Tóri del Benaco, stupendo comune che se specia con el so màsiso castel nel Lago de Garda. Numerosi reperti durante dei scavi, i fa risalir 'sto paese al periodo preistorico; tochi de çeramica decorada, material de folenda de l'età del bronso, resti de un antico çentro abitado su palafite, sensa contar le interessanti incisioni rupestri. Sucessivamente Tóri (Tulles) l'è entrà a far parte de l'Impero Roman verso la fine del I° Secolo a.C. come le pol testimoniar le monede romane catade e i toponimi ancora esistenti, come Le Sorti (Sortes) e Il Salto (Saltus). Col tempo i à scomincià le invasioni dei Goti, poi Longobardi, dei Franchi e nel X° Secolo i Ungari. Par questo motivo Berengario Re d'Italia arivà a Tóri nel 905 l'à fato costruir le mura (ancora visibili) e la tór che ghe ne la piassa de la césa. Questo comune l'era politicamente importante intorno a l'ano 1000 essendo sede del Consijo de la "Judicaria Gardensis". Nel XII secolo passa da la sponda veronese del Lago de Garda anca le trupe de Federico Barbarossa e in questo periodo vien costruide le cése de la Trinità vissin al Porto, quela de San Gioani vissin al vecio çimitero (con resti de afreschi del Morone e de Giovanni da Bardolino) e quela de San Gregorio ne la frassion de Pai. Nei ultimi ani de la dominasion scaligera, Antonio de la Scala l'avea pensà de fortificar le difese, del porto con la costrusion de una "darsena" fortificada e de un bel castel sui resti de una fortessa precedente. Nel 1387 tuto el teritorio gardesan veronese el passa soto ai Visconti, nel 1404 ai Da Carrara e nel 1405 ai Venessiani. Propio soto la Republica Venessiana questo comun el deventa con Malcesine sede de la Gardesana del'Aqua, federassion de 10 comuni con compiti de repression e de ripartision dei oneri fiscali. El consijo con a capo el Capitan del Lago el se riuniva nel palasso dove 'desso gh'è l'albergo Gardesana un tempo dei nobili Calderini mentre nel XVI secolo drento nel castel. Purtropo nel '600 a Tóri come nel resto de la provincia veronese, l'a fato comparsa la peste; i maladi i vegnea portadi viçin a la césa de San Gioani e nel monastero de la césa de San Faustin. E propio de quel periodo l'è l'afresco che ghe ne la césa de Sant'Antonio (verso la contrada Coi) che ne spiega come l'era el teritorio in quel'epoca. Dal 1797 i s'a alternado domini austriaçi e francesi par un pochi de ani, par finir in mane austriache fin al 1866 prima de passar soto el Regno d'Italia. Da segnalar la césa parochial dei Santi Piero e Paolo con relative statue, un organo del 1743 Angelo Bonatti, numerose altari e pale de Piero Rotari (XVIIsec.), Simone Brentana (1733), Sabastiano Aragonese (1538). Se volì godarVe un bel panorama del Lago alora Ve consiliemo de far un salto ne la frassion Albisan, con césa parochial del 1700 (esistente nel XIII secolo). El nome de questa località el dovarìa derivar da un nobile roman, un çerto Albucius, mentre un documento del 1184 ne parla de Albisanum. L'altra frassion, Pai l'antica "Pali" o "Palli", no l'era çircondà da mura ma l'era composta da una serie corti fortificade. Re Berengario l'avea fato costruir un bel castel butado zò dal Barbarossa. Ne la césa parochial de San Marco Evangelista del 1703 gh'è un batistero del 1522 e su l'altar 'na Madona del Rosario del XV secolo mentre l'abside l'è del 1400. Da segnalar inoltre la césa 'pena fora Tóri dei Santi Faustino e Giovita con a l'interno la tomba de l'eremita Pietro Malerba morto nel 1469 e afreschi del XV secolo con rafigudi anca i San Roco, San 'Bastian e la Madona col butin. Da visitar assolutamente l'è el museo del castel scaligero con sale 'ndoe ne vien spiegà la costrussion e la riparassion de le barche, la coltivassion de l'olivo con slita da trasporto e un bel torchio, la pesca nel Garda con atressadure e una serie de reti antiche, come l'era el paese nei secoli con numerose ricostrusioni e cartine topografiche, la storia de l'antica "Corporasion dei Originari de Tóri e Garda nata nel 1452 e ancora operante, le incisioni rupestri del teritorio sensa contar che gh'è la possibilità de visitar anca la "serra" dei agrumi ancora in funsion sul Garda del 1760. Tra i personagi famosi nati in questo comune gh'èl'umanista Domizio Calderini nel XV secolo, el botanico Gregorio Rigo, Giuseppe Nascimbeni sensa contar la citadinansa onoraria al grande Angelo Dall'Oca Bianca.