El paese el se troa a caval tra la Val Squaranto e la Val d'Ilasi, in meso tra el Monte Purga (1257 m.) e 'l Monte Stòze (1080 m). El teritorio comunal el se presenta con le frassioni Camposilvan e Adarìn (Azzarino), sensa contar un bel mucio de contrade sparse un po da partuto tra cui Kùnech, Tèce, Baltieri, Battisteri, Campe, Comerlati, Carrà, Croce, Foi, Garzin de Soto, Menotti, Pozze, Purga, Riva, Salaorno, Scrivazzi, Stauder, Taioli, Val, Via Verde. El primo nucleo abitativo i dise che'l sia stà sul Monte Purga, parchè a quanto sembra gh'era un bel "Castelier" (sistema de abitasioni fortificade) de l'età del fero e ne la stessa zona jè stà catade alcune ceramiche, masenini par el color, strumenti de folenda (selce) e un par de siguréti de bronso; sucessivamente in epoca romana l'è stà messo in piè un "Castrum" (butado zò nel 1854 par costruirghe l'atual céseta) e usado in epoca longobarda come postassion. Infati ne la toponomastica el par che'l nome "Purga" el possa derivar dal çimbro "burg" che vol dir roca. Mentre el nome Velo l'è de origine latina come scrito nel documento del 1287, "Vellus sive curia Vellj", dal Vescovo de Verona Bartolomeo de la Scala par la concession e la gestion dei teritori de la Lessinia ai cimbri; Velo infati l'era uno dei tredese comuni de 'sta comunità. Stesso discorso par un altro comun cimbro ora frassion, Adarìn (Azzarino) , dal latin àrger, argine che nel veronese deventa àrzere; el teritorio l'è "arginado" da un par de çime e vai, mentre ne le mape medioevali compare come Azerinum. Da visitar a Velo l'è la césa parochial de San Gioani Batista del 1485 con tri altari a Santa Maria, San Roco e Corpo de Cristo, un bel batistero del 1533 in marmo rosso. A l'esterno de la césa ghe diverse lapidi del '400 e '500 come a esempio quela del 1801 che la fissa el presso del vin, del gran e del formento. De questa vecia césa no resta altro che un poche de volte e de colone, essendo stà rifata la fasàda e l'abside oltre aver sbassà el pavimento a la fine del secolo XIX, su disegno del'abate Gottardi. Da segnalar la céseta piena de storia e tradission de San Carlo Borromeo a Camposilvàn, che la ne ricorda la sosta del Santo Vescovo de Milàn durante el so viaio verso el famoso Conçilio de Trento. Secondo la tradission l'è stà costruida dai abitanti come ringrassiamento a Carlo Borromeo quatro ani prima che deventasse santo, par averli liberadi da strie, orchi e altri esseri oscuri presenti ne la Lessinia. Nel corso dei secoli l'è stà più volte slargada e nel 1907 ghe stà zontà el campanil. Me racomando de non desmentegarse de visitar "Covoli" de Velo e Camposilvàn, magnifiche cavità carsiche, 'ndoe jè stà catadi reperti de l'età del bronso e de l' orso speleo nel primo e utensili preistorici nel secondo. Quest'ultimo che se cata in contrada Covolo de Camposilvan ve lo consiliemo, parchè oltre a essar ben atressado, ghe la possibilità de 'edar dei fenomeni meteorologici al'interno de la caverna e soratuto parchè l'è poca distansa dal Museo Geopalentologico voludo dal grande Tilio Benetti che merita de sicuro una visita. Chi podì 'edar fossili e reperti preistorici de pregevole importansa. Se Ve piase el "carsismo" alora podì far du passi verso la "Val de le Sfingi" longa 800m, 'ndoe ghe presenti una serie blochi de piera calcare, modeladi da la disgregassion e da l'erosion, ben alineadi e regolarmente distansiadi l'uno da l'altro.