Comun de la Bassa Veronese al confin con la provincia de Mantoa e posissionà a 20 chilometri in diression sud-ovest da Verona longo el corso del fiume Tion nel qual i se buta fossi e canai come el Tionçel, Demorta, Grimana, Gambisa, Giona e Camandon che i bagna i 9000 campi de la campagna de Traensol. L'omo l'è presente da 'ste parti fin da la preistoria come i pol dimostrar i numarosi reperti de un par de comunità de l'Età del Bronso vegnudi a la luçe tra el Tion e 'l Tionçel: tochi de ceramiche, ponte de frece, lame, ossi de bestie, un pugnal, siguréto e altre robe. De epoca romana jè i resti de un complesso de costrussioni in località Serajo destèso su 'n area de 1900 metri quadri, forse 'na vila con funsioni de fatoria, che podarìa risalir al III° secolo d.C. fasendo riferimento a le monede vegnù a la luçe nel stesso posto. Altri reperti romani jè stà catadi 'ndoe 'na 'olta gh'era el castel; da ricordar le du iscrissioni, una su lamina de bronso dedicà a Minerva e l'altra in piera in onor de Tiberio Augustano, procurator de la Britania. El toponimo de Traensòl l'è de origine romana, podarìa vegnér dal nome de un çerto Trebentius. Ne l'alto medioevo Traensol el risulta tra i possedimenti del Monastero de San Zen e propio de 'sto periodo jè documenti piassé antichi che i parla del paese; dal 1027 i documenti i ne parla Traensol fasendo parò riferimento al "castrum" o "castellum". Nel XIII secolo el castel l'è stà protagonista de le lote tra Mantoani e Veronese e nel 1230 el paese l'è stà messo soto-sora dai Mantoani che diese ani dopo i è stà sconfiti da Eselin da Roman. In 'sto periodo se vede l'afermassion del comun e grassie a dei documenti se riesse a capir la strutura organisativa; gh'era el massaro, el console e un par de consijeri che i podea élesar el sindaco con el compito de distribuir le tere concesse dal monastero de San Zen a la zente de Traénsol par un numaro de ani preciso, mentre un mese dopo se riuniva i capifameja "vicinia" par confermar o meno la decision. Nel 1217 l'è stà stabilì lo "statuto campestre" conossudo come "Regula" a la presensa dei rapresentanti del Comun e de quei de la Césa soto el portègo de la Pieve de Santa Maria, 'ndoe jera stà decise le multe da far pagar in caso de dani a beni agricoli; in pratica el Comun el g'avea el compito de gestir problemi e teritorio mentre el Monastero su çerte decisioni importanti el volea essarghe e dir le propie rasoni che'l più de le 'olte iera decisive. Durante el secolo parò el Comun de Verona l'à continuà a muciar beni e diriti a Traensol e nei comuni confinanti fin a rivendicar el completo control sul comun. Quando jè rivà i Scaligeri, tuti i beni del Comun jè passà soto a la fameja De la Scala mentre finì sto periodo e quel Visconteo, nel 1404 la Serenissima l'à ciapà el posto dei Carraresi grassie a Jacopo Dal Verme che'l guidava i soldà Venessiani riussendo a métar soto al propio dominio, tere e la frassion fortificà de Fagnan che fasea parte del sistema difensivo del famoso Serajo volù dai Scaligeri. A l'inissio del periodo Venessian i teritori de Traensol i era tornà soto la gestion de l'Abate de San Zen ma pian pianela jè finì ne le mane de fameje nobili che nel corso dei ani i era deventà sempre piassé importanti come i Arcoli, Sogeri, Peroni, Farfusola, Da Quinto, Nichesola, Bevilacqua-Lazise, Zerbi, Guantieri, Pellegrini, Schioppo, Allegri e Fontanelli. Dopo el periodo Venessian andà avanti 'bastansa ben a parte la peste, verso la fin de l'700 jè rivà i francesi che i à messo a fero e fogo el teritorio mentre nei primi de l'800 soto i austriaçi le cose no jè andà al mejo, sempre piassé miseria e malatie tanto che nel 1875 dopo l'unificasion d'Italia i primi Traensolesi jè stà costreti a migrar in Brasil. Tra le cése da segnalar la parochial de Traensol dedicà a Santa Maria Madalena ricordà tra i possessi de San Zen fin dal XI secolo e come pieve a partir dal 1145, restaurà nel XV secolo e rimodernà nel XVIII secolo, la conserva un conro intarsià del XVII secolo e do tele interessanti, una del Ridolfi e l'altra de Francesco Barbieri "El Sfrisà". La parochial de Fagnan l'è del XVII secolo ma con elementi de la vecia césa come el batistero in marmo del 1432, un par de afreschi del '300 con la Vergine e 'na magnifica statua in legno che rafigura la Madona col Butin del XV secolo. La césa atual de Roncolevà dedicà a San Zen l'è stà costruì nel 1871 ma de origine sicuramente piassé antica. Tra le corti da segnalar la San Bernardin sul confin nord del comun, un tempo de propietà dei Giona, l'è costituì da un palasso çentral çircondà da un poche de costrussioni e con arente un oratorio dedicà al Santo costruì nel XV secolo; la Curtalta sul confin col mantoan che fasea parte nel XV secolo del feudo dei Grimani mentre el palasso l'è del '800 con barchesse e torioni. Inoltre da segnalar Corte Azzini con el "Palazzon", Corte Spolverini ciamà Sant'Eurosia dal nome de la ceséta, Corte Grande un tempo dei Allegri, la magnifica Corte Pellegrini; a Fagnan se pol catàr Corte Giusti al Serajo, Corte Ravaldini, Corte Deçima, Corte Schioppo; a Roncolevà Corte Muttoni-Mezzanelli, Corte Dossi....