Comun de la Bassa Veronese a 40 chilometri in diression sud-est da Verona posissionà tra i fiumi Tartaro e Menago. Sembrarìa che 'l nome Sanguinè secondo la toponomastica el possa vegnér da la pianta ciamada "Corpus Sanguinea" dai rami color porpora o rosso scuro e coi fruti neri che no te podei magnar; un tempo coi rami piassé zoeni se fasea le spassaore. El primo vilajo in pratica l'era stà costruì 'ndoe gh'era 'na distesa de sanguenele o sanguini come ne dise uno dei primi documenti che i parla del paese. Gh'è inveçe ci dise che'l nome de 'sto Comun el vegna dal latin "sanguinis" par le tremende bataje che nel corso dei ani jè stà combatù da 'ste parti, ipotesi parò da scartar. El primo documento che ne parla de Sanguinè l'è del 930 mentre tra i primi reperti storiçi da segnalar la scoerta de un par de anfore e 'na cassa de monede romane in località Venera. Anca se Sanguinè l'era ben fortificada e g'avea un bel castel, nel 1232 l'è stà messa soto-sora dai mantoani; cossita del primo castel no ghe restà pì gnente ma poco tempo dopo l'è stà rimesso in pié da novo e nel 1377 insieme col feudo l'è stà regalà dai fradei Antonio e Bartolomeo De la Scala a Jacopo Dal Verme che a so 'olta el ghe l'à consegnà a so fiol. Nel 1451 el feudo el vien confiscà ai Dal Verme dai Venessiani parché ritegnùdi traditori e consegnà al Capitan de la Serenissima Gentile de la Leonessa con relativo titolo de conte che podea trasmetar ai dissendenti, sia omeni che done; infati quando l'è morto lè propietà de Sanguinè jè stà divise fra le fiole: Milla sposa de Francesco Lion da Padoa, Tarsia sposa de Alessandro Venier da Venessia e Batistina sposa de Leonardo Martinego da Bressia. Nel 1438 Sanguinè l'è stà conquistà da Alfonso de Calabria par Ferara e poco tempo dopo riciapà dai Venessiani. Nel 1509 durante la guera de Cambrai Sanguinè l'è passà soto le trupe imperiali e nel 1511 i francesi jà remissià el paese. Par el resto la vita soto la Republica de Venessia l'è andà avanti 'bastansa tranquila fin a l'800 quando jè passà: Napoleon (1796 e 1804), l'imperador Francesco Giusepe (Ceco Bepe 1848) e Giusepe Garibaldi (1863). Tra le personalità famose che jè passà da Sanguinè da segnalar Carlo Goldoni nel 1751 mentre Ugo Foscolo, Ippolito Pindemonte, Pietro Verri e Giulio Perticari i à sponsà a "l'Albergo de la Posta" la note del 15 setembre 1810. Tra le cése da segnalar la Césa e 'l Convento de S.Maria de le Grazie conossuda come la "Ceséta dei Frati", complesso costruì a l'inissio del '600 da l' Ordine Minor dei Francescani "Socolanti"; da 'edar drento la césa, tri dipinti in gesso con rafigurà "l'Angelo Musicante", "Madona Assunta in Ciel" e " Du puti con cartijo". Del convento gh'è restà parte del ciostro e un bel posso. Conossudo l'è "l'Oratorio de le Tri vie" ciamà anca "Ceséta de la Rotonda" o "Ceséta del Capo de Soto" costruì nel 1747 'ndoe gh'era un capitel co l' imagine de la Madona, su progeto de Alessandro Pompei. La césa parochial de Sanguinè, dedicà a San Giorgio, l'è stà costruì su l'area de l'antica césa tra el 1802 e 'l 1826 su disegno de Gioani Canella e la conserva opere de Agostino Pegrassi e de Gaetano Miolato; la prima césa l'era 'na Capela a le dipendense de quela de Casaleon (docum. 1145 d.C.) ma passà col tempo ne le mane de le fameje nobili de Sanguinè (Dal Verme, Lion, Venier, Martinengo) con poter decisional su la nomina del prete. Tra i palassi da segnalar Palasso Taidelli e Palasso Betti de fin '700 'ndoe i à sponsà Francesco Giusepe e Giusepe Garibaldi mentre longo la strada par Sustinenza gh'è "la Rangona" palasso del XVI secolo. Da visitar par ci passa da 'ste parti l'è sicuramente el castel modifica piassé 'olte nei secoli ma sempre magnifico e magico.