El teritorio comunal el se cata a ovest de la çità de Verona e l'è diviso in du parti, un toco in pianura con la frassion Lugagnan e 'l resto posissionà sora a le coline moreniche del Garda con el Comun de Sona e le frassioni San Giorgio in Salici e Palassol. L'òmo l'è presente in 'sto teritorio fin da la preistoria come i pol dimostrar i reperti vegnudi a la luçe de le popolassioni teramaricole e euganee, tochi de un castelier e de 'na scudela neolitica a San Giorgio in Salici. In epoca romana Sona 'isto la so posission strategica l'era un bel ponto de controlo su le vie de passajo, par 'sto motivo, nei secoli l'è stà teatro de guere de 'na çerta importansa. Dopo la fin de l'Impero Roman jè rivà i Longobardi e Sona l'è stà inserida ne la Iudicaria Gardensis, un sistema giuridico e aministrativo de l'area gardesana; a testimoniansa del periodo longobardo l'è restà el toponimo "Palazzolo" (ver. Palassol) da "Palatiolum", palasseto, forse çentro de comando e logo soto la giurisdission de le autorità çitadine. El primo documento che'l parla de Sona l'è del XII secolo, 'ndoe se lese de 'na compravendita de tereni da parte del Monastero de San Zen. Tra el XII e 'l XIII secolo el Comun de Verona dopo essarse rinforsà, par gestirse mejo dal ponto de 'ista aministrativo, l'avea sudiviso i teritori dei comuni rurali o de campagna in Distreti e Colonei, cossita Lugagnan fasea parte de la "Campagna Veronese" e Sona del "Colonel de la Gardesana", restà in pié par tuto el medioevo. Nel XIII secolo numarose jè stà le bataje tra guelfi e ghibelini e Sona l'è stà messa soto sora, con distrussioni e robarie. I Scaligeri 'isto l'importansa militar de la zona i à pensà de fortificarla ben e nel çentro de Palassol podemo 'dar ancora al dì de ancò la tor merlada de propietà del Comun. Finìo sto periodo e 'l passajo de Visconti e Cararesi, Sona a l'inissio del XV secolo l'era entrà a far parte de la Republica de Venessia gestida con la frassion Palassol dal Vicariato de Bussolengo. Nei quatro secoli "venessiani" s'à svilupà ben l'economia soratuto grassie a l'agricoltura con la coltivassion dei morari par l'industria de la seda. Cascà la Republica de Venessia par man de Napoleon a la fin del XVIII secolo, anca Sona l'è entrà verso la metà de l'800 nel longo periodo de le guere de indipendensa, non solo partecipando ma deventando teatro de bataje, con vitorie un colpo da 'na parte e un colpo da l'altra tra l'esercito dei Savoia e i Austriaçi. Tra le cése da segnalar quela de Santa Giustina a Palassol costruida verso el 1000 sui resti de 'n altra césa; la se presenta a 'na sola navada e du absidi, con arente 'na capela zontà del XVI secolo e circondà da un çimitero picenin. Magnifici jè i afreschi in stil bisantin del XIII secolo e carateristico l'è el campanil a bifore. Fata coi sassi de l'Adese come quel de Santa Giustina l'è la césa dei Santi Quirico e Giulitta del XIII secolo un tempo tacà a un convento de i Domenicani, conserva dei stupendi afreschi come la "Crocefission" del Liberale ne l'abside. Ne la parochial de Palassolo dedicà ai Santi Giacomo e Giustina costruida a metà del XIX secolo trasformando un vecio Oratorio dedicà a San Giacomo del '400, podemo 'edar un bel altar dedicà a San Luigi del 1716 fato da la Società Corpus Domini e de le decorassioni del VIII secolo. A San Giorgio in Salici podemo 'edar la césa parochial del XVIII secolo costruida su disegno del Trezza in un logo 'ndoe gh'era un altro tempio ricordà tra i le propietà del Capitolo de la Catedral nei documenti del XII secolo. A Sona inveçe, la césa parochial del '700 un tempo dedicà a San Salvator la conserva 'na tela del '600 con rafigurà San Roco. Tra le vile da segnalar quele de Sona: Vila Giarola del XVIII secolo, Vila Trevisan-Calderari del XIX secolo, Vila Consolaro del XVIII secolo, Vila Sparici "dei Cipressi" del XIX secolo, Vila Silvestri "la Selara" del XIX secolo, Vila Macola del XVII secolo; a San Giorgio in Salici: Vila Bajetta del XVII secolo e Vila Giusti del Giardin in loc. Guastala Nova del XVII secolo; a Palassol gh'è Vila Schizzi del XVIII secolo e vila Berzacola "Belvedere" del XVIII secolo. 'ndoe Carlo Alberto e Ferdinando Maria Duca de Genova i à vardà le sorti de la bataja de Pastrendo del 30 april 1848. Tra le curiosità dovemo segnalar che la frassion Lugagnan un tempo divisa tra Verona, Bussolengo, Somacampagna e Sona, dal 1975 con referendum popolar l'è passà interamente soto al comun de Sona. Da 'edar l'è el Museo Civico "Attilio Fedrigo" con materiali fossili da liItalia e dal'estero, 'na colession de reperti de tute le ere geologiche, dal Paleozoico fin al periodo Oleocenico. Importanti jè reperti i trilobiti, graptoliti, ortoceratidi del'Era Primaria, grandi amoniti del'Era Secondaria, un pochi de grandi gasteropodi del Tersiario e resti de elefanti e altri bestie del'Era Quaternaria.