Comune de la Bassa Veronese posissionà con la so frassion Roerciareta tra el Canal Bussè e l'Adese. La zona l'è stà abità fin da l'antichità come ne dimostra le monede de epoca romana catade nel teritorio mentre le prime notisie su Roerciara jè del IX secolo, infati su 'n documento del' 813 se parla de tute le donasioni del Vescovo de Verona Ratoldo a la Schola Cantorum de "Roueclaria". Da 'ste parti gh'era 'n antica pieve costruida 'ndoe 'desso gh'è la césa parochial nova, ricordà ne la bola papal del 1145 da Papa Eugenio III e nei documenti del 1041. In 'sto periodo Roerciara l'era tra i possedimenti del Vescovo de Verona fin al 1206, data in cui el Comune de Verona l'è subentrà ne la gestion. Nel 1234 da segnalar el passajo de Eselin da Roman e relativo esercito, che, traversando l'Adese a l'altessa del Comune de Roerciara, l'è andà a la conquista de Albaredo. Par el resto, sto comun l'à seguido le vicende storiche de Verona, con dominasioni Scaligere, Viscontee e Venesiane. Cossita soto la Republica Venesiana, come nel resto de la provincia veronese, se vede un bel svilupo de l'agricoltura (riso e cereali) con el conseguente aumento de l'ocupassion e de la navigasion cara ai venesiani, infati a Roerciareta gh'era un porto su l' Adese. E propio da la presensa del faro del porto che l'iluminava l'Adese de note i dise el possa derivar el toponimo de Roerciara "Ripaclara", ipotesi che vien scartà par quela piassé credibile, secondo la qual, podarìa derivar da la parola tardo-latina "rubecularia" o "rubeclara" campagna piena de spini, de "rubus" rovi, anca se nel stema comunal catemo la pianta del "roaro" difusa un tempo nel teritorio. Tra le cése da segnalar quela parochial del 1860 dedicà a San Zen, costruida 'ndoe gh'era un tempo n'antichissima pieve, conserva 'na tela de Paolo Farinati con "Cristo Crocefisso con i Santi Zeno e Lorenso", do tele de Francesco Montemezzano, una con la "Madonna con i Santi Sebastiano e Rocco" e l'altra con rafigurà "la presentasion al tempio" mentre quela de grande valor l'è de Antonio Balestra con "Cristo Risorto con la Madona inzenocìa e Sant'Antonio". A Roerciareta (Roverchiaretta) gh'è la césa parochial del XIX dedicà a la Madona del Carmelo costruida in sostitussion de quela vecia del '500. Drento podemo amirar una fantastica pala de Felice Brusasorzi del '500 con rafigurà "Madona del Carmine con San Girolamo e San Francesco". Da segnalar, sempre a Roerciareta, l'Oratorio del '600 a forma otagonal dedicà a la Beata Vergine de le Grazie costruido nel 1633 e simbolo del paese. Tra le vile, da segnalar quele piassé importanti: la "Pindemonte-Fiumi" del '600 in çentro Roerciara, storica abitassion del poeta Lionello Fiumi; Vila Guarienti longo la strada che da La Rissa la porta a Roverciara costruida nel 1530 con afreschi e tor colombara; Vila Guera in località Casalino del '600. Al dì de ancò Roerciara se presenta come un paese svilupà nel setor agricolo grassie anca a la costante irigassion de le tere da parte de l'Adese e del Bussè ma podemo essar contenti de la costante cressita de l'artigianado del mobile d'arte.