Comune de la bassa veronese a na çinquantina de chilometri da Verona. La zona l'era abitada fin da l'Età del Bronso come ne pol testimoniar i resti de una grossa comunità catadi durante i scavi par la costrussion de le scole elementari in via Brazzetto. In epoca romana l'era traversàda da la strada consolar Emilia Altinate costruida dal console Marco Emilio Lepido nel 175 a.C. che partendo da la via Emilia la menàva al municipio roman de Altino passando sora l'Adese a l'altessa de Montagnana e servendo i çentri de la zona. A testimoniansa de la presensa de 'sta strada, con dei rilevamenti aerei, l'è stà adocià el vecio traciado in meso ai campi coltivadi fin a la frassion de Begosso. Con la piena de l'Adese e la conseguente "rotta della Cucca" antica denominasion de Veronela, ne l'autuno 589 d.C. tuta la pianura veronese l'è stà modificada brutalmente. Le aque del fiume le avea somerso la pianura veronese, lassando poche tere, zone sabiose e paludose, propio in quela ocasion l'Adese, che prima el passava tra Veronela, Padoa e Este l'à cambià percorso bagnado el comune de Terasso. A la fine de l'ano mile in questi teritori desoladi e sachegiadi dai barbari, i çentri abitadi i era gran pochi e propio da questi l'è scomincià l'opera de bonifica e l'atività dei campi. El paese el vien citado in un privilegio del 1145 con el qual el Papa Eugenio III l'avea confermà Tebaldo, Vescovo de Verona i diriti su la césa de Terasso "Ecclesiam Turracii cum decimis". Nel XII l'era stà costruido un forte a difesa del teritorio con tanto de tóri e de queste ghe né rimasta una, simbolo del paese, infati el nome el deriva da Turracium. Nel 1234 el fortilizio el vien assaltado dal podestà de Verona Ruberto de Pii mandà da Eselin III da Roman ma con esito negativo. Terasso dopo essar passà soto la Serenissima nel 1405, nel 1514 durante la guera de Cambrai vien sachegià e devastà. Passà questo periodo la Republica Venessiana la pensa ben de butar zò i ultimi albari rimasti, che in prinçipio jera stà salvadi par ricavarghene legna par le navi e bonificar l'area paludosa trasformandola in teren agricolo; così el teren el vien spartido tra le fameje nobili venesiane e veronesi che le costruirà col tempo un bel mucio de vile. Nel 1630 la peste fa visita anca da ste parti e i abitanti i se dimesà. Tra le cése, da segnalar quela de San Paolo rifata nel 1613 ma con el campanil e fonte batesimal del IX secolo. L'altar major in marmo l'è stà realisà nel 1741 dal scultor Giuseppe Schiacci da Verona; la parochial de la frassion Begosso costruida tra l' XI e 'l XII secolo, in costante manutension nei secoli parchè bandonà e in degrado; la césa afrescada de San Celestin de la frassion Nichesola del 1330. Inveçe, tra le vile, da segnalar la stupenda Vila fortessa "Fascinato" in stile liberty, ma con carateristiche medioevali. L'esistensa del complesso l'è documentada nel 1500 ma che la risulta presente in epoca piasè lontana. Atualmente la se presenta con quatro tóri, du davanti 'ndoe gh'è la fasada e altre do ne la parte de drio, un bel posso del 1400 e l'oratorio dedicado a San Carlo Borromeo del 1884. Tra i primi propietari de questa vila la potente fameja dei Nichesola e nel 1600 i Bevilacqua de Lasise. Un altra vila tra le più interessanti l'è la Nani-Mocenigo conossuda anca come Corte Bottagisio. Con tór rapresentà sul gonfalon comunal usada nel corso de secoli come colombara, la vila la fasea parte de un importante sistema difensivo in epoca medioeval (vedi sora), posissionà ai confini tra Terasso e Merlara (PD). Bela l'è anca la fusion de stili tra le barchesse, i pòrteghi e la maestosa casa padronal, tuti e tri de epoche diverse. Par finir del '600 l'è la Vila Adele-Brizzi ora sede comunal. Do parole le va spese anca par la frassion Nichesola conossuda nei secoli come Nauclesiola, Nichexuola e Neclosola sembrarìa derivar da l'omonima nobile fameja presente nel teritorio prima de l'ano mile. La vien nominada par la prima 'olta su 'n diploma del 1154 da Federico Barbarossa "Nauclesiola nominatur in Diplomate Federici Regis an. 1154 et firmatur Episcopo Veronesi loquendo de pluribus locis in simul". Begosso "Bovosio" el vien nominado par la prima 'olta nei documenti del X secolo come quel del 932 d.C. 'ndoe se parla de una donassion del Dicono de Verona al Capitolo de la Catedral de alcuni tereni, nel 955 d.C. el Conte Milone de Sambonifacio el concede a so fradel e a so neodo un castel, una corte e un vigneto mentre nel 967 d.C. el Vescovo Raterio el ghe fa una donassional clero minor de la césa veronese. El paese el fasea parte de le "12 vile" che versava le "decime" a la pieve de San Piero in Tillida (atualm. in Cantalovo). Nel XVIII secolo l'era molto usado dai barconi el porto su l'Adese par el trasporto de giara e de varie mercansie ma butà zò nel 1813 dai austriaçi.