Comune de l'est veronese a l'inissio de la "Val Tramigna o Traméa" anticamente Vallis Terminea, a i pié dei Monti Lessini con le so frassioni Castelsarìn l'antico Castrum Ecerini (con le contrà Coste, Lelli, Megian), Casteleto (con Valona), Costesola\Costiòla it. Costeggiola (con Batocchi, Pressi, Tamellini), Fità (con Monte) e le contrà de Soave, Borgo S. Mateo, Campagnola, Fontanele, Fornaçi Michelon, Molin d Sora, Mondel, Preare, S. Lorenso e Tebaldi). Tra le testimonianse storiche che pol dimostrarne de l'esistensa de l'omo fin da l'antichità, g'avemo a Castelsarìn e sul Monte Rocheta reperti de l'Età del Bronso come un fantastico muro a seco mentre a Soave un poche de tombe del Eneolitico. In epoca romana el teritorio l'era traversà da la Via Postumia controlà da un Pagus fortificado. Tra i reperti romani da segnalar monede, tombe, tochi de pavimentassion o de steli come quela catà de la césa de San Martin nel castel de Soave conservà a Verona nel Museo Archeologico del Teatro Roman con sora scrito i membri de la gens Vitoria: V(ivi) f(ecerunt) / L(ucius) Vitorius L(uci) f(ilius) Festus, / Q(uintus) Vitorius L(uci) f(ilius) Severus,/ VI viri aug(ustales), sibi et / Cassiae Sex(ti) f(iliae) Maxim[ae], [Cominiae L(uci) f(iliae) Festae, / Catiae M(arci) f(iliae) Secundae, / uxoribus, et / L(ucio) Vitorio L(uci) f(ilio) Feroc(i), / C(aio) Vitorio L(uci) f(ilio) Festo, / Q(uinto) Vitorio Q(uinti) f(ilio) Festo, / filiis, VI viris augustalibus]. Sembrarìa che el çentro storico de Soave el sia stà fondà in epoca longobarda, nel 500, da 'na tribù de Svevi vegnudi in Italia con Alboin e che de conseguensa el nome el possa derivar propio da lori "Suaves", "Suevi", toponimo cambià in "Soavi" e par finir in "Soave". Nel IX secolo soto Berengario par limitar i casini combinà da le invasioni ungariche, numarosi paesi i era stà autorisà dal re a fortificarse e propio 'de 'sta epoca se dise la sia la roca modificada col tempo da Scaligeri e Venessiani. In 'sto periodo el Monastero de San Nazar el gavea 'sta zona tra i vari possedimenti de la provincia. El primo documento scrito su Soave l'è del 877, 'na "controversia" del Monastero de San Zen. Nel XII secolo Soave l'era tra le propietà prima dei Conti de Sambonifacio come ricordà da un diploma del XII secolo de Federico Barbarossa, col tempo de la fameja Greppi e prima de passar ai Scaligeri, al Comune de Verona che gà mandà a comandar un capitan. El castel dopo essar stà conquistà dai "traditori" veronesi con a capo Pulcinela da le Carçeri amigo dei Conti Sambonifacio, nel 1280 l'è stà ciapà da Mastin De la Scala. Soave l'è deventà un importante ponto de frontiera de la signoria Scaligera, quando Alberto de la Scala dopo "acordi de paçe" con i Padovani, l'à fato butar zò tute le fortificassioni a est de l'Alpon. Nel 1338 el castel l'è stà conquistà dai Fiorentini aleadi ai Venessiani par ripassar un par de ani dopo ne le mane de Mastino II de la Scala. Nel 1369 Cansignorio dopo aver rimesso a posto el castel nato sul Monte Tenda, l'à fortificado ben Soave, con mura merlade rinforsade da 24 tori ancora ben conservade mentre nel 1387 dopo la fin de la Signoria Scaligera, i Visconti i era entrà in possesso del paese, con a capo, incaricà da Gian Galeasso, un çerto Balzarino da Pusterla. Dopo i Carraresi nel 1405 jè arivà i Venessiani che 'isto l'importansa de Soave jà volù costruir el tersa anel de muri intorno al paese. Dal 1509 al 1517 numarose jè stà le bataje tra la Lega de Cambrai e la Serenissima in tuto el teritorio veronese con cambio de paron abastansa de spesso, come anca a Soave. Tornà ai Venessiani, l'è stà consegnà ne le mane del proveditor venessian Andrea Gritti no ancora Doge. In 'sto periodo fin a l'arivo dei francesi. Dopo el Congresso de Viena, nel 1815, Soave l'è passà soto el regno austro-ungarico, par deventar italiana dopo la tersa guera de indipendensa nel 1866. Nel periodo 1889-92 la fameja Camuzzoni, deventà parona del castel l'à ben pensà de restaurarlo. Oltre al castel con i so ponti levadori da visitar ghe anca el Palasso de Giustissia costruido nel 1375 par volontà de Cansignorio con i contributi de 22 comunità del Capitado de Soave deventà soto i Venessiani palasso dei Capitano; Podo distante in stil gotico venessian gh'è el Palasso del Capitan Nicolò Cavalli del 1411 con fassada afrescà dal Falconeto; Arente a Porta Aquila gh'è el Palasso Scaligero volù da Cansignorio come residensa dei governadori de Soave; el Palasso dei Conti Sambonifacio del XIII secolo; i Palassi Pullici del '400 e Moscardo del '600. Tra le cése da segnalàr la césa parochial dedicà a San Lorenso del 1303 ricostruida nel 1758 e forse costruida inissialmente sora ai resti de n'altra, che la presenta un batistero del 1430, statue e tele del Morone, Farinati e Cignaroli del '400; la césa dei Padri Domenicani in stil lombardo del 1443 dedicà a S.Maria de Monte Santo; el Santuario de la Bassanella dedicà a "Santa Maria Assunta" con statua ritegnù miracolosa del XI secolo con afreschi e statue del XIV secolo; la césa de San Giorgio costruì dai Francescani nel XIII secolo; la césa de San Roco del XV secolo rifata nel 1521 con drento 'n afresco del XV secolo con el Santo e 'na pala del '500 con Sant'Ana, la Madona e San Gioanin de la scola de Giulio Romano; la césa de Sant'Antonio del 1677 fata costruir da la fameja Cusani, presenta interessanti quadri de la Via Crucis. E 'desso ne resta che bear un bel goto de Soave bianco D.O.C. a la Vostra salute......