Importante Comun de la Val de Ilasi a 22 chilometri in diression nord-est da Verona con le frassioni Cogol (Cogollo), Sentro (Centro), Fineti, Marçemigo, Scorgnan. Sicuramente Tregnago l'è de origine romana come pol testimoniar i reperti catadi durante la ricostrussion de la césa parochial, statuete con Lare e Minerva, are funerarie, monede, scrite. Anca el nome "Tregnago" el g'à le stesse origini secondo i esperti de toponomastica; dovarìa derivar dal nome de 'na persona che l'a fondà el paese, un çerto Terinius, Ternius o Trinius e quindi i relativi agetivi i sarìa Teriniacus, Terniacus e Triniacus che i pol indicar le propietà del "colono" o fondator. In documenti de epoca medioeval, come la pergamena del 1111 vegnemo a saver 'ndoe se cata Tregnago: in finibus et in comitatu ueronensi, in ualle longazeria, in calauena, in uico tergnago (nei confini e nel comitato veronesi, nella val d'Illasi, nella zona detta Calavena, nel paese detto Tregnago). La Calavena l'era la zona tra le atuali Badia e Tregnago mentre la "pieve de Calavena" l'era a Tregnago. Nel XIV secolo i cimbri i ciamava Tregnago "Kalvàin", in pratica un alterassion de Calavéna un nome de origini pre-romane; quando jè rivà i romani el primo colono l'a fondà ne la parte sud al confin del teritorio de la Calavena l'atual Tregnago e da chi, secondo alcuni, el nome podarìa derivar da "Terminiacus" tera de confin. De origini sicuramente romane l'è el Monte sora al paese, "Precastio", che'l servìa ai romani come ponto strategico-difensivo posissionà "prima" de l'acampamento. Tra i primi documenti scriti g'avemo el testamento del 932 de Dagoberto Diacono 'ndoe Tregnago el vien ciamà Teranciago. Dopo el periodo roman no ghe notissie in merito su 'sto comun e bisogna rivàr fin al XI secolo quando el Vescovo Walterio l'a fato costruir el castel sui resti de un castrum romano. In 'sto periodo Tregnago l'era tra i possedimenti dei Vescovi de Verona, concesso come feudo al Monastero de San Piero de Calavena una tra le piassé importante istitussioni religiose del teritorio veronese. Nel 1228, come scrito sui Statuti Veronesi, el Vescovo de Verona el gà concesso a Tregnago, in canbio de Monteforte d'Alpon, tuti i diriti su la zona. Nel 1239 el castel l'è stà rinforsà dai Scaligeri e consegnà ne le mane del Comun da Cangrande nel 1328 avendo perso importansa dal ponto de vista strategico. Famose jè stà le beghe e i dispeti tra i abitanti de Tregnago e quei de San Gioani Larion par el control dei pascoli sul Monte Beloca, come nel 1502 quando i tregnaghesi i g'à ciavà le vache e dopo averle portà nel castel i à organisà un bel festin con canti, balade e carne a maca par tuto el paese. Ghe scapà dei morti, feriti e prigionieri ma con la sentensa del 9 noembre 1508 la lota l'è finìa. Per ci l'è interessà al castel podemo dirghe che'l se cata ai pié del Monte Precastio con çinta muraria a forma de quadrilatero, circa 150 metri par lato, con ogni tanto 'na tor; al çentro de la cortina oriental gh'è el mastio a forma pentagonal; la porta par entrar al castel l'è a sud, ne la tor de l'orolojo, posissionà con la campana nel 1850, data in cui l'è stà alsà la tor. Su la porta ghe du afreschi con a fianco el stema dei Scaligeri: un leon de San Marco e 'na Madona del XVI secolo. Tra le cése da segnalàr l'atual césa parochial dedicà a Santa Maria Assunta costruida nel 1879 su disegno de Don Angelo Gottardi e consacrà nel 1922, ma pieve e parochia con arciprete dal 1465 mentre dal XVI secolo par dosento ani l'è stà unida al Monastero dei Santi Nazar e Celso de Verona, la presenta 'na fonte batesimal in marmo rosso del 1438 e 'na pietà piturà su legno del '500; arente podemo catàr la ceséta romanica del XII secolo de la Dissiplina antica sede de la confraternita dei "Dissiplinadi o Flageladi" con du sepolcri tacà del '300 mentre drento podemo catàr i afreschi del Giolfino del '500, 'na pala del Brusasorzi, 'n opera del Morene e in un canton de la césa gh'è un basso-rilievo in marmo bianco con rafigurà San Martin patrono de Tregnago; longo la strada prinçipal del paese catemo la césa de Sant'Egidio 'ndoe ghe conservà 'na tela del Brusasorzi con rafigurà Sant'Ana e San Michel; del XV secolo l'è inveçe la césa de la frassion Sentro dedicà ai Santi Ermagora e Fortunato 'ndoe gh'è conservà 'na statua del '500 de la "Madona de la Cintura"; la parochial de Cogol dedicà a San Biagio conserva 'na pala del Prunati del '600 e anca se rifata piassé 'olte, la gà antiche origini, infati l'è stà consacrà da Papa Lucio III nel 1183. Tra le vile da segnalar la Pellegrini-Cipolla del XVI secolo parò rifata nel 1841 la se presenta con un bel parco, filari de cipressi e statue oltre al stema dei Cipolla; in piassa Massalongo vila Pellegrini del '700 con afreschi del pitor Andrea Porta. E par ci ghe piase far quatro passi in meso a la natura consiliemo el Sentiero de la lana, antico percorso che i fasea i pastori in epoca scaligera par portar la lana a destinassion.