Comun de la Bassa Veronese a 27 km in diression sud da Verona con le frassioni Engazà, Bionde de Visegna e Valmorsel in un teritorio compreso tra i fiumi Tartaro e Menago. Secondo la toponomastica el nome Salissol el podarìa derivar da una de le piante de la foresta mesa impaludà che anticamente querzea la zona, in 'sto caso el "Salgàr" (Salice); in pratica un teren piantà a "Salix" come i disea in latin. Anca el toponimo de origine longobarda "Engazà" ne ricorda che 'sta frassion fasea parte anticamente de un gran bosco che'l se catava a "Gazi et Hengazate Nogarie". L'omo l'è presente in 'sto teritorio fin da l'Età del Bronso ma i i reperti piassé interessanti come monede e lapidi jè del periodo roman mentre el primo documento scrito che parla de Salissol l'è del 15 agosto 968 quando in un diploma de Ottone catemo scrito: «In eodem Comitatu veronesi prata juris regni nostri inter Saureciole et Septimo» (Nel istesso comitato veronese i prà de dirito del nostro regno tra Salissol e Setimo). Un altro documento del 1144 ne parla che l'Imperator Corado III l'à confermà la gestion de 'ste tere e quele de la corte de Nogara con pieve e capele «Salecolis cum Camarisia» a l'Abassia de Nonantola. Nel 1180 un ato de compravendita ne dise che le propietà del conte Sauro de Sambonifacio e de la sorela Mabilia le passava ne le mane de Bonifacio de Amoverga che'l rapresentava come "decan" el Comun de Zerea, par 1400 libre de monede veronesi; tra le propietà ghera un fraco de campi ne le "vile" (paesi) de Salissol, Isola de la Scala e Zerea, Sparé e Casaleon oltre a località tra i fiumi Menago, Tregnone e Tartaro. Nel XIII secolo Gioani de la nobil fameja dei Da Palazzo, l'è stà costreto, dopo essarse messo da la parte de Rizzardo de Sambonifacio durante le lote a Verona e imprisonà nel 1230 (liberà nel 1231), a vendar i beni a Eselin da Roman nel 1247; el fiol de Gioani, Bartolomeo da Palazzo, verso la fin del secolo el risultava tra i çitadini esiliadi da Verona dopo che l'era stà copà Mastino De la Scala, esilio che l'à comportà la confisca dei beni. Ma el momento piassé importante ne la storia de Salissol l'è quel scaligero, quando nel in 'sto comun, 'na dona, Verde de la fameja dei conti de Salissol l'è deventà mojer de Alberto de la Scala e mare de Cangrande. Del periodo gh'è restà una de le costrussioni medioevali piassé bele del Basso Veronese, el castel con du tori, una alta 27 metri con resti de merladura ghibelina e l'altra alta 35 metri voluda da Alberto de la Scala del '200, el tuto restà in piè dopo el passajo del 1441 de l'esercito de Federico Sforsa che l'à butà zò le mura e du tori. Altra fameja conossuda a Salissol l'è quela dei De la Cappella che nel 1573 l'è stà nominà col titolo de "Conti de Salissol" da la Serenissima, goernando el paese e pì de 500 campi bagnadi da fossi, come la "fossa Cappella" fata scavar nel XVI secolo ciapando l'aqua del Piganso arente a Butapiera. Altre fameje presenti in 'sto Comun nel periodo Venessian e conossude ben, jèra i Turco, i Trivelli, i Spolverini, i Sagramoso, i Gualdo, Verità-Poeta, i Sambonifacio. Tra le cése da segnalàr la parochial de San Martin Vescovo a Salissol, ricordà nel 1145 ne la bola de Papa Eugenio III deventà parochia nel 1454 e ricostruida nel 1857, conserva un bel batistero del 1430 e do tele regalade dal conte Cosimo de Cosmi del '700 con rafigurà San Martin e 'l martirio de Santa Eurosia. La parochial de Engazà dedicà a Maria Assunta (dial. Sénsa) l'è de origine del '300 ma con fasada in stile gotico e portal del '500, la conserva de le magnifiche tele come un "Incontro de Gesù con Maria" del Brusasorzi e "I Misteri" de Pasquale Ottino del '600 sensa desmentegarse de la "Assunta" del '500 ne l'abside e 'na statua lignea del '400 con rafigurà la Madona. La parochial de Bionde de Visegna del 1776, dedicà a Santa Caterina la conserva de le interessanti piture come la "Madona in trono con Santi e Sant'Orsola" del Brusasorzi e na "Pentecoste" del' Ottino. A Valmorsel da ricordar la ceséta dedicà a la Madona Assunta e a San Roco con altar in marmo de Sant'Ambrosio, le statue de San Roco e de la Vergine in legno de la Val Gardena. Tra le vile da ricordar Vila Sagramoso del '500 e Palasso Pullè antica sede municipal; a Bionde Palasso Portalupi ora Chiaramonte del '500 con arente un torion squadrà e merlà del XIV secolo e 'na tor del '400, Vila da Vico e Palasso Scipioni un tempo Serego-Alighieri in stil sanmichelian. Oltre a l'agricoltura da 'ste parti s'à ben svilupà la produssion del mobile d'arte, deventando col tempo una de le atività piassé importanti del teritorio.