San Mauro de Saline, el se cata a nord de la Val de Messane e a Ovest de Badia Calavena çircondà da un stupendo paesaio montan e da un poche de contrade sparse qua e là come le Comerlati, Meccari, Nardari, Scaletti, Spillichi, Strengaro, Vago e Varalta, sensa desmentegarse che de questo teritorio fa parte anca la frassion de Tavernole con le contrade Bettola e Dosso. Poco distante dal paese gh'è el Monte S.Moro (anticamente Monte Castro), 'ndoe 'na olta gh'era un "Castelier" de l'età del bronso e un "Castrum" costruido in epoca romana a scopo difensivo e de sorvejansa su la Via Cara, importante via de comunicassion e de passajo par caréti e bestiame bovin e cavrin, che la partìa dal setimo mïo roman de la Via Postumia a l'altessa de Vago de Lavagno e longo la dorsal l'arivàa in Lessinia. Questo tra l'altro el dovarìa essar stà, secondo 'na legenda, el percorso fato dal Vescovo de Verona San Mauro tra el 612 e 'l 622, par arivar a Saline 'ndoe el s'a ritirado a vita da eremita sul monte che'l porta el so nome. Chi l'è stà costruida nel 1388 la césa de San Leonardo (da Limoges) in Castro (ciamada atualmente anca de San Moro) sui resti de 'n'altra andada completamente brusada. L'è a tri navade con tri absidi e un portego sul davanti con un campanil a pianta quadra e coredà con 4 bifore. Su la porta de ingresso gh'è un afresco del treçento rafigurante la "Madona col butin, San Leonardo e i devoti". Da documenti se rileva che nel 1145 e nel 1165 la césa l'era condota da monaci. Questo Santo l'era venerado da queste parti come protetor de le done "gravide" e dei mal de molona (oltre che liberador de prigionieri e dei contadini cimbri). Infati gh'era l'usansa de dar la benedision "coi çercoli in ferro batudo" che i vegnea infiladi ne le balaustre de l'altar de San Leonardo, fasendogheli metar su la molona dei devoti nel giorno de la sagra de San Mateo el 21 setembre. La césa parochial atual l'è dedicada a San Mauro e costruida nel 1835 su 'n 'altra precedente, nata intorno al XV secolo con a l'interno afreschi e tele de Rocco Pittaco e de Agostino Pegrassi, (demolida tra el 1775 e 'l 1835). Par ci se dimanda da 'ndoe deriva el nome Saline el pol averghe più risposte. Se pensa che 'l possa derivar da la selci laorade "Salàin" che in questo teritorio tra le altre jè stà catade o dai depositi de sal utilisadi par pagar i mesadri ai tempi dei Scaligeri; un sacheto de sal par conservar la roba da magnar in cambio de la manodopera. Storicamente l'è stà uno dei tredese comuni cimbri a partir dal 1287 quando el Vescovo de Verona Bartolomeo de la Scala l'avea concesso a questi boscaioli-cimbri "Tzimberer" dei tochi de tera in Lessinia da disboscar in parte e abitarghe. Nel XVI secolo gavemo la presensa de un prete de lengua todesca, che testimonia ulteriormente la quasi esclusiva predominansa de popolasioni todesche ne la zona e la necessità de una so evangelisasion in lengua germanica: infati dal 1527 al 1541 el paroco de Saline l'era un çerto don Andreas de Fondrunis, che'l vegna dal Cero Veronese e parlava in cimbro. Nei secoli sucessivi ghe stà la peste oltre al colera e una grande emigrassion verso le fabriche çitadine, causa predominante de la diminusion demografica. Da segnalar ne la contrada Vago una carateristica corte con colombara datada 1610 che secondo la tradission l'era sede de la Pretura e che presenta su la fasàda del’abitasion, n' afresco de la Madona contornada da angioleti che i maca con el piè un bisso. Una curiosità l'è che Tavernole, 'desso relegada a frassion, un tempo l'era uno dei XIII comuni cimbri de la Lessinia. Tra i prodoti tipiçi da ricordar i “maroni” con l'importante festa de fine otobre e 'l formajo “Monte Veronese”.