El comun piassé importante de l'est veronese posissionà a metà tra le çità de Verona e Vicensa longo l'antica Via Postumia. I numarosi reperti i pol farne pensar de la sicura presensa romana ne la zona come nel caso de l'Abassia de San Piero a Vilanoa 'ndoe jè stà catà tochi de un capitel, de 'na colona, de monumenti funerari e de lapidi: ne la cripta de la césa durante i laori de restauro l'è stà scoerta un ara con sora scrita 'na dedica a Giove Ottimo Massimo da Eutychus, 'na stele funeraria con sora el nome de P. Geminius Saturninus, n'iscrission tombal de C. Codius Firmin(us); a Vilabela inveçe l'è vegnù a la luçe 'na lapide con n'iscrission funeraria de P. Rautulanus lanuarius morto a zinque ani; nel campanil de la césa parochial de San Bonifacio ghe murà un ara votiva dedicà a Mercurio dai fradei L. Vitorius Festus e O. Vitorius Severus; mentre a Lobia l'è stà catà un cipo de confin a forma cilindrica 'ndoe i ne dise che'l proconsole Sex. Atiluis Saranus, par ordine del senato romano, l'à messo i confini tra l'agro de Vicensa e quel de Este del 135 a.C.; inveçe a Praicardo scoerti tochi de 'na casa romana; altri reperti del teritorio sanbonifacese jè conservà al Museo Maffeiano e al Museo Archeologico de Verona come la stele funeraria de L. Bellicius Antho e Bellicia Mirtis de la gens Bellicia e del senator L. Bellicius Sollers. Dopo le devastassioni barbarache g'avemo notissie sul paese solo nel VI secolo grassie ai Benedetini, che in località Mota i à costituì 'na comunità agricola dando inissio anca a la bonifica de la palude tra la via Postumia e l'Adese denominada Zerpana. Tra el VI e 'l VIII secolo se vede la nàssita de l 'Abassia de San Piero de Vilanoa deventado in poco tempo un importante çentro economico-religioso arivando a controlar parfin tochi de zone de Legnago e Bardolin. A la Mota l'era stà costruì dai ghibelini un castel, abità par primo da un çerto Milone marchese de Verona, amigo de Berengario Re d'Italia, fiol de Manfredo de Bosso de origini todesche, che nel X secolo l'à volù 'na ceséta ('ndoe 'desso gh'è quela de Sant’Abondio) drento al castel da dedicar a San Bonifacio, Santo nato in Inghiltera nel 673 e fondator de un fraco de cése in Germania; da quel momento la nobil casada l'è stà conossuda nel corso dei secoli con el nome de Sambonifacio. I Vescovi e i Papi no vedendo de bon ocio 'sta fameja i à fato in modo de farghe perdar un poca de autorità in paese, dandoghe tra l'altro la possibilità a la zente del logo de costituir un libaro Comun. Nel XIII secolo catemo l'ultimo "Conte de Verona" de la fameja Sambonifacio un çerto Rizzardo che l'à sposà nel 1221 Cunizza da Romano (vedi Divina Commedia, IX canto del Paradiso) sorela del famoso Eselin, che a so 'olta l'à sposà la sorela del conte par scopi diplomatiçi. Nel 1225 dopo 'na separassion consensual da le "sorele" Eselin e Rizzardo i è ritornadi ai bei tempi, come prima del "matrimonio" quando i cambatea tra de lori; el poro Rizzardo l'è stà butà fora da Verona dopo aver perso. El castel parò l'è restà ai Sambonifacio che dopo aver respinto i atachi dei Montechi e de Eselin, i à dovudo andar in esilio a Padoa nel 1243 quando el stesso Eselin l'a vinto e butà zò el castel. I Sambonifacio verso la fin del XIII jè stà butà fora dai Scaligeri, e 'l Comun l'è passà a Bartolomeo de la Scala destacandolo dal Capitanato de Cologna ma a capo de un Vicariado con soto le località de Tor de Confin, San Gioani de Locara, Perarolo e Vilanoa, in pratica l'atual teritorio sanbonifacese. Soto i Scaligeri el paese l'era ne le mane de grosse fameje, fin a quando, i Vescovi de Verona e i Benedetini de Vilanoa che i g'avea un pochi de tereni ne la zona, jè riussidi a distribuir le propietà ne le mane de un mucio de propietari. Dopo i Scaligeri, i è rivà le signorie dei Visconti che i à portà un poche de guere e dei Carraresi mentre nel 1405 San Bonifacio l'è passà ai Venessiani. Soto i Venessiani l'è deventà un importante çentro econimico e comerciale grassie al svilupo agricolo. Cossita se vede da 'ste parti, in 'sto periodo, la potente fameja venessiana dei Gritti, che l'à fato costruir arente a l'Alpon el Palasso de Vilabela. Soto el periodo venessian la vita l'è andà avanti in tuta tranquilità fin a quando, verso la fin del '700, San Bonifacio no s'à catà in meso a le lote tra austriaçi e francesi durante la bataja de Arcole. Dopo 'sto dominio straniero de l'800 nel 1866 San Bonifacio l'è deventà Italiana. Da visitar assolutamente l'è l'Abassia de Vilanoa costruida nel VIII secolo e rifata nel XII secolo, con campanil scomincià nel 1131 par opera de l'Abate Umberto dei Conti de San Bonifacio. La se presenta con 'na bela fassada in coto e in tufo mentre drento l'è a tri navade con elementi romanici, colone con magnifiçi capitei, un altar in marmo, de le formele con rafigurà la Crocefission con ai lati sene de la vita de Piero e de Sant'Agata opera del Giolfino; Bei anca i afreschi del '300 con rafigurà la vita de San Benedeto, una pala d'altar del '700 de Sante Brentana, tele con rafigurà i 12 Apostoli opere del Guercino, 'na Madona incoronà da la Santissima Trinità con San Michele Arcangelo de Alvise Vivarini, una Pietà in marmo de Egidio da Wilnerneustadt. Soto la pavimentassion de la césa gh'è sepelì quatro dogi mentre merita de sicuro 'na visita l'antica cripta a çinque navade passando par i soteranei e 'l ciostro. Tra le cése da segnalàr quela de Sant'Abondio in località Mota costruida sora ai resti de l'antico castel in parte ancora visibile, a unica navada con afreschi del XV secolo, 'na statua de San Abondio e 'na Pietà; la césa parochial ricostruida par la prima 'olta nel 1769, in verita costruida piassé tempo prima, nel XII secolo con drento un fantastico altar major e 'na Madona col Butin e i Santi del '600; a Locara la césa parochial, antica capela de l'Abassia de Vilanova la conserva 'na Natività de la scola del Tiziano. Tra le vile da segnalar la stupenda Vila Gritti a Vilabela, su tri piani, con tor merlada, un bel giardin e un magnifica parco; Vila Carlotti del '700 a Proa; Palasso Sandri a San Bonifacio con saloni afrescadi e un bel parco.