San Zen de Montagna, l'è possionado sul versante oçidental del Monte Baldo, con vista panoramica sul lago de Garda e i monti del Bressian come el Monte Pizzocolo (el naso de Napoleon par i veronesi). El teritorio l'è costituido oltre che da San Zen con Ca' Montagna, Ca' Sartori, Castel La Ca', Laguna, Pora, Vilanoa, anca da le frassioni Lumini e Prada. In questo comune se pol godar dei magnifiçi panorami e far escursioni tra i prà, boschi e pascoli in meso a la natura incontaminada. Da Prada Alta se pol tor la funivia arivando in pochi minuti al Rifugio Fiori del Baldo (1815 m) e magari decidar se proseguir par le çime de la montagna passando par el Rifugio Chierego (1911 m) fin al Rifugio Telegrafo (2200m) o tornar indrio con la strada che passa prima par la Bocheta de Naole (1648 m) e dopo par l'ex Forte. Storicamente le prime testimonianse preistoriche jè stà rinvegnude ne l'abitado de Prada 'ndoe i à scoerto una ponta musteriana (paleolitico medio), mentre in varie zone intorno al'abitado de San Zeno de Montagna jè stà rinvegnudi, in superfice o in depositi de argila, numarosi materiali litici atribuidi al paleolitico medio, al paleolitico superiore, al mesolitico, al neolitico e al'età del bronso. A Lumini inveçe l'è stà rinvegnudo un ras-ciatoio, mentre ne le località Laguna e Ca' Schena jè stà scoerte de le tombe forse de età romana. Da segnalar che el nome coreto del paese el sarìa San Zen dei Montagna, 'isto che anticamente i tereni de questa zona i i era de propietà de l'Abassia de San Zen de Verona e nel periodo scaligero de la fameja Montagna. Questi nobili i possedea una casa "Cà Montagna" ne l'omonima contrada e essendo amiçi dei scaligeri i possedea n'altra residensa nel palasso de fronte a la césa de Santa Maria Antica a Verona, fasendo così i pendolari tra la çità e 'l Baldo. Par questa profonda amicissia i scaligeri i avea nominado uno de dissendenti dei Montagna un çerto Piero, Capitan de Soave e che a so 'olta l'à finansià come da documenti del 1375, el palasso de la Pretura de Soave, nel periodo scaligero de Cansignorio dela Scala. Ma un altra amicissia importante l'era con i nobili Dal Verme (anca questi amiçi dei Scaligeri), 'isto che, come scrito su 'n diploma de Martino II del 1351, el vicariado de Pesina, Ceredel, Montagna e Albisano l'era deventà de proprietà de questa fameja, mentre in una pergamena del 1354 risulta che i Dal Verme i gavesse pascoli sul Monte Baldo sensa contar che in un altra pergamena del 1395 la proprietà dei Dal Verme la vegnea fitada ai omini de la comunità de San Zen de Montagna. Cà Montagna 'desso l'è la Sede de rapresentansa del Comune e dopo un bel restauro se pol amirar decorasioni e afreschi come el magnifico "San Cristoforo". San Zen gavea una so capela dipendente da la pieve di Garda, che nel 1530 l'è stà visitata dal vescovo Gian Matteo Giberti. La cesa del paese dedicada a San Zen de Verona, zà nel 1464 l'era parochial con "rector", l'è piena de marmi e altari, con pale del pitor veronese Pietro Manin eseguide intorno al 1850. Ne la frassion de Lumìni, gh'è la cesa de Santa Eurosia, del 1724, nominada parochia nel 1943 e ne l'altra frassion Prada la çeseta de San Bartolomeo. A la fine del XIX secolo questo comune l'ospitava un importante poligono militar con esercitasioni de i regimenti de la Division de Verona. Atualmente l'economia local l'è votada al turismo con numerosi albergi e struture de sogiorno. Molto importante l'è la festa maron ai primi de noembre, con mostra e marcà del prodoto tipico de 'queste zone.