El paese l'è posissionà verso la fin de la Val d'Alpon, in un teritorio conossudo par la gran produssion de sirese de qualità e del vin Durel. San Gioani Larion, l'era in epoca medioval conossudo come San Zuàn de la Rogna e fin al 30 diçembre 1923 el fasea parte de la provincia de Vicensa. La prima testimoniansa scrita del nome de San Gioani Larion la catemo nel diploma de Enrico IV del 1091, 'ndoe vien elencà tra le tere da asegnar al monastero de San Felice de Vicensa, "Sancto Joanne ad Aronna". El termine latin de Aronna el sembra el sia stà volgarisà in la Rogna, termine che i dise el sia riferido a 'n tipo de erbassa infestante, 'na gramegna. El toponimo el s'à trasformà nel tempo in San Joanne in Larogna nel XIV secolo, in Sancto Joanne habente la rogna verso el '400 e par finir ne la version atual nel 1685 su la bola papal. Storicamente San Gioani o Zuàn l'è stà abitada fin da la preistoria, çinquatamila ani fa infati, arente al monte Calvarina tra le malghe Rocolo e Marognon, dovea essarghe un riparo dei cassadori alpini neandertaliani. In epoca alto medioval tuta la val de l' Alpon l'era soto l'aministrasion de Vicensa, fin a la metà del XI secolo, quando l'è stà regalà ai veronesi come ricompensa par averghe dato 'na man ai vesentini, ma non S.Gioani che g'avea el comercio orientà verso el Veronese. La storia del paese, in 'sto periodo, l'è stà condisionada da numarose beghe nate par i diriti de pascolo sul Monte Beloca e in zone confinanti, con i Comuni Veronesi in particolar con Tregnago. El paese l'era costruido intorno al castel, 'ndoe 'desso gh'è la césa parochial de San Gioani Batista de la frassion omonima, e propio el castel l'è stà teatro nel corso del XIII secolo de guere tra la nobile fameja dei Malacapela passadi con Verona e 'l Comune de Vicensa; cossita nel 1241, el podestà de Vicensa l'à ordinà Uguccione de Pileo de Montecio in capo ai vesentini de atacar e non riussendo a sfondar i à preferido devastar el teritorio e ciavar tuto quel che i podea. Cossita l'ano dopo, grassie a l'aleansa con el famoso Eselin da Roman, i è riussidi a farse consegnar da Enrico Malacapela el paese. Durante la signoria scaligera San Gioani l'è stà messo soto la giurisdission de Arzignan e nel 1382 le vien compilade le "Regole del Comune". Dopo i Scaligeri e i Visconti i è arivadi i Venesiani e anca in 'sto periodo se vede guere come quela tra Venesiani e l'esercito milanese comandà da Piccinino, e quela un secolo piassé tardi durante la Guera de Cambrai. Da 'edar gh'è la parochial dedicà a San Gioani Batista (che someja ben al Santuario de la madona de Monte Berico) de la frasion Castel ricostruida ne l' 800 sui resti prima del famoso castel e dopo de la vecia césa. Drento gh'è conservà un dipinto del '500 con rafigurà la Madona col Butin tra i Santi Antonio da Padoa e San Gioani Evangelista de Bartolomeo Montagna. Inveçe la césa parochial in çentro a San Gioani, l'è dedicada a Santa Caterina e costruida a l'inissio del '900 con 'na bela fasada con guje in stile neogotico mentre le fiancade jè decorade con piere bere de basalto de le cave locali. In contrà Scandolaro podemo 'edar la ceséta de San Zen del XIII, in contrà Boarie l'è stà fato costruir da la fameja Balzi l'Oratorio nel 1715 e a Catignan gh'è la césa de fin '800 dedicà a San Benedeto.