Comun posissionà nel cor de la Valpolesela con le frassioni Bure, Castelroto, Corubio, Pedemonte e S.Fioran. L'omo l'è presente in 'sto teritorio fin da la preistoria come i pol dimostrar i reperti del Neolitico vegnudi a la luçe in diverse località e 'n vilajo protostorico a Castelroto. Ai tempi dei romani el teritorio de San Piero in Carian, dovarìa essar stà 'na zona de un çerto prestigio, 'isto i resti de case rusteghe rinvegnù a Ambrosan de S.Fioran (it.Floriano), Castelroto e in località Quar. El toponimo Corubio (da Quadrivium incroso de quatro strade) e 'l reperto de un segnal meiàr (it. miliare) i ricorda el passajo de la Via Claudia Augusta Padana o de 'na so derivassion. Altri reperti de l'epoca romana jè le steli funebri come quela dedicà a Arnia Aquileia catà a Corubio e altre a Bure, are funerarie come quela de Arria Protilde sempre a Corubio e quela de Vario Massimo a San Fioran, le scrite e i pilòti de piera ne la fasada de la Pieve de San Fioran e le tombe vegnù a la luçe a S.Piero in Carian. Secondo i storiçi el nome "Carian", che l'è anca 'na contrada arente al paese, el sembra vegnér dal tardo latin Carilianus, teren de propietà de Carilius. 'Sto teritorio l'è posissionà tra Verona e la Val d'Adese el nel corso dei secoli la 'isto el passajo de numarosi eserciti. Un ponto strategico difensivo che'l vardava da l'alto la campagna l'era el borgo fortificà de Castelroto, cosita ciamà dal nome del probabile costrutor del primo castel "Castrum Rotharii", el re longobardo Rotario; el castel l'è restà in pié fin al periodo visconteo e al dì de ancò podemo 'edar solo qualche toco de muro. Nel periodo Scaligero la Valpolesela l'era goernà da Federico De la Scala fin a quando no l'è stà butà fora da Cangrande parché l'avea tentà de ciavarghe el poter a Verona. Soto la Serenissima San Piero in Carian l'è stà sede del Vicariato de la Valpolesela, un organo aministrativo che'l se gestiva da solo, soratuto grassie ai privilegi in bona parte concessi ne l'epoca Scaligera da Federico De la Scala e riconfermadi dai Venessiani. La costrussion piassé importante dal ponto de 'ista storico e artistico nel teritorio de San Piero in Carian, l'è l'antichissima Pieve de S.Fioran nata nel periodo longobardo (forse costruì al posto de un tempio pagano) come i pol dimostrar i numarosi reperti de l'VIII secolo presenti ne la césa; quela atual parò l'è del XII secolo modificà nel XV e XVIII secolo. In 'sto logo nel 905 l'è stà scrito un diploma 'ndoe se lese che Re Berengario l'à concesso a un so servo de un poche de tere. De la césa originaria ghè restà el muro a nord e un toco de abside che'l va dal campanil a la sagrestia. Non podemo desmentegarse del magnifico campanil con parti antiche, forse un tempo tor de 'na fortificassion usà par difendarse dai barbari, el ciostro del XVI secolo, el fonte batesimal in mono bloco de marmo rosso. La césa l'è a tri navade, un tempo sede religiosa de la Valpolesela con altre do pievi, conserva afreschi sia drento che fora, 'na tela del Brusasorzi e 'na Madona in legno del '400. La césa de San Piero in Carian l'era parochia zà dal 1458 mentre quela atual l'è stà costruì nel 1830 su disegno del Barbieri. Del '300 l'è l'origine de la césa de Bure dedicà a San Martin e ricostruida nel '900; del 1828 l'è la césa parochial de Castelroto dedicà a Sant'Ulderico costruì sora ai resti de un altro tempio; nel teritorio de la parochia de Castelroto da segnalar anca la Capela de Ognissanti in contrà Negarine del 1300 e la césa dedicà ai Santi Martin e Roco a Corubio in parte gotica e in parte romanica che la conserva piture del '300 del Maestro Cicogna. San Piero in Carian l'è conossudo oltre par la produssion del vin Valpolesela anca par le numarose vile sparse chi e là: intorno a la "çità" de San Piero in Carian podemo catar Vila Verità de l'800 in stil neoclassico; Vila Borghetti-Falcieri del XIX secolo da 'ndoe se gode un bel panorama; Vila Galli-Righi in posission magnifica con bel parco; Vila Acquistapace-Castellani del '500 de scola paladiana, con colone doriche, statue e losa; Vila Costanza del '600 con magnifico portego e particolar par le do fasade una davanti e 'n altra de drio; del XVI secolo l'è Vila Galtarossa. A Bure podemo catar Vila Buri-Forapan del '500 con afreschi decorativi e Vila Monga-Castellani ne le forma atual dal XIX secolo grassie a Luigi Trezza. A Castelroto gh'è Vila Bellini-Carnesali del XVI secolo e Vila Sacchetti-Sagramoso del '400. A Cengia Vila Fagiuoli del '500 in stil sanmichelian. A Corubio vila Amistà del '700 costruì su disegno de Ignassio Pelegrini: In contrà Squaran catemo Vila Fumanelli costruì nel '600 sora ai resti de la residensa de Re Bergario del X secolo. A Pedemonte in contrà Quar Vila Perez-Bertani-Montresor de scola sanmicheliana e Vila De Besi del '500. Arente a Pedemonte la belissima Vila Santa Sofia volù da la fameja Serego nel XVI secolo e costruì su disegno del Palladio mentre poco distante catemo la ceséta de Santa Sofia del XV secolo con magnifiçi afreschi e a San Fioran de l'800 l'è Vila Lebrecht.