Comune de la montagna Veronese, ne la Lessinia oçidental sora a la Valpolesela con le contrà Campostrin, Cona, Posse, Vaona, Zivelongo e le frassioni: Cerna con Boar, Maso e Spiassi; Fosse con Adamoli, Camparso, Casarole, Coste, Martelungo, Michelazzi, Tommasi; Giare con Saletti; Ronconi Ceredo, Vallene, Cescatto, Laita, Provalo, Selvavecia, Steffani; Vagimal con Corubio, Crestena e Giardin. Fin da la Preistoria e par essar precisi 120 milioni de ani fa nel Paleolitico Inferior, el teritorio, specialmente arente al Ponte de Veja, l'era abità da l'omo, mentre prima, l'era querto dal mar come ne pol testimoniar 'na tartaruga marina de 70 milioni de ani fa e 'l squalo fossile longo sié metri, el piassé grando d'Italia, catà ne le cave de piera, ora conservà nel Museo Paleontologico e Preistorico de Sant'Ana. Ne la zona jè presenti anca resti de insediamenti del Paleolitico Superior, del Mesolitico e del Neolitico con la çiviltà Campignana. Interessanti jè i vilai fortificadi colegà tra lori, de l'Età del Bronso, conossudi come "castelieri" a San Gioani, sul Monte Loffa, a le Guaite, a Ceredo e Fosse che nel corso dei secoli fin ai romani i s'à sgrandà pian pianin. Tra i fenomeni naturali da segnalar el Ponte de Veja, tra le piassé bei de la nostra provincia, 'n arco natural de origine carsica longo 52 metri con spessor de 6 metri a quasi 'na trentina de metri dal fondo val, logo 'ndoe i dise che Dante l'àbia ambientà el giron de le Malebolge del famoso "Inferno" e 'ndoe el Mantegna l'à ciapà ispirassion par l'afresco de la "Camera dei sposi" nel castel dei Gonzaga a Mantoa; sora l'altopian del Corno d'Aquilio (1.545 m.) nome che i dise el possa derivar dal latin aquilus logo scuro, fosco, arente a 'na céseta dedicà a le vitime de la speleologia, gh'è l'entrada a uno dei abissi carsici piassé profondi del mondo, la Spluga de la Preta che la va soto tera de quasi 900 m.; a poca distansa podemo catar la Grota del Ciabatin (scarpolin in ver.) scavà nel "rosso amonitico". E propio ne le vicinanse de l'Aquilio nàsse el Progno Pantena. Da segnalar, 'isto che la zona l'era sfrutà par el pascolo zà ai tempi dei romani, reperti interessanti de l'epoca, come le monede catade in tuti i çentri piassé importanti de la zona e le do tombe del III d.C. a Cona. Storicamente, dopo el periodo roman el teritorio l'è stà ocupà dai longobardi, par finir ne le mane del Monastero de San Zen come ne dise el primo documento scrito su Sant'Ana d'Alfaedo (dal latin fagetum = faggeta e col tempo faedum) in particolar del Monte Loffa nel XI secolo. Un altro documento inveçe, del 1166 el nomina contrà Zivelongo. Ne la seconda metà del XIII secolo nàsse el Comune de Cona con Alfaedo e Ceredo. Nel 1404 el Comun el passa soto a la Republica de Venessia mentre nei documenti del 1454 se parla par la prima 'olta de la césa de San Gioani in Lofa. Con la tremenda peste del 1630 el numaro dei abitanti el s'à dimesà ben. Nel 1820 ai Austriaçi ghe salta in mente de unir el Comune de Cona, Alfaedo e Ceredo con quel de Breonio con sede comunal a Fosse fin al 1866, quando soto el Regno d'Italia la sede comunal l'è stà trasferida a Sant'Ana. Nel 1928 nàsse el Comun de Sant'Ana d'Alfaedo. Interessante dal ponto de vista storico-artistico l'è la ceséta del XI secolo dedicà a San Gioani Batista sul Monte Lofa, una tra le piassé antiche de la Lessinia, 'ndoe un tempo i dise abità da un eremita. L'atual césa de Sant'Ana con drento un bel dipinto del Balestra, l'è stà ricostruida nel 1626 e nei documenti risulta parochia dal 1458. Ne la frassion piassé popolosa del comun, Cerna, la parochial del 1735 sgrandà nel 1954 la g'à un bel campanil del 1798 su disegno de Luigi Trezza. Foto: Corno d'Aquilio