El teritorio del comune de Selva de Progno el se cata longo l'alta Val de Ilasi e finisse a nord ai pié del Monte Carega. Le frassioni jé Campofontana, San Bartolomeo de le Montagne o semplicemente San Bortolo e par finir Giassa o Ljetzan 'ndoe riesse a sopravivar l'antico dialèto todesco, conossudo come "Taucias Gareida" parlado fin a un secolo fa da la popolasion local. Infati la zona de Selva de Progno (Brunge) la fa parte de 'n area de discrete dimensioni dei Lessini che storicamente, nel 1287, el Vescovo de Verona Bartolomeo de la Scala l'avea concesso a dei boscaioli-cimbri "Tzimberer" originari de la Baviera, par disboscar in parte e abitarghe. Le contrà fondà dai Cimbri col tempo jè deventà 13 Comuni che i fasea parte del Vicariato de le Montagne. La vera e propia nassita dei comuni l'è stà nel 1326 come dise un diploma de Cangrande, e in Epoca Viscontea, Selva risulta nel Vicariato sostituido nel 1815 dal "Distreto de la Montagna". Giazza risulta par la prima 'olta nei documenti del 1409 mentre Campofontana e San Bortolo nel corso del XIV secolo. In pratica, la storia de 'sto comune, la va drio a quela general dei Tredese Comuni passadi nel tempo soto ai Visconti, che grassie a Caterina vedova de Gian Galeasso Visconti i à mantegnudo i privilegi Scaligeri, riconfermadi anca dai Venessiani fin al 1797 quando l'è arivà Napoleon. Dopo i francesi jè arivadi i austriaci ma no gh'è stà atension par i privilegi e la minoransa lenguistica e cultural, provocando la scomparsa pian pian de la lengua cimbra a parte nel caso de la toponomastica, 'ndoe la vien ancora usà. Così ne la frassion de Giassa l'è stà creà el Museo Etnografico con una bela biblioteca sul folclor cimbro, atressadure, materiali fotografici e tuto quel che pol essar utile par tegnér in vita 'sta lengua. Da segnalàr, sempre in stà frassion la césa parochial del '800 dedicà a San Giacomo Magior costruida in sostitussion de quela vecia del 1680. A Selva de Progno gh'è la césa dedicà a Santa Maria Assunta costruida sora a un tempio primitivo del XII secolo consacrà secondo tradission da Papa Lucio III. De l'800 jè anca le parochiali de Campofontana costruida sora 'na vecia césa del XVI secolo e quela de San Bortolo sora a 'natra del XV secolo. Propio in 'sta ultima frassion gh'è el Museo dei Trombini 'ndoe podemo 'edar magnifici esemplari de "Trombini" ciamadi anca "Pistoni" o "S-ciopo da Sagra", arma a avancarica utilisà dai "Trombonieri" par momenti significativi ne le feste paesane e ne le sagre. Bisogna far un salto sicuramente a la Sagra dei Trombini e dei Pistonieri de San Bortolo, con benedission dei trombonieri e de le armi, seguida da una magnifica esibission 'ndoe i vien sparadi grossi colpi a salve che i te fa tremar i denti. Tra le curiosità, Campofontana pol fregiarse del titolo de çentro abitado piassé alto de la provincia Veronese con i so 1223 metri sora el livel del mar. E par finir ne resta che far un giro par le contrà tra el verde dei pascoli o par sentieri, amirando testimonianse de arte popolar religiosa con colenete e capitei scolpidi su la piera, sensa contar numarose case con piture murali costruide secondo el metodo cimbro o in meso a 'na splendida natura incontaminada deigrandi boschi, fasendo magari quatro passi in Val Frasele e ne la Val de Reolto.