Comune de la Bassa Veronese al confin con la provincia de Mantoa e traversà par tuta la so longhessa dal fiume Tion, che'l passa arente a le frassioni Pontepossero, Tor Masin, Bonferar, Pampuro e Moratica. 'Sto teritorio l'è stà abità fin da la preistoria come ne dimostra i reperti archeologici catadi a Sorgà e in particolar a Bonferar de l'età del Bronso. El sito archeologico piassé importante, l'è quel de 'sta frassion arente al molin, con resti rinvegnudi come vasi, colane, roba varia e sepolture de la çiviltà atestina. Le prime testimonianse scrite jè del IX secolo, quando l'è passà ne le mane del Monastero de San Zen quel picenin de Moratica. Nel 928 Sorgà la vien confermà come feudo, tra i possedimenti del Monastero dei Benedetini de Santa Maria in Organo da Ugo Re d'Italia. Monastero passado col tempo a l'ordine dei Benedetini Olivetani, riconfermando el feudo e la so gestion durà fin a la fine del XVI secolo. Un documento del 1571 ne dise de la vendita dei beni del Monastero de Santa Maria in Organo ai conti Gottardo e Giacomo Murari. L'autorità de le istitussioni religiose l'è rimasta tal fin a l'arivo de Napoleon a l'inissio del XIX secolo, quando le à fate serar. Pontepossero inveçe l'era feudo dei Canonici de la Catedral nel XII secolo, passado in epoca Scaligera ai De la Scala e comprà dai Conti venesiani Grimani nel 1406, quando tuti i beni de la nobil casada veronese jè stà messi a l'asta da la Serenissima. In epoca venesiana la gestion del teritorio de Sorgà l'era ne le mane de le nobili fameje, infati podemo amirar ancora splendide abitasioni, come l'elegante Vila Grimani fata costruir da la fameja omonima nel XVIII secolo a Pontepossero, deventà col tempo de propietà de la fameja Balestrieri. Poco distante sul fiume Tion, l'antico molin e la pila del XIV secolo; a Sorgà gh'è Palasso Murari del '500 conossudo come "Palasson del Diaolo" a causa de una legenda che la disea de la probabile presensa del diaolo drento la costrusion e de le lote tra lu e 'l paroco del paese; Vila Bogoni del 1460, con afreschi de Giulio Romano alievo de Raffaello, abitada nel XVI dai Gonzaga; a Bonferar l'antica Vadum Ferrarii gh'è Vila Brà del XVI secolo con arente el Museo de la civiltà Contadina. Tra le cése da segnalar la parochial dedicà a la Natività de Maria a Sorgà, conossuda fin dal X secolo e ricostruida a la fine del XV secolo mentre l'oratorio arente l'è del XVII secolo. La césa la conserva dei magnifici afreschi del Morone e del Maestro Agostino, del Creara; la pala del Coro con rafigurà la Madona coi Santi l'è del Farinati. Se pol amirar anca un bel batistero del '500 con sora, come el portal, i stemi dei Olivetani e de l'Organo simbolo del monastero paron de Sorgà; altra césa l'è quela de Pontepossero dedicà a Tuti i Santi e ricordà fin dal XI secolo e ricostruida nel XVIII secolo. Drento gh'è le pale del Brusasorzi e del Cignaroli oltre a un bel fonte batesimal del XV secolo in marmo bianco. Non bisogna desmentegarse de la Corte Decima, 'na costrussion fata anca coi resti del vecio castel medioval del paese. Come dise el nome, vegnea esercità l'autorità civile, prima dai monaci e col tempo dai Grimani. Tra le curiosità da segnalar che Pampuro l'è entrà a far parte de la provincia veronese verso la metà de l'800, prima l'era soto Castellaro de Mantoa.