Comun de la Valpolesela a 18 km in diression nord-ovest da Verona el gà come frassioni Domeara, Gargagnago, Monte, Ponton e San Giorgio comprese tra i 87 e i 1075 m.s.l.m. La zona l'è abità fin da la preistoria come pol dimostrarne i reperti che i va dal neolitico a l'Età del Bronso scoèrti a Cà Verde, Domeara, Mandaiole, Monte Solane, Passo del Picon, Sant' Ambrosio e soratuto a San Giorgio. De epoca romana jè le iscrissioni sacre dedicade a Cuslano, a la Dea Fortuna, al Sol, a la Luna e a Vesta, vegnude a la luçe a San Giorgio (castrum romanum), de la la popolassion pre-romana dei "Arusnati" o "Arusnates" de origine forse reto-etrusca che in Valpolesela g'avea el so "Pagus Arusnatium" e in 'sta località el çentro religioso. Come savemo, Sant'Ambrosio l'è conossudo in tuto el mondo par l'estrassion e la laorassion del marmo come el "Rosso Verona", ma anca in epoca romana grassie a la vicinansa con l'Adese 'sto prodoto de qualità el vegnea esportà da partuto. Infati grassie a 'na scrita su le colonete del ciborio longobardo del 712, a l'Epoca de re Liutprando, conservà ne la césa de San Giorgio "Inganapoltron", savemo de l'arte del "scopelin" con Mastro Orso e i aiutanti Juventino e Juviano. El ciborio l'è stà rimesso a posto nel 1923 e se presenta sora a l'altar magior con quatro colonete laorade. La prima testimoniansa scrita che ne parla de 'sta césa col titolo de Pieve l'è ne la bola papal del 1145 con Papa Eugenio III "Plebem S.Georgii cum capellis et decimis et familiis et dimidia curte". La césa atual costruida verso el 1200 l'è stà la sede de un seminario schola juniorum. Mentre l'ultima testimoniansa scrita col titolo de Pieve l'è del 1456 quando l'à fato visita el Vescovo Barbaro. Da 'edar ghe anca el fonte batesimal in mono bloco de marmo sensa desmentegarse del stupendo ciostro e del campanil in stil romanico. 'N altra antica césa l'è quela de San Zen in Poia del XIII secolo in località Grola costruida a strati in calcare rosa e la se presenta a navada unica e con i resti dei afreschi che i rafigura San Zen e San Giorgio. Altre cése parochiali jè: quela de Ponton, parochia fin dal 1465, consacrà col nome de San Piero dal Vescovo Gian Mateo Giberti e sgrandà nel 1565 ne la forma atual cambiandoghe nome in Santa Maria Madalena, la conserva dei afreschi e tele de Bernardino India e del Brusasorsi oltre a 'na Madona in legno del XVI secolo; quela de Domeara del 1897 su disegno del Fraccaroli e la conserva un afresco con rafigurà el Cristo Maestro del pitor L. Filocamo; quela de Gargagnago costruida nel 1820 su disegno del Giuliari, decorà nel 1890 e consacrà nel 1939, conserva el simulacro de la Madona de la Misericordia del 1517; quela de Monte divisa da quela de Cavalo nel 1735 ma consacrà nel 1836 con baistero del '700; quela de Sant'Ambrogio costruida nel 1785 e 'ndoe nel 1456 l'arciprete el s'era spostà da la Pieve de San Giorgio su dimanda dei fedeli, la conserva piture de Angelo Da Campo, Orazio Farinati, Paolo Brenzoni e Giambattista Bellotti. Ne la frassion Monte, storicamente nel 1255 secondo el Dalla Corte: "Ezzelino, dubitando che suo fratello Giannotto (Giovan Antonio) potesse tradirlo, lo fece prendere un giorno che questi si trovava fuori città e co' ferri ai piedi e alle mani serrare nel Castello di Monte, che è nella Valle Policella e quasi sopra la Chiusa oggidì si ritrova, e poco dappoi". Poco distante dal çentro de la frassion gh'è el forte austriaco Mollinary del 1848 serà al publico ma da 'ndoe se pol gustarse un stupendo panorama. Tra le vile da 'edar la Vila Serego-Alighieri a Gargagnago rifata piassé 'olte e costruida in origine par Piero Alighieri, quarto fiol del grande poeta Dante e dosento ani dopo nel 1549 l'ultima dissendente Ginevra Alighieri s'à sposà con Marcantonio Serego. 'Sta magnifica vila oltre a le belesse artistiche conservade e zontà dai vari paroni nel corso dei ani, la gà arente 'na capela dedicà a la Vergine fata costruir dal Conte Pieralvise nel 1637 'ndoe gh'è conservà 'na belissima Madona col Butin del Liberale da Verona; Vila Rovereti a Domeara del 1780 su disegno del Cristofoli con statue e 'ndoe 'na 'olta nel XIX secolo gh'era 'na sorgente d'aqua termal usà par scopi terapeutici; Vila Brenzoni a Sant'Ambrosio del '500 da tempo sede de la Mostra Machine Marmo; Vila Nichesola del '500 a Ponton con parti de scola sanmicheliana e grandi sale afrescà dal Farinati, 'ndoe un tempo, gh'era conservà iscrissioni antiche che nel 1612 jè passade al Museo Lapidario Mafeian. "Rus amoenum in quo ... sunt perampla praedia et egregiae aedes" (amena compagna nella quale sono ampli terreni e dimore signorili): cossita nel 1606 el Pona l'a ricordà la vila a pochi ani da la so costrussion e col tempo anca el Pescetti "deliziosissima e magnifica villa". Da 'edar arente a la césa de San Giorgio inganapoltron el "Museo de la Pieve" con testimonianse de storia, cultura reperti preistoriçi e dei arusnati, are e iscrissioni romane, sculture longobarde e altro material de ogni epoca. E a proposito de poeti, dopo Alighieri Ve lassemo coi versi del nostro grande poeta Berto Barbarani:

Fumane
E tuto intorno a piombo de tirèla
dindola al monte, pronta e sucarina,
I'ua del <<Recioto>> de Valpolesela
con San Giorgio e Negrar degna Regina,
e castalda del vin de quela <<Grola>>,
che no ghe manca gnanca la parola!

Val d'Adese
Quel l'è Volargne e quel l'è Domeliare,
e Sant'Ambrogio de Valpolesela
coi marmi rossi de le so preare.

oto: Césa de San Giorgio Inganapoltron