El Comun de San Gioani l'è posissionà a sud de la çità de Verona e con l'Adese che'l fa da confin natural a nord. Le prime testimonianse su la presensa de l'omo nel teritorio de San Gioani jè i resti de palafite vegnudi a la luçe a Cà dei Fré a sud de Raldon e la "necropoli" de epoca romana a Campagnol de Raldon oltre a 'na tomba ne la frassion Posso. De la stessa epoca jè anca le 50 monede catà da un contadin sempre arente a Raldon del tempo de Costantino (312-333 d.C.), Valentiniano (364-375 d.C.) Valente (364-378 d.C.) e la vila romana a le Marchesane. Tra le curiosità del tempo, secondo i nostri storiçi Maffei e Cipolla, a Raldon podarìa essarghe stà la famosa bataja dei Campi Raudii tra i romani e i cimbri (Raudium> Raudion> Raudon> Raldon) e non a Vercelli. Su l'origine del nome de San Gioani Lupatoto ghe varie versioni come quela che catemo in un documento del 1178 "Sanctus Johannes ad lupum totum", logo 'ndoe gh'era la presensa dei lupi che da la Lessinia i vegnea zo ne la campagna; da "lupia" tipo de gramegna; da "Lucus totus" par la presensa de boschi. El 28 agosto del 1233 d.C. ne la piana a destra de l'Adese l'è stà siglà la famosa paçe de Paquara su inissiativa del domenican Fra Gioani da Schio par finir fora le numarose e sanguinose lote nel teritorio, presenti i Da Romano, i Estensi, i Veronesi con Vescovo e Podestà, i "Caroci" con un fraco de soldà, i vescovi de un bel poche de çità e 'l Legato Apostolico. Tempo dopo s'à 'isto la scalada al poter de Fra Gioani da Schio a Vicensa e a Verona, deventando duca e retor ma goernando col teror; le do çità stufe del frate i l'à butà fora riciapandose l'autonomia perduda. In 'ste tere concesse dal Comun de Verona ai contadini, nel 1405 con l'arivo dei Venessiani l'era stà costituida la sede del Vicariado de Cà de Campagna, un consorsio che'l gestiva 'sta parte del teritorio secondo el metodo de l'antica sudivision: "Campanea Minor" a sanca de l'Adese fin a San Martin Bon Albergo e "Campanea Major" da San Gioani Lupatoto a Somacampagna. Vicariado che'l riuniva oltre a 'sto Comun anca Butapiera, Cadidai, Castel d'Assan, Vigasi, Somacampagna e g'avea sede a Cà de Macici. In sto periodo nasse la coltivassion dei morari par i cavaleri, che s'à rivelà 'na discreta fonte de schei. Nei secoli XVI e XVII s'à 'isto nobili fameje Veronesi e Venessiane crompar un poche de zone messe mal da par poder coltivar, Bevilacqua, Lazise, Maffei, Bongiovanni, Mocenigo, Sagramoso ecc... Cosita verso el '600 i Bongiovanni, i Contarini e i Mocenigo i avea dimandà e otegnù dal Magistrato ai Beni Inculti de Venessia de poder far rivar l'aqua de l'Adese in 'ste tere, traverso de le derivassioni idriche ciamade Boche de Sorio. Nel 1630 l'è passà la peste, dimesando piassé de metà de la popolassion e grassie anca ai todeschi che 'ndoe i passava i ciavava de tuto, San Gioani l'era in miseria in 'na tera desolà. Ma 'pena finìo 'sto periodo scomincia 'na lenta ripresa in tuta tranquilità e ne risulta da la mapa de l'Archivio de Stato de Verona in data Milan 4 diçembre 1817, che'l teritorio l'era diviso in do comuni, con San Gioani Lupatoto a nord de l'atual via Palustrela mentre a sud gh'era Raldon che'l comprendea la zona tra el Menago a ovest e la strada par Palù a est, sensa desmentegarse de la località Posso. Nel XVIII l'economia local l'era nel masimo splendor, grassie soratuto a la costrussion de 'na strada par i cari in diression Verona. Nel 1796 quando l'è rivà Napoleon jè rivà un poche de rogne, ma par fortuna el teritorio de San Gioani l'è stà interessà solo in parte a le bataje tra francesi e austriaçi come quela del 1798 ne la vissina Magnan de Butapiera. Nel 1818 el comun de Raldon che la Serenissima l'avea messo con San Gioani Lupatoto, soto i austriaçi l'è stà diviso in do: la parte est al Comune de Zevio con le località Bianca e Maffea mentre la parte ovest con Raldon, Pampaluna e Cà de Fré al Comune de San Gioani. Dopo la prima Guera de Indipendensa i austriaçi, i à costruido de le fortificassioni intorno a Verona e propio nel teritorio comunal de San Gioani, el Forte Cà Vecia. Nel 1866 el Comune deventa Italian con a capo nel 1897 el sindaco Alfonso Zenetti, nel 1927 l'è passà a le dipensense de Verona ma tornando autonomo nel 1933. A l'inissio del '900 secondo Luigi Sormani Moretti (regio prefeto) ne la so monografia su la provincia de Verona el teritorio de San Gioani l'era: " Dalle porte quasi della città, da presso Tombetta e Pestrino ... sino alla sinistra sponda dell'Adige sotto il forte di Santa Caterina, dove sono Ca' de' Dossi e Ca' de' Maffei o di Mazzè, il territorio di San Giovanni, passando per ... Paquara, per Sant'Andrea ..., per Vignale, per Camotto, per Lettobon, per canali tracciati, aperti ma finora vuoti, del cessato Consorzio Giuliari, raggiunte in riva all'Adige le Bocche di Sorio, presa d'acqua ad irrigare le sottoposte campagne, e di là per l'oratorio di San Pietro, per Sorio stesso dov'era un antico castello, per la Croce dei Tre Frati e per Ca' dei Zermani, arriva al Capoluogo. All'est di questo ed al sud, incontransi poi, dopo molti piccoli poderi e diverse fattorie, le frazioni di Pozzo con 134 case e di Ca' di Massicei, delle quali il tenere del Comune prolungasi in una stretta linea intersecata da fossi e canali insino a Pampaluna, a Ca' Nuova, a Ca' del Pra, alla frazione di Raldon con 197 case, andando in ultimo, per una lingua di terra in forma d'ascia, dove sono le località dette Casette o Ca' dei Fré, a ficcarsi nel Comune di Oppeano" mentre el grande Luigi Simoni nel '900 ne la so Guida de Verona e Provincia "Paese industre e sede di opifici....dopo l'apertura del nuovo canale derivato dall'Adige. In antico i Contarini, i Mocenigo e i Sagramoso ne avevano solo derivato uno ad uso agricolo". Tra le cése da segnalar la parochial dedicà a San Gioani Batista costruida nel 1765 mentre dal 1458 la parochia la dipendea da quela de Vilafranca e dal 1553 da la Catedral. Drento gh'è conservà 'na tela del Farinati con rafigurà San Roco, San Gioani Batista e Sant'Ana. In contrà Sorio gh'è la ceséta de San Piero Martire del 1585, in contrà Pontonsel la ceséta de San Girolamo del 1618 e par finir la ceséta de la Madonina del '600 con piture del Resi. Tra le vile da segnalar Vila Palazzoli del '700 ma ricostruida nel 1820, Vila Wallner del '400 modificà piassé 'olte e Corte Pampulana del '500 restaurà nel 1904 dopo che i g'avea tacà fogo.