Comun de la Val d'Alpon al confin con la provincia de Vicensa ai pié de un vecio vulcan, el Monte Calvarina. Secondo studi el teritorio l'era abità fin dai tempi dei romani, tegnendo conto, che da la frassion Terossa ghe passava una via romana, in pratica, de fianco a l'antica Via Postumia. L'origine del teritorio parò l'è marin, come pol dimostrarne el giacimento fossilifero arente al çentro abità de Roncà conossudo in tuto el mondo, scoerto a quanto sembra da l'Abate Alberto Fortis (1741-1883) che nel 1778 l'à publicà a Venessia el "Trattato della Valle Vulcanico-Marina de Roncà nel territorio Veronese". Chi jè vegnudi a la luçe fossili dei moluschi del Eocene Medio de circa sinquanta milioni de ani fa, periodo che dal ponto de vista sientifico l'è conossudo col nome de "Orisonte de Roncà". Par 'sto motivo l'è stà costruido el Museo dei Fossili a Terossa, con drento 'na biblioteca de libri, documenti e studi de 'sto periodo, fossili de numuliti, corai, moluschi, lamelibranchi, cefalopodi, crostacei, testugini de mar e de un codril sensa desmentegarse del scheletro del sirenio, mejo conossudo come Prototherium Veronese. El nome Roncà el dovarìa derivar da "roncare" che vol dir "remenar la tera", in pratica rendarla libara da la vegetassion come la gramegna, in modo da poderla coltivar. Questo ne ricorda che nel medioevo, Alberto de la Scala l'avea riciamà i Cimbri specialisadi in laori de montagna par métar a fruto 'ste tere, butando zò i albari de le magnifiche foreste. Castaldo de 'sti coloni, insedià nel Comun de Montechia de Crosara l'era un çerto Giacomo. De 'sto periodo l'è l'origine de le cése parochiali de Roncà e de Terossa, ricostruide tempo dopo. La parochial de Roncà dedicà a Santa Maria Anunciada l'è stà costruida su disegno de Don Gottardi nel 1886 mentre le decorassioni de la fasada e la scalinada in marmo bianco de Ciampo jè del 1929. Interessanti jè i altari che ghe de fianco a la navada prinçipal, come du del '700 e 'n altro con 'na statua de la Madona col Butin del '400 opera de Gorello da Cornedo. In sagrestia gh'è 'na tela del 1721 con rapresentà Sant'Eurosia, Sant'Apolonia, San Carlo e Santa Lussia. Fin dal XVI secolo le cése de Santa Margarita e Brenton i era unide a la parochial de Roncà mentre prima i era par conto suo e solo nel XX secolo le s'à destacà da novo. La céseta de Santa Margarita del '300 nata probabilmente quando jè rivè i Cimbri la presenta interessanti afreschi e decorassioni. Ne la frassion Terossa la césa parochial de Santa Maria Madalena in stile neoclassico l'è famosa parché un tempo l'era una de le poche cése de la provincia veronese 'ndoe el paroco el vegnea eleto dai capifameja. Tra le vile da segnalar "La Pastoria" del '600 conossuda anca come Vila Vilardi. E par ci ghe piase el vin, se pol bear un goto de Durel, che da 'ste parti l'è veramente bon e par ci inveçe el vol passar una giornada fora da le solite convien presentarse a Terossa ne la quarta dominica de lujo par 'edar l'Antico Palio dei Mussi.