Comune de la Bassa Veronese che prima de l'unificasion d'Italia no l'esistea. Infati San Piero de Morubio el fasea parte del teritorio de Roerciara mentre le frassioni Bonavicina a l'epoca ciamada Malavicina e Borgo jera a le dipendense, la prima de Cerea e la seconda de Bovolon. Anca se, nissuna de le tri località no la gavea autonomia, in passà do grandi fameje jè stà ospitade come la Broilo a Bonavicina e la Dal Verme sostituida da la Loredan a Borgo. Parò le gavea autonomia religiosa e infati le parochie jè ricordà fin dal 1526 anca se quela de Bonavicina i dise che la sia esisistida almanco dal 1460. La césa de 'sta ultima frassion dedicada ai Santi Filipo e Giacomo, la vien citada in un documento del 1318 quando la fameja Broilo dopo averla dotada dei propi beni la podea nominarghe el "rector". La césa atual l'è stà costruida a metà del XVIII secolo mentre el campanil nel 1795. Del XV secolo l'è la césa de Borgo de Bonavicina dedicada a Santa Caterina costruida grassie ai Dal Verme; drento gh'è conservà 'na tela del '700 del Conati rafigurante el martirio de San Bartolomeo. Quela del capologo l'è dedicada ai Santi Piero e Paolo e ricostruida nel 1797 la conserva un bel altar baroco del XVII secolo. Storicamente la zona le stà coltivada par el gran nel XV secolo e col tempo par la canapa e le verdure, mentre nel XVII secolo soto la Republica Venessiana s'à svilupà la cultura del riso. San Piero de Morubio l'è ligà a Roerciara fin dal XIII secolo e soto la Republica de Venessia l'è passà nel Vicariado de Angiari. Famosa l'è la bataja del 1439 combatuda tra venessiani, milanesi e mantovani aleadi fra lori. In questo teritorio passava la fossa che Nicolò Piccinino a capo de le milisie de Filipo Maria Visconti l'à fato slargar par portar le navi da Ostija traersando el Tartaro e 'l Menago e da Cerea, longo la fossa, fin a la località Panego arente a Roerciareta da 'ndoe, navigando su l'Adese l'à tentà de tacar la fortessa de Legnago. E ligà a 'sto importante evento storico l'è la famosa strada del Panego, un longo retilineo che da nord del teritorio el porta a l'Adese. A l'inisio de 'sta strada gh'è una corte con colombara afrescada datada 1493, 'na meridiana e la scrita "Si magna quaeris disce pati", mentre difronte gh'è la setecentesca Vila Gobetti. Du bei palassi jè anca el Menini costruido nel 1777 apartegnudo a Giorgio Volpini, governador de la Casa de Pietà de Verona, e quel dei Loredan a Borgo de Bonaviçina con mura e merladura ghibelina. Par ci l'è curioso, el nome Morubio, el dovarìa derivar dal latin "rubus" rovo o da la fameja Rubbiani che la vivea in 'sta zona mentre documenti medievali i parla de Moruiolo, Morugio o Moruggiolo.