Comune al confin con el mantoan a 27 chilometri da Verona in diression sud-ovest e posissionà a sanca del fiume Menso (Mincio), ne le coline moreniche del Garda. Secondo la toponomastica el nome Valeso dovarìa derivar da "vallensis", abitante de la val del Menso e ghe ci dise dal latin "Valles de(or)um" deventà "Valedium" che vol dir "Val de i Dei" forse par la presensa de templi pagani. Mentre el nome del fiume el deriva dal latin Minctio "scolo, deflusso" riferendose a l'aqua che vien fora dal Lago de Garda che la da origine al Mincio. La zona l'era abità fin da la preistoria, come pol dimostrarne i pai de legno de un vilajo su palafite de l'Età del Bronso, piantadi in origine in meso al Menso, ma catadi arente a la frassion Borgheto su "l'Isolon", un isola longa 350 metri e larga 60, che la s'à formà coi materiai trasportà dal fiume. Chi l'era la residensa de popolassioni venete o retiche e grassie ai scavi del 1956, avemo podù saver anca, che a quei tempi i fasea ceramiche, i lavorava la piera e 'l bronso, oltre cusir e filar come dimostrà dai reperti. Al vilajo parò, i gà tacà fogo ben do 'olte par dopo essar bandonà dal tuto. Dal II secolo a.C. g'avemo la presensa romana come i ne dimostra i reperti de anfore, monede, lumini catà nel teritorio e con tuta probabilità anca le fondamenta del ponte de Borgheto, i è fate secondo metodi de costrussion de l'Impero Roman. Ne la frassion Salionse (toponimo da San Leone - San Lionce o Leonzio) gh'è stà el storico incontro nel 452 d.C. tra "l'ambassador" Papa Leone I mandà da l'imperador Valentiniano e Attila che l'avea fato sosta coi Unni da 'ste parti, finido con la ritirada dei barbari. Nel medioevo sul Monte Ongheri l'è stà costruido el castel a difesa de le case con tuta probabilità presente dal X secolo, quando in giro par la provincia veronese su concession de Re Berengario, i era stà costruidi un fraco de castei par difendarse da le invasioni dei Ungari. El primo documento scrito sul castel l'è del 1277 quando el Comune de Verona el ghe l'avea dà in concession a Alberto de la Scala. Nel 1325 el castel l'era deventà propietà dei Scaligeri e grassie a l'Abassia de San Zen anca i tereni de la frassion Borgheto. Ma i primi documenti che i parla de Valeso i è i diplomi imperiali del 884, 945 e 997, mentre ne la conferma de re Berengario al vescovo di Mantoa Egilulfo del 2 diçembre 894 vien nominà tra i beni «ambe ripe Mincii de Valegio». Tra el 1145 e 'l 1193 se lese i nomi Valegio (la césa local con la tassa de le deçime, la vien ricordà nel 1145: «Plebem de Valegio cum capellis et decimis»), Valisium, Valesio, Valevo e Vallezo. Con Cangrande De la Scala nel XIV secolo el castel l'è stà rinforsà in maniera incredibile (nel periodo visconteo ghe stà zontà l'alta roca tra le 4 tori), mentre soto el fiol Mastino II, l'è stà portà a bon fin el progeto del famoso "Serajo", un murajon che partendo da Valeso e passando da Vilafranca el finiva a Nogarola Roca. De 'sti muri se pol 'edar i resti del Casteleto del Gherlo che'l segna el confin col Comun de Vilafranca. Dal 1387 l'è stà el turno a Valeso dei Visconti fin ai primi ani del XV secolo, e grassie a Gian Galeasso nel 1393 s'à isto la nassita del famoso ponte fortificado longo 600m e largo 26 con muraioni alti 10m e tori merlade a Borgheto; in parte rovinà nel 1702 e nel '900 par farghe passar la ferovia, nel 1598 l'era deventà propietà dei marchesi Guarienti, nel 1825 dei Maffei, col tempo dei Conti Nuvolari e par ultimo del Comun. Nel XV secolo, soto la Republica de Venessia, l'era posto de confin e par 'sto motivo gh'è stà numarose guere e solo dal XVI s'à 'isto un poca de tranquilità. Nel 1595 i çitadini par vosse dei marchesi Guarienti i g'avea dimandà con 'na letara ai Capitani de Verona, de usar liberamente la roca del castel e 'l ponte, e grassie al Doge l'è rivà la concession. Nel 1747 dopo varie beghe la Serenissima l'à confermà i diriti del Comun su Roca, Castel, Ponte, Casteleto del Gherlo con la Fossa e 'l murajon. Ai tempi de la sucession al Ducato de Mantova nel XVII secolo, l'esercito venessian andà in aiuto de Carlo I de Nevers el s'era fermà a "Valezo sora Menzo", parché "loco ben difeso et proteto". Nel 1630 dopo le bataje perse a Vilabona e Marengo s'à 'isto i Venessiani ritirarse verso Castelnovo e Peschiera lassando Valeso ai todeschi Lanzichenechi che dopo aver robà, spacà fora tuto e portà la peste, i à butà fora par n' ano i abitanti de Valeso che in fuga i s'à rifugià a Verona. Nel 1796 grande bataja a Valeso tra i Francesi e i Austriaçi finida con la ritirada austriaca verso Verona e Peschiera e con l'ingresso in paese de Napoleon, 'ndoe l'à sponsà nel Palasso Guarienti (ora Casa del Patriota) ris-ciando de essar ciapà dai nemiçi. Altra bataja de quele toste l'è stà nel Nadal del 1800, tra i francesi e i austriaçi, finida con la vitoria francese e 'isto la mancada convocassion de le autorità de Valeso, el general Brune l'avea autorisà i soldà a mètar soto sora el paese. Nel 1848 durante la prima guera de indipendensa italiana, l'esercito piemontese, guidà da Carlo Alberto, dover aver vinto a Goito, l'era entrà el 10 april a Borgheto e ritornà el 30 majo durante l'assedio a Mantoa, con quartier general a Vila Maffei. Nel teritorio de Valeso s'à svolto gran parte de bataja de Custosa. Nel 1859 dopo la bataja de Solferin e San Martin, prima de l'armistissio de Vilafranca l'è rivà Napoleon III a Vila Maffei. Nel 1866 altra bataja a Custosa con Valeso piena de feridi ne le cése, ospedai e case. A Otobre Valeso l'è deventà Italiana. Da 'edar a Valeso ghe Vila de la Quercia un tempo dei Maffei costruida nel 1692 su disegno de Vincenzo Pellesina de la scola del Palladio con arente el Parco Sigurtà tra i piassé magnifiçi del mondo, composto da prà, albari, boscheti, giardini su 'na superfice de 50 etari. Altra Vila l'è la Portalupi del '700 voluda da i nobili Verzeri. Tra le cése da segnalar la parochial de Valeso dedicà a San Piero costruida su disegno de Adriano Cristofoli e consacrà nel 1760, la conserva 'na tela de Saverio Dalla Rosa con rafigurà San Piero in Catedra; la césa de Santa Maria dei Monti costruida sul teren regalà nel 1595 da le moneghe de San Lussia d'Ognissanti de Verona; a Borgheto paese che'l ciapa el nome da la fameja Borghetti, gh'è la césa de San Marco ricostruida nel XVI-XVII secolo con l'abside de 'n antico tempio romanico, la conserva la campana regalà dai Scaligeri nel 1381 e l'imagine de la Beata Vergine de la Mazon venerà da secoli. E alora 'desso ne resta che magnarse un bon piato fumante dei famosi Tortelini de Valeso. Foto: Ponte visconteo ne la frassion Borgheto