Ronco l'è posissionà a destra de l'Adese con le frassioni Albaro, Scardevara e Tombazosana a quasi 'na trentina de chilometri in diression sud-est da Verona. Dopo l'aluvion del 589 d.C. che l'à modificà el corso del'Adese gran parte de la zona l'era quertà da paludi e da tere infestà da piante e soltanto ne l'alto medioevo l'è stà scomincià l'opera de bonifica come pol testimoniar el nome de Roncà, toponimo che deriva dal verbo "runcare" che vol dir disboscar, remenar el teren tirandoghe via la gramegna par poderlo coltivar. Tra le prime testimonianse scrite g'avemo quela del 896 'ndoe ne vien contà che Re Berengario l'avea concesso a Boniperto presbitero de la césa de San Procolo, la gestion de le tere ne la "Vila de Ronco". Nel 929 se vede la nàssita del çentro abità e de la césa dedicà a la Vergine, fata costruir dal conte de Verona Milone, importante personajo amigo del Berengario, de quela fameja che col tempo la s'à fato ciamar "Sambonifacio" ma che in origine l'era conossuda come "Conti de Ronco". La césa nel 1145 l'è ricordà da Papa Eugenio III come "Plebem de Runco cum capellis et decimis" e pieve con arciprete nel 1526. Nel so testamento Milone, l'à lassà i tereni al monastero Venessian de S.Zacaria, ma i dissendenti dopo numarose guere giudisiarie jè stà costreti a lassar le propietà. Dopo el periodo Scaligero e Visconteo, Ronco l'è passà ai Venessiani che i l'à unido al Vicariado de Isola Rissa. In 'sto periodo l'à regnà la paçe e 'na çerta prosperità economica grassie a la presensa de un porto su l'Adese dedicà soratuto al comercio de cereali che i vegnea trasportà su i "peoti", barche no massa grandi che traverso i canai i passava par le campagne fin al porto 'ndoe gh'era i "burchi", imbarcassioni de discrete dimensioni che tirade dai cavai o da bo, longo i àrzari de l'Adese i arivàa fin a Verona contro corente. Visto el grosso trafico su l'Adese, la Republica de Venessia nel 1536 l'è stà costreta a regolamentar i trasporti con 'na lege composta da tredese articoli. Nel 1593 nàsse el Consorsio de Bonifica dei tereni de Ronco e Tomba; e propio in 'sto periodo se svilupa el comercio del legname con partensa dal Trentino e arivo a l'arsenal venesian. In 'sti ani s'à svilupà la coltivassion del mais, le risare le à quertà gran parte del teritorio e l'à fato comparsa el baco da seda conossudo come "cavaler" che'l magnava le foje de morar; par 'sto motivo jè stà piantà ne la campagna longhi filari de morari (gelsi). Dopo la Republica de Venessia verso la fin del 1796 a Ronco l'è arivà Napoleon che l'avea siélto el palasso de l'atual Municipio come quartier general durante la famosa bataja de Arcole e dal campanil de la vecia césa el vardava el combatimento. 'De stà cesa a parte el campanil e l'abside gh'è restà poco a parte l'aquasantiera e fonte batesimal che podemo catàr ne la césa noa costruida arente nel 1965 con drento opere del XVI-XVII secolo de Montemezzano, Ceschini, Gobbini. Tra le cése da segnalar de Scardevara (scardeva=pésse de aqua stagnante) dedicà ai Santi Filipo e Giacomo sede de 'n abassia benedetina fin dai tempi de Milone, smembrà e deventà parochia nel XVII secolo; la parochial de Tombazosana dedicà a Sant'Ambrosio 'ndoe gh'è conserva 'na tela de l'Orbeto e 'na Madona coi Santi de D. Brusasorsi, l'è stà costruida tra el 1864 e '1867 su disegno de l'ing. Locatelli de Zevio dopo avere butà zò a Tomba de Soto nel 1863 la vecia césa romanica del IX secolo restaurada nel 1220 al tempo de l'arciprete Winco. Tra le vile e le corti da segnalar Vila Camozzini al Canton con du grandi barchesse e un bel cortil costruida da Francesco Camozzini nel 1850 sora ai resti de n'altra, parché Anton Maria Perez a l'inissio de l'800 l'era el paron e prima de lu nel 1653 Gerolamo Emilei; corte Polfranceschi del XVII secolo con casa padronale stale e canai; corte Corso ciamada anca "El Vatican" 'na 'olta un antico monastero de moneghe, restaurà e sgrandà dal milanese Francesco Podestà nel 1877 mentre nel 1878 grassie a l'aiuto del pitor Gazieri l'à rimodernà la capela (la vila l'è passà ai Da Lisca e nel 1929 ai Tirapelle). Tra i personeagi famosi da ricordar el pitor Giuseppe Resi (1904-1974) e 'l fondator de la Società de Mutuo Socorso nel 1885 Don Giuseppe Baldo. Podemo dir che Ronco l'à mantegnudo nei secoli la so vocassion agricola con pomi e riso sensa desmentegarse de l'industria de copi e quarei.