Importante Comun a est de Verona a pochi chilometri da la çità e posissionà longo la strada statal 11 che un tempo l'era el percorso de l'antica Via Postumia. Probabili jè infati le origini romane del paese come ne dimostra el cipo roman catà arente a la césa parochial dedicà al Dio Bono Evento che secondo el storico veronese Lodovico conte Moscardo in un so libro scrito nel 1762 "fu adorato anco dai Veronesi, avanti che avessero introdotta nella città la Religione Christiana, il cui tempio è credibile che fosse dove ora è la Chiesa di San Martino Buon Albergo, quattro miglia discosto da Verona, per il testimonio che rende un’ antica pietra ritrovata in quella Chiesa ed hora appresso di me, che ha servito per piedistallo al simulacro di questo Idolo, nel quale si legge BONO EVENTO, che in questo modo al loco ritiene quasi l’antico nome, havendo mutato di Bono Evento in Buon Albergo, cioè de bon evento de bon ospizio." Secondo Luigi Simeoni el toponimo podarìa derivar dal fato che, el paese ai tempi dei romani, essendo stà a l'incroso tra la Via Postumia e la Via Porcilana, el g'avesse 'na stassion de posta, cambio cavai e dei posti 'ndoe el viandante o el pelegrin el podesse fermarse par sponsàr e magnar. Altri reperti come scrite su piera e lapidi jè stà catà anca ne la frassion Marçelise che i pol confermarne de la presensa romana in 'sta zona. Tra i fati storiçi piassé importanti e conossudi g'avemo quel del 27 setembre 489 d.C., 'ndoe, longo el progno Fibio, i s'à scontrà i soldà de Teodorico e Odoacre con la vitoria final da parte dei Ostrogoti e la conseguente invasion e dominassion in Italia. Tra i primi documenti scriti su San Martin g'avemo quel del 1146 'ndoe se parla de la ceséta dedicà a San Martin da Tours aministrà da l'Abassia de San Zen, regalà dai Degani de Lavagno con relativi tereni e la possibilità de aministrarse, donassion confermà col tempo da parte de Federico I e da Urbano III. A San Martin s'à fermà un fraco de eserciti prima de tacar Verona e par 'sto motivo la storia del paese l'è ben colegada a quela çitadina. Nel 1509 a San Martin infati, el s'era fermà l'esercito Venessian prima de dichiar guera a Massimilian d'Austria che'l controlava la çità mentre nel 1701, da 'ste parti i è passadi i soldà guidà dal prinçipe Eugenio che traverso la Lessinia in diression Legnago sensa farse scoerzar dai francesi. Nel 1796 el general francese Augerau l'avea tacà i soldà austriaçi del general Hohenzollern che da 'ste parte i s'era fermà e grassie a l'arivo de Napoleon l'è rivà anca la vitoria. Nel 1813 altri scontri tra 'sti du eserciti, ma 'sta 'olta con la ritirada fin a Verona dei francesi. Cossita a causa de le guere, le numarose atività industriali e comerciali jè andà piassé 'olte in roina come quele che i era partide al tempo dei Scaligeri, le famose cartiere che le avea dà lustro al paese tanto da farlo ciamar San Martin de le Cartiere, i lanifici "gualchiere" e i molini che chi, grassie a le aque del progno Fibio (che'l nàsse a Montorio e finisse nel progno de Ilasi e dopo ne l'Adese) i s'era svilupadi, sensa desmentegarse de la Ferriera che l'à fato nome a la frassion Ferasse. In pratica el Fibio l'è sempre stà par i abitanti fonte de vita e de guadagno e par questo motivo sfrutà ben. Con un decreto del 1927 l'è nato l'atual Comun de San Martin, unendoghe el Comun de Marcelise e parte dei teritori dei ex-comuni de San Michele Extra e Montorio. Al dì de ancò le frassioni jè Marçelise, Mambrota e Ferasse. Tra le cése da segnalar la parochial dedicà a San Martino da Tours costruida sora ai resti de n'altra antica nel XV secolo ma ricostruida nel 1744. Drento ghe conservado 'na pala del Ottino con rafigurà San Martin Vescovo, 'na tela non finìa de Wenceslao Huberti e 'na statua del '400 con rafigurà la Madona in Trono col Butin, mentre ne l'oratorio gh'è 'na tela del '600 con Sant'Antonio e i so miracoli. Ne la frassion Marcelise gh'è la parochial dedicà a San Piero in Catedra ricordà nel 1460 ma ricostruida nel 1830 su disegno del Barbieri, la conserva: du tele con rafigurà Santa Maria Madalena insieme con Santa Caterina Vergine e San Giorgio insieme con San Benedeto Abate, opere de Girolamo Dai Libri; du tele con rafigurà i Profeti (Isaia-Daniele), e la Madona insieme a San Giusepe in adorassion de Gesù, opere del Morone; inoltre se pol 'edar altre opere del Caliari e del Cignaroli. Tra le vile la piassè importante l'è quela dei duchi D'Acquarone conossuda come Vila Musella dal nome de la fameja che l'à fata costruir tra el XVI e XVII secolo, i Muselli; çircondà da un grande parco con statue la conserva opere de grande valor storico e artistico. Vila Terreno nel XVI secolo propietà de la fameja Orti Manara nel '700 su la strada par Marcelise. Arente al col de San Brissio, Vila Zamboni con parco, sculture e piture. Altre vile nel teritorio comunal jè Vila Malagnini, Vila Sancassani, Vila la Ferrari, Vila Gaspari, Vila Sogara.Tra le piassé conossude ghe anca la famosa Vila Girasole progetà nei ani '50 da Angelo Invernizzi, 'na vila girevole che, grassie a dei mecanismi la pol girar su se stessa durante la giornada, mostrando cossita, la fassada al sol. E alora, ne resta che magnar un bon piato de spàrasi de la Mambrota o magari una mucio de sirése de Marçelise bevendoghe drio un bon gosso de vin......