma de origini piassé antiche conserva 'na tela del '600 con rafigurà la Madona col Butin con Angeli e Vergini opera de Domenico Macacaro morto de peste nel 1630. E par ci ghe piase i fenomeni naturalistici de origine carsica, el pol andar ne la "Grota del Monte Capriolo" (Roaré 1000) longa piassé de 200m ben atressada, 'ndoe antiche fole ne parla de "orchi" e "fade"; sul Monte Purghestal (945 m.) jè stà rinvegnudi numarosi reperti de epoca romana mentre tra la çima e la contrà Maso de Sora gh'è 'na sorgente de aqua mineral (con zolfo, fero e magnesio). Par lo sport invernal consiliemo le magnifiche piste de sci nordico a Conca dei Parpari in un panorama magnifico. Magari fasendo quatro passi podì incontrar el Bartoldo, furbo montanar nato da 'ste parti, che secondo tradission l'è andà a Verona, deventando consilier e giular a la corte de Re Alboin......