Comun posissionà a 15 chilometri in diression ovest da Verona al confin oriental de l'anfiteatro morenico del Garda e la fin de la campagna veronese. L'òmo l'è presente in 'sto teritorio fin da la preistoria come pol testimoniar tombe e vasi de l'Età del Bronso vegnudi a la luçe. Ma le prime notissie e testimonianse storiche jè de epoca romana: in quél periodo gh'era un vilajo che nel corso dei secoli de dominassion romana el s'à svilupà mentre nel 38 a.C. l'era stà costruì un tempio dedicà a la Dea Diana. A testimoniansa de la costrussion, durante i laori de restauro de la césa de Sant'Andrea l'è stà scoerta un ara votiva con sora scriti i nomi de i consoli Lentulo e Norbano. Un altra ara votiva de un tempio dedicà a Minerva l'è stà catà 'ndoe un tempo gh'era la césa de San Piero; nel teritorio comunal jè stà scoerte anca magnifiche pavimentassioni, monede e la necropoli de Custosa (l'antica Custodia). Con tuta probabilità Somacampagna l'era a l'epoca 'na fortessa, un "vicus" fortificado, che tegnéa d'ocio la campagna tra el Menso e l'Adese, un logo 'ndoe passava soldà de vari eserçiti come quel de Atila fermà nel 452 arente a Somacampagna ma anca teatro de guere come nel 312 tra Costantino e Ruricio. Dopo i franchi e i longobardi, nel 930 el paese lo catemo scrito su de i documenti che i parla de 'na donassion al Monastero de San Zen, col nome de Summacampania (o Summa Campanea). Un documento del 1035 parla de la pieve de Sant'Andrea 'ndoe un tempo gh'era intorno le prime case, quele col querto de paja. Nel 1178 el podestà de Verona Grumerio l'avea disegnà i confini de la Campagna Veronese che dal ponto de vista aministrativo dipendea da Verona e che oviamente comprendea anca Somacampagna. Nel 1185 catemo el primo documento scrito che parla de Custosa, 'ndoe ne vien dito anca che i consoli Veronesi ne la costrussion del borgo fortificato de Vilafranca i avea proposto de far fossati de protession. Nel 1220 secondo 'na legenda de Tomaso da Celano, Francesco d'Assisi dopo aver visità Verona, l'è passà da 'ste parti fermandose par poco in una costrussion arente a l'oratorio de Santa Maria in Monte e tra le altre i dise che l'àbia fondà propio chi, la comunità dei frati Minori Conventuali sopressa nel 1810 da Napoleon. Dopo le guere tra i guelfi e i ghibelini nel XIII secolo, nel 1241 Somacampagna l'è stà ciapà de mira dai mantoani e cossita s'à pensà de rinforsar la fossa de protession progetà 35 ani prima dal castel de Vilafranca fin a chi. Durante el periodo scaligero i era stà costruidi un par de castei, uno a Somacampagna e l'altro a Custosa deventadi importantissimi nel 1375 par i Visconti durante la guera contro i Scaligeri. Da ricordar un famoso personajo nato tra el 1320 e 'l 1330, un çerto "Gidino da Somacampagna" fiol de Manfredo e neodo de un Azzolino da Somacampagna, che da butel l'era stà consijà a studiar latin e francese; a la corte de Cangrande II De la Scala l'era deventà un amigo-consijer e ministro de le finanse. Ma 'sto personajo l'è deventà famoso par el "Trattato sui Ritmi Volgari" catà tri secoli dopo a Bologna da Scipione Maffei durante un viaio e regalà a la Biblioteca Capitolar de Verona. Ritornando a la storia, dopo i Visconti e i Carraresi l'è stà el turno del dominio Venessian; Somacampagnà l'era stà messa nel Vicariato de Bussolengo mentre Custosa l'era a le dipendense de Verona fin a la fin del '700. Nel 1436 l'ocupassion de Francesco Gonzaga dei teritori de Somacampagna e Custosa mentre nel 1438 l'è rivà la peste. Nel 1500 s'à svilupà la coltivassion dei morari e 'l comercio de lana e seda, ma le rogne no jera finide, a causa del passajo dei soldà de la Lega de Cambrai che i avea messo soto sora el teritorio. Nel 1535 la parochia de Custosa s'à destacà da S.Andrea de Somacampagna e la popolassion che vivea intorno a la césa de Sant'Andrea s'à spostà verso el çentro atual del paese. Nel censimento del 1585 a Somacampagna risultava 2371 campi (474 destinà a pascolo) divisi tra tuti i abitanti del paese in quota magior ai òmeni rispeto a le done. Nel 1630 altro giro de peste con 464 morti su 1450 persone. Nel 1617 l'è nata la frassion Casele par merito del benefator Angelo Brighenti che l'avea fato costruir 'na ceséta, deventà col tempo, dopo essar stà sgrandà, un oratorio de 'na çerta importansa. Nel '700 a Somacampagna jè rivà dei Nobili da Verona che i s'à zontà a quei zà presenti, costruendo magnifiche vile che podemo 'edar anca al dì de ancò. Verso l'inissio de l'800 l'è stà el turno de Napoleon e dei Austriaçi; nel 1814 soto l'Austria l'aministrassion del paese l'era ne le mane de n'assemblea composta da 30 paroni e propio in 'sto periodo i era stà sistemadi 22 chilometri de strade e costruì un toco de la ferovia Milan-Venessia. El teritorio, in particolar, la frassion Custosa l'è stà interessà nel Risorgimento da le bataje de le guere de indipendensa del 1848, del 1859 e del 1866. A ricordo de le guere de Indipendensa e a quanti jè stà vitime ne le guere l'è restà un Ossario (1879), l'obelisco de la Cavalchina, el monumento ai caduti de Monte Crose e la famosa casa del Tamburin Sardo. Tra le cése da segnalar la pieve de San'Andrea ne la forma atual del X-XI secolo con modifiche del XII e XIV secolo; a tri absidi, tri navade e tri entrade, conserva 'na bela Via Crucis in legno e afreschi che i va dal XI al XIII secolo oltre a un bel Giudissio Universal del Cicogna del XIV secolo. Altra césa antica l'è el Santuario de la Madona del Monte forse del '400, rifata nel XVIII secolo, conserva un bel quadro de l'Assunta con San Francesco, Sant'Antonio e San Bonaventura segno de la presensa dei Frati Minori; un bel afresco con la Madona col Butin el se cata sora a l'altar in marmo in stil baroco del 1712. Del 1816 l'è inveçe la Madona de la Salute volù da la fameja Venier, mentre del XVIII secolo ma de origini piassé antiche l'è la césa parochial de San Piero in Vinculis de Custosa 'ndoe podemo 'dar 'na statua del '400 con rafigurà la Madona. A Casele la parochial del Redentor costruida nel 1904 ma originaria del 1617. E par finir la césa parochial de Somacampagna de l'Imacolata e Sant'Andrea Apostolo dita del Pirlar, deventà importante nel 1535 quando la zente la s'à trasferì da la pieve de Sant'Andrea in quela piassé çentral del Pirlar che da la metà del XVIII secolo l'è stà ricostruida bela granda su disegni del Cristofoli e consacrà nel 1762 dal Vescovo de Verona, Nicolò Giustiniani mentre el campanil l'è de l'antica césa de la Madona del Pirlar. Tra le vile da segnalar Cà Zenobia sgrandà nel XVI secolo, con tochi de muri de epoca romanica (XII-XIII sec.); Vila Fioco del XVI secolo su disegno del Sanmicheli con bel giardin a l'italiana, un tempo sede del comando piemontese nel 1848 con arente la ceséta de San Michelin che conserva 'na pala de Domenico Brusasorzi e un importante reliquario; Vila Venier "La Bassa" del XVII secolo con giardin a l'italiana e parco verto al publico; Vila Bocca-Trezza "Mile e una Rosa" in çentro al paese 'ndoe i à sponsà Ferdinando de Savoia duca de Genova e l'Arciduca Alberto d'Austria durante le guere del 1848 e del 1866; Vila Ravignani 'ndoe ne la prima guera de indipendensa el s'à fermà Vitorio Emanuele; Vila Campostrini "la decima" casa colonica 'ndoe un tempo se pagava le decime e la magnifica Vila Ottolini-Pignatti a Custosa del 1600.