El teritorio del comune de Roaredo de Guà el se cata ne la parte più oriental de la provincia veronese a circa 50 chilometri da Verona. Un tempo 'sta zona l'era quertà da boschi de "querce farnie" che a l'epoca le vegnea ciamade "robur" (róvere, róaro) e de conseguensa un bosco "roberetum" l'à dato el nome al paese oltre al fiume Guà che passa da 'ste parti. 'Sto corso d'aqua l'è conossudo anca come "Fluminis Novi" Fiume Novo, mentre da la fonte fin a Montecio Magior se ciama Agno (Corso d'aqua= latin amnis), poi Guà (forse dal latin aguatus = aquatus = impaludà) o Fiume Novo da Lonigo fino a Roveredo de Guà e par finir Frassine nel Montagnanese. Da precisar che da Zimela a Roveredo el vien ciamà anca Canal. Anticamente el se butava ne l'Adese a Sabion prima de la famosa "rotta della Cucca" (Veronela) del 589 d.C. che l'à modificà el corso del nostro "Athesis". In 'stà zona el Fiumenovo l'andava avanti pian pianin 'isto la scarsa pendensa e dando origine a 'na zona paludosa ciamada "ager acquatus" toponimo che col tempo dopo numarose mutasioni el s'à trasformà in Guà. La palude anca dopo i laori par incanalar l'Adese da parte dei monaci benedetini no la riussiva a sugarse parchè continuamente alimentada da l'Agno ciamado col tempo "Flumen Mortum" e dopo altre bonifiche Fiumenovo. In epoca Romana el teritorio de Roveredo el fasea parte de l'Agro Atestino soto la Tribù Romilia e regalà da Cesare Otavian Augusto dopo aver vinto contro Cesare e Cleopatra a Azio nel setembre del 31 a.C. ai fedeli soldà veterani, reduci da le bataje (vedi Pressana) come scrito su 'na lapide catada sul confin comunal. De 'sto periodo jè stà catade un bel mucio de monede e armadure. Par catar inveçe qualche testimoniansa abitativa dopo la famosa "rotta" bisogna risalir fin al 1100, quando Roveredo come "vila" el fasea parte del feudo de Cologna Veneta soto i signori Maltraversi. Tra i "paroni" oltre al Vescovo de Vicensa gh'è da segnalar Eselin da Roman, col tempo i Scaligeri che i l'à inglobà nel Capitanado de Cologna e finido questo periodo, Roveredo l'è deventà feudo dei Malaspina, passando ai Conti de Thiene prima de l'arivo de la Republica Venessiana. E propio soto Venessia che Roveredo deventa un importante çentro comercial al confin con le province de Vicensa e Padova, longo el Guà, a l'epoca navigabile. Così, nel XVI secolo se vede un çerto svilupo economico con l'alevamento dei cavaleri e de l'industria de la canapa ma 'isto che'l fondo del fiume col passar dei ani el s'à alsà, le vie fluviali-comerciali jè stà abandonade par far posto solo a l'agricoltura con cereali, tabaco e fruta. Tra le cése, gh'è quela parochial dedicada a San Piero ricostruida a metà del XVIII secolo che la presenta, drento, 'na tela del siesento che la rafigura la Madona col Butin tra i Santi Piero e Paolo e 'na statua lignea del XIV secolo de la Madona. Da segnalar 'anca la césa del '400 de la Madona de la Salute ne l'omonima contrà. Conossuda l'è Vila Camerini soranominada "La Possesion", del '700, ricostruida su 'na vecia costrusion del XV secolo, residensa dei conti Ferro; par finir, in paese, gh'è el Palasso Selvatico-Mottola del XV secolo. Foto: parochial dedicà a San Piero